2 Samuel

7

Nosgnor a stabiliss n'aleansa con David

¹A l'é rivaie che cand che rè David a l'avìa sistemasse 'n sò palass, anté che Nosgnor a l'avìa conceduje n'arlass^[1] da tùit ij nemis ch'a l'anvironavo, ²ël rè a dis al profeta Natan: "Varda, mi i vivo 'nt un palass ëd séder, antant che l'Èrca 'd Dé a stà sota na tenda". ³Natan a rispond al rè: "Và e fà tut lòn che tò cheur at dis, përché 'l Signor a l'é con ti". ⁴Col' istessa neuit Nosgnor a l'ha dit a Natan: ⁵"Và e dì a mè servitor David: 'Sossì a l'é lòn ch'a dis ël Signor: 'Avrìes-to da fabriché na ca përchè i jë staga 'ndrinta? ⁶I son pa ëstàit ant na ca dal temp ch'i l'hai tirà fòra j'Israelita da l'Egit fin-a adess. Al contrari, i l'hai viagià con lor e i son ëstàit sota na tenda. ⁷Tute vire ch'im bogiava an tra j'Israelita, i l'hai mai dit a qualsëssia cap ch'i l'avìa stabilì com un bërgé për mè pòpol Israel: 'Përchè i l'eve pa fabricame 'n palass 'd séder'?'. ⁸Ore, donca dì a mè servitor David: "Sossì a l'é lòn ch'a dis ël Signor Dé ëd l'Univers: i l'hai pijate dai pasturagi, dal pasturé dë strop, përché ti 't fusse 'l bërgé 'd mè pòpol Israel. ⁹I son ëstàit con ti daspërtut andoa ti 't andasìe e i l'hai batù tùit ij tò nemis dë 'dnans a ti. Adess it rendrai famos tanme a lo son ij grand ëd la Tèra. ¹⁰I procurerai na patria për mè pòpol Israel, a saran piantà 'nt un leu sicur andoa che mai a nê saran dësreisà. A saran pa pì crasà dai violent coma ch'a l'é rivaje al prinsipi ¹¹e durant ël temp ch'i l'avìa stabilì 'd giùdes për goerné Israel, mè pòpol. Al contrari, 'v darai l'arlass da tùit ij vòst nemis. Ëd pì, ël Signor a fortiss che chiel midem at ëstabilirà na casà, na dinastìa 'd rè. ¹²Cand ch'a vnirà për ti 'l temp ëd meuire e ti 't saras sotrà con ij tò antich^[2], i butrai an tò leugh un dij tò dissendent, un dij tò fieuj e i rendrai fòrt sò regn. ¹³A sarà chiel ch'a farà fabriché na ca dedicà a mè nòm e i rendrai stàbil soa dinastìa. ¹⁴I sarai për chiel tanme 'n pare e chiel a sarà për mi tanme 'n fieul^[3]. Cand ch'a farà lòn ch'a l'é mal, i lo coregerai e lo dissiplinerai pròpi coma ch'a fà 'n pare con sò fieul. ¹⁵Contut, mai i-j gavrai mè favor coma ch'i l'hai gavalo a Saul, ch'i l'hai lassà fòra dal leu che ti 't òcupe adess. ¹⁶Toa casà e tò regn a staran dë 'dnans a mi për sèmper, tò tròno a sarà sicur për sèmper".

¹⁷Sossì a l'é lòn che Natan a l'ha dit a David cand ch'a l'avìa daje sta comunicassion profética.

David a prega Nosgnor

¹⁸Ël rè David a l'é intrà, a l'é setasse dë 'dnans a Nosgnor, e a l'ha dit: "Chi son e còsa a l'é la mia famija che ti 't l'àbie portame a sta mira-sì? ¹⁹E ti 't l'has pa fërmate là, Signor Dé! Ti 't l'has ëdcò parlà rësguard ëd l'avnì dla famija 'd tò servitor. Trates-to parèj ëdcò l'àutra gent, Signor Dé? ²⁰Còs ch'a podria David dite 'd pì? Ti 't l'has dàit a tò servitor na considerassion special, Signor Dé! ²¹A càusa 'd toe promësse e conforma a tò vorèj ti 't l'has fàit tute ste còse grande e 't l'has faje conòsse a tò servitor. ²²Ti 't ses pròpi grand, sovran Signor! A-i é gnun ch'a sia coma ti. I l'oma gnanca mai sentù ch'a-i sia n'àutr Dé ch'a sia coma ti! ²³Cola ch’a podrìa mai esse n’àutra nassion an sla Tèra coma tò pòpol Israel? Che d’àutra nassion, Dé, l'has-to riscatà da la s-ciavensa për fela dventé tò pòpol midèm? Ti 't ses fate na fama cand che ti 't l'has dësangagià tò pòpol da l'Egit. ti 't l'has fàit ëd miràcoj grandios e ti 't l'has taparà via le nassion e ij dé ch'a të stasìo tra ij pé.

²⁴Dël pòpol d'Israel, ti 't l'has fane Toa gent për sèmper, e ti, Nosgnor, it ses dventà sò Dé. ²⁵Ore, donca, Nosgnor Dé, manten për sempe lòn ch'it l'has promëttù a tò servitor e a soa casà: compìss toa promëssa! ²⁶Cand ch'a la gent a dirà: "Ël Signor ëd l'Univers a l'é 'l Dé d'Israel", a 'rconosserà la grandëssa eterna 'd tò Nòm. La casà 'd tò servitor David as mantenrà fërma dë 'dnans a ti, ²⁷përchè ti, Signor ëd l'Univers, Dé d'Israel, it l'has arvelà a tò servitor: ‘It butrai 'n pé na dinastìa’. A l'é për lòn che tò servitor a l'ha avù 'l coragi d'adressete costa preghiera. ²⁸Ti, Nosgnor Dé, it ses Dé për dabon. Toe paròle a son vrità e ti 't l'has promëttù ch'it daras ëste còse bon-e a tò servitor. ²⁹Ora compiàste ‘d benedì la casà 'd tò servitor, parèj ch'a peussa seguité për sèmper dë 'dnans a ti, përchè ti 't l'has parlà e cand ch'it acòrde na benedission a tò servitor, Signor sovran, a l'é na benedission eterna”.

Nòte

↑ O: "conceduje l'arpòs".
↑ "Cand ij tò di a saran a la fin e ti 't cogeras con ij tò pare".
↑ Cfr. 2 Corint 6:18; Ebreo 1:5.

[1] O: "conceduje l'arpòs".

[2] "Cand ij tò di a saran a la fin e ti 't cogeras con ij tò pare".

[3] Cfr. 2 Corint 6:18; Ebreo 1:5.

[1]

[2]

[3]