La Bibia piemontèisa/Testament Vej/Salm/Salm 132

←Salm 131

La Bibia piemontèisa Ij Salm

Salm 133→

La Bìbia piemontèisa - Salm 132

Salm

132. Nosgnor! Arcòrd-te 'd David e 'd tut lòn ch’a l’ha patì

Lë scritor a ‘rciama a la ment ëd Nosgnor la devossion ëd David e soe promësse riguard a la dinastia ‘d David e ‘d Gerusalem.

¹Càntich dij pelerin ch’a monto a Gerusalem. Nosgnor! Arcòrd-te 'd David e ‘d tut lòn che chiel a l’ha patì. ²A Nosgnor chiel a l’ha fàit un giurament, na promëssa al Potent d’Israel: ³“A la sosta ‘d mia ca mi i intrerai pa, ant mè let im cogerai nen për arposé, ⁴nì ij mè euj i sarerai për deurme, ⁵fin-a tant ch’i treuva un leu për fabriché na ca për Nosgnor, un santuari për ël Potent d’Israel”.

⁶I l’oma savù che l’Èrca a l’era a Efrata, peui i l’oma trovala 'nt la pian-a ‘d Iaar. ⁷Introma, donch, al santuari ‘d Nosgnor, prostërnomse dë 'dnans al taborèt dij sò pé^[1].

⁸Nosgnor! Àuss-te, e intra ‘nt ël leugh ëd tò arpòs, ansema a l’Èrca, segn ëd tò podèj. ⁹Che ij tò sacerdòt a sio arvestì ‘d salvëssa, ij tò sërvent fedej ch’a canto ‘d gòj.

¹⁰Për amor ëd David, tò sërvent, arfuda pa ël rè ch’it l’has sernù^[2]. ¹¹Nosgnor a l’ha fàit un giurament a David con na promëssa ch’a sarà mai pì artratà: “An su tò tròno i butrai un dij tò dissendent^[3]. ¹²Se ij tò dissendent a rispeto ij termo ‘d mia aleansa, e le prescrission ch’ i-j mostrerai, anlora toa dinastìa a chiterà mai”. ¹³Përchè Nosgnor a l’ha sernù Gerusalem, a l’ha vorsula për soa ca. ¹⁴“Sto-sì a l’é ‘l leugh ëd mè arpòs për sèmper”, a l’ha dit, “am pias pròpi sta sità, i l’hai pijala për mia residensa. ¹⁵Mia benedission a sarà sèmper dzora a chila e i la rendrai an fior. Ij sò pòver a mangeran fin-a ch’a në veulo. ¹⁶I vestirai ij sò sacerdòt ëd giustissia, e ij sò sërvent fedej a canteran ëd gòj. ¹⁷Ambelelà i farai chërse ‘l podèj ëd Dàvid; col ch’i l’hai consacrà a sarà na lus për mè pòpol^[4]. ¹⁸I vestirai d’onta ij sò nemis, ma chiel a sarà ‘n rè glorios^[5].

Nòte

1. O “ëd sò tròno”.
2. 132:6-10 cfr. 2 Crònache 6:41-42.
3. Cfr. 2 Samuel 7:12-16; 1 Crònache 7:11-14; Salm 89:3-4; At 2:30.
4. Cfr. 1 Rè 11:36.
5. O “an soa front a bërlus un diadema”.