Nino Autelli

Scritor ëd pròsa an lenga piemontèisa. Nino Autelli a l'é nassù a La Spinëta ai 17 d'ost dël 1903. A l'avìa studià medzin-a a Turin, ma a l'avìa anterompù jë studi për fé 'l bajèt; rintrà a l'ha decidù 'd fé ël magìster elementar. A l'era partì volontari për la campagna d'Etiòpia. Ai 23 ëd novèmber 1940 a l'é mariasse con Paola, ëdcò chila magistra. An gené 1941 a l'é stàit arciamà a j'arme. Cand ai 4 d'otóber 1941 a l'é naje soa fija Paola, chiel a l'era a Kolosvàr, an Transilvania. Vnù malavi, a l'é stàit congedà e a l'é tornà a fé ël magìster. Apress j'8 dë stèmber 1943 a l'ha aderì a la Repùblica ëd Salò. Ëd novèmber 1944 a l'é stàit torna ciamà a j'arme e a l'é restà an servissi a Lissandria fin-a ai 25 d'avril 1945. Autelli a l'é mòrt massà a La Spinëta a 4 ore e 'n quart dla matin dij 18 ëd maj dël 1945: a 'n bòt ëd cola neuit dij giovo armà a son andàit a pijelo a ca soa, a l'han falo seurte e a l'han ësparaje. Ij nòm dij sò sassin a son mai conossusse.

Bibliografìa

Pan d’ coa Leggende e racconti popolari piemontesi – S. E. L. P. – Turin – 1931 (Ristampa Viglongo – Turin – 1985)
Masnà – A l’ansegna di Brandé – Turin – 1937 (Ristampa Ca dë Studi “Pinin Pacòt” Colan-a «Ël mej dij mej» N° 1 – Turin – 1985 ~ Ca dë Studi “Pinin Pacòt” Colan-a «Ël mej dij mej» N° 9 – Turin – 1994)