La Bibia piemontèisa/Testament Vej/Surtia/Surtia 38
Surtìa
[modifiché]38
[modifiché]L’autar dj’olocàust
[modifiché]1Bessalel, peui, a l’ha dovrà ‘d bòsch ëd gasìa për fabriché l’autar quadrà për j’olocàust. A l’era largh doe branche, longh doe branche e àut ses branche. 2Dal midem tòch a l'ha fàit sponté coma ‘n còrn për mincadun dij sò quat canton. A l’ha 'rvëstì tut l’autar ëd bronz. 3Ëd bronz a l’ha fàit ëdcò tùit j’asi dl’autar: dij vas për cheuje la sënner, ëd palëtte, ëd gaviòt, ëd forchetton, e ‘d brasé. 4Për l’autar a l’ha ‘dcò fàit na grija ‘d bronz a forma ‘d rèij e a la butala sota la curnis ëd l’autar fin-a a la metà dl'autëssa. 5A l’ha fàit fonde quatr anèj e a l’ha fissaje ai quat canton ëd la grija ‘d bronz për feje passé le stanghe. 6Le stanghe a l’ha fàje ‘d bòsch ëd gasìa, a l’ha arvëstìe ‘d bronz, 7e a l’ha faje passé ant j’anèj ch’a-i ero ai fianch dl’autar për podèjlo trasporté. L’autar drinta a l’era veuid e a l’era fàit ëd plance. 8Ëd bronz peui chiel a l’ha fàit ël lavàbos con ij sò sostegn. A l’ha otnulo da jë spe-cc ëd bronz donà da le fomne ch’a servìo a l’intrada dël Tabërnàcol[1].
La cort dël Tabërnàcol
[modifiché]9Apress ëd lòn, Bessalel a l’ha fabricà la cort dël Tabërnàcol ch’a l’era cintà da ‘d tèile fàite ‘d lin bin filà. An sël fianch meridional coste tèile as estendìo për na longhëssa ‘d sinquanta méter. 10A l’ero sostnùe da vint pianton bin fissà an sù vint sòcoj ‘d bronz. Le tèile a l’ero tacà sù con dj’ansin e d’anèj d’argent. 11Ant l’istessa manera a l’ha fàit na série ‘d tèile për ël fianch nòrd - sinquanta méter ëd tèile sostnùe da vint pianton fissà bin a 'd sòcoj ëd bronz. Le tèile a l’ero ‘dcò tacà sù con dj’ansin e d’anèj d’argent. 12Al fianch ëd ponent, le tèile as estendìo për vintessinch méter. A l’avìo des pianton con ij sò des sòcoj. J’ansin e j’anèj ch’a-j tnisìo sù a l’ero d’argent. 13Ël fianch ch’a dà a levant a l’era ‘dcò ëd vintessinch méter. 14L’intrada dla cort a l’era an sël fianch ëd levant fianchegià da doe tèile. La tèila 'd drita a l’era ‘d set méter e a l’era sostnùa da tre pianton fissà an tre sòcoj. 15La tèila an sël fianch d'ësnìstra a l’era ‘dcò ‘d set méter e a l’era sostnùa da tre pianton fissà an tre sòcoj. 16Tute le tèile dovrà për la cort a l’ero fàite ‘d lin bin filà. 17Minca ‘n pianton a l’avìa ‘n sòco ‘d bronz, e j’ansin e j’anèj a l’ero d’argent. La ponta dij pianton ëd la cort a l’era arvëstìa d’argent, e j’anèj ch’a sërvìo për tnì sù le tèile a l’ero fàit d’argent. 18Ëd lin bin filà chiel a l’ha fàit la tèila për l’intrada 'd la cort e a l’ha brodalo con ëd fil tenzù ‘d pórpra violëtta, vërmèja e scarlata. A l’era larga doi méter e àuta doi méter e mes, l’istess ëd le tèile 'd la cort. 19A l’era tnùa sù da quat pianton, mincadun fissà bin an sij sòcoj ëd bronz. Le ponte dij pianton a l’ero arvëstìe d’argent e j’anèj a j’ero ‘dcò d’argent. 20Tùit ij pichèt për sostnì ‘l Tabërnàcol e la cort ch’a-j stasìa dantorn a l’ero ‘d bronz.
Inventari dij materiaj
[modifiché]21Për órdin ëd Mosè, ij Levita, sota la diression d’Itamar, fieul ëd ël sacerdòt Aron, a l’han fàit n’inventari dël material ch’a l’era stàit dovrà ant la fabricassion dël Tabernàcol ëd l’Aleansa. 22Bessalel, fieul d’Uri e novod d’Ur, ëd la tribù ‘d Giuda, a l’ha fàit tut lòn che Nosgnor a l’avìa comandà a Mosè. 23Sò colaborator a l’era Oliab, fieul d’Achisamach, ëd la tribù ‘d Dan, sislador e artista brodeur ëd tëssù ‘d lin fin tenzù ‘d pórpra violëtta, vërmèja o scarlata.
24L’òr dovrà ant la fabricassion ëd ël Santuari, l’òr ch’a l’era stàit n’oferta dël pòpol, a pèisava an tut mila chilo, conforma l’unità ‘d pèis ufissial dël Santuari. 25La quantità d’argent cujìa an tra coj ch’a j’ero stàit anregistrà ant ël censiment ëd la comunità, a l’era ‘d tre mila quatsent e vint chilo, conform a l’unità ‘d pèis ufissial dël Santuari. 26Costa quantità a corispond a l’oferta ‘d sinch grama d’argent për testa, val a dì la metà dl’unità[2] ‘d pèis ufissial dël Santuari, ëd mincadun dij sessent tre mila sincsent e sinquanta anregistrà dal censiment da l’età ‘d vint agn an sù[3]. 27Për fonde ij sent sòcoj corespondent al Santuari e a sò Vel, a son dovrasse tre mila quatsent chilo d’argent, l’é a dì, trantequat chilo për sòco. 28Con ij vint chilo d’argent ch’a l’é restaje a l’han faje ij rampin e j’anèj dij pianton e a l’han arvëstì ij capitej.
29Ël pèis dël bronz presentà a Nosgnor a l’era ‘d doi mila quatsent vintun chilo. 30 Ës bronz a l’é stàit dovrà për fé ij sòcoj dl’intrada dla Tenda dël Rëscontr, l’autar ëd bronz con soa grija e tùit j’asi dl’autar, 31ij sòcoj dla cort tut dantorn, ij sòcoj dl’intrada dla cort, tùit ij pichet dël Tabernacol e tùit ij pichet ëd la cinta dla cort.