La Bibia piemontèisa
Ij lìber dle Crònache

1 Crònache

La Bìbia piemontèisa - 1 Crònache 07

7

Dissendent d’Issacar

¹Fieuj d'Issacar: Tola, Puah, Jasob e Simron, quatr an tut. ²Fieuj ëd Tola: Usi, Refaia, Jeriel, Jacmai, Jibsam e Samuel. Lor a l'ero cap ëd soe famije, tuti d’òm vajant. Ant ël temp ëd David a-i j'ero vintedoi milasessent guerié, censì ant le liste ëd soe generassion. ³Fieuj d'Osi: Israchia, pare 'd Micael, Abdìa, Gioel, Gesia. Tùit e sinch a j'ero 'd cap. ⁴Lor a l'avio ansema, conform a soe generassion e seguitand le casà dij sò antich, trentases mila òm motobin fòrt, faità a la guera, përch'a l'avio vàire fomne e fieuj. ⁵Sò frej, compreise tute le famije d'Issacar, d’òm vajant, a formavo un total d'otante-sèt mila òm, anregistrà dël temp ëd rè David.

Dissendent ëd Beniamin

⁶Fieuj ëd Beniamin: Bela, Becher e Jediael, tre an tut. ⁷Ij fieuj ëd Bela a son ëstait sinch: Esbon, Osi, Osiel, Jerimòt e Iri: tuti cap ëd famije e òm vajant, anregistrà ant le genealogìe, dël nùmer ëd vint e doi mila trenta-quatr. ⁸Ij fieuj ëd Becher a l'ero: Zamira, Joas, Elieser, Elioenai, Omri, Jeremòt, Abija, Anatòt e Alemat. Tuti sti-sì a son ëstait ij fieuj ëd Becher. ⁹Ël censiment, conform a soe famije da cap ëd le casà dj'antich a l'é stait dël total dël nùmer ëd vintmiladosent: tuti òm pì che vajant an guera. ¹⁰Fieul ëd Jediael: Balan. Fieuj ëd Balan: Jeus, Beniamin, Aod, Canan, Zetan,Tarsis e Achisar: ¹¹tuti coj-là fieuj ëd Jediael, cap ëd le casà dij sò antich, òm fòrt e vajant, dissètmila e dosent an condission ëd porté d'arme e d’andé an guera. ¹²Sufam e Ufam, fieuj d'Ir; e Cussim fieul ëd n'àutr. ¹³Fieuj ëd Neftali: Jasiel, Guni, Jeser e Salum, fieuj dla concubin-a Bila.

Dissendensa dl’àutra metà dla tribù 'd Manasse

¹⁴Ij fieuj ëd Manasse, avù da la concubin-a^[1] aramèa: Esriel, Machir, pare 'd Galad. ¹⁵Galad a l'ha peui pijàit na sposa, ciamà Maca. Selofad a l'é stait lë scond fieul ëd Manasse. Chiel a l'ha avù mach ëd fije. ¹⁶Maca, fomna 'd Galad, a l'ha avù ‘n fieul, ch’a l'ha ciamalo Peres. Sò frel as ciamava Seres, e ij fieuj ëd Seres a son ëstait Ulam e Rechem.

¹⁷Ulam a l'é stait pare'd Badan. Costi-sì a son ij fieuj ëd Galad fieul ëd Machir, fieul ëd Manasse. ¹⁸Soa seur Amolechet [ch’a veul dì "regin-a"] a l'ha partorì Isod, Abieser e Macla.

¹⁹Ij fieuj ëd Semida a son ëstait Achian, Sichem, Lichi e Aniam.

Ij dissendent d'Efraim

²⁰Fieuj d'Efraim: Sutelach, pare 'd Bered, pare 'd Tacat, pare d'Elada pare 'd Tacat, ²¹pare'd Zabad. Fieuj ëd Sutelach: Eser e Elead, ch'a son ëstait massà da j'òm ëd Gath, gent dël pais, përchè ciapà a marodé sò cabial. ²²Efraim,sò pare a l'avìa fane un deul për vaire e ij sò frej a l'ero vnùit a pasielo. ²³Chiel peui, a l'ha unisse torna a soa fomna, ch'a l'ha concepì e partorije un fieul, ch’a l'ha ciamalo Beria, “për la dësgrassia”, dal moment che ël maleur a l'era stait a soa ca. ²⁴Fija 'd Beria a l'é staita Sera: chila a l'ha fait fondé Betoron dë dzora e 'd sota e dcò Osensera. ²⁵A son dcò stait fieuj d'Efraim: Refach, pare 'd Resef, pare 'd Telach, pare 'd Tacan, ²⁶ch'a l'ha generà Ladan, pare d'Amiud, pare d'Elisama, ²⁷ch'a l'é peui naje Nun pare 'd Giosuè.

²⁸La proprietà e le ca tocaje an sòrt a son staite Betel, e le sità ch'a në dipendio, a levant Naran, a ponent Gueser, e Sichem con le tère 'd sò teritòri, fin-a a Aia, con soe dipendense. ²⁹Contut ij fieuj ëd Manasse a son stait padron dcò ëd Betsan, Tanach, Meghiddo e Dor, con tute soe dipendense. Tuti costi-sì a son stait ij leu andova ch’ a l'han vivù ij fieuj ëd Giusèp, fieul d'Israel.

Genealogia d'Aser

³⁰Fieuj d'Aser: Imna, Isva, Isvi, Beria e Serach soa seure. ³¹Fieuj ëd Beria: Eber, Malchiel ch'a l'era stait pare 'd Birsait. ³²Eber a l'é stait pare 'd Jaflet, Somer, Otam e Sua, seure ëd lor. ³³Fieuj ëd Jaflet: Pasach, Bimal e Asvat: costi a l'ero stait ij fieuj 'd Jaflet. ³⁴Fieuj 'd Somer: Achi, Roaga, Jecuba e Aram. ³⁵Fieuj d'Otam [Helem], sò frel: Sofa, Imna, Seles e Amal. ³⁶Fieuj 'd Sofa: Sua, Arnefer, Sual, Beri, Imra, ³⁷Beser, Od, Sama, Silsa, Ieter e Bera. ³⁸Fieuj 'd Ieter: Jefone, Pispa e Ara. ³⁹Fieuj d'Ola: Arach, Caniel e Resia. ⁴⁰Tuti costi-sì a son ëstait dissendent d'Aser, cap ëd famije, òm sernù, guerié coragios e bon dirigent, anregistrà ant ël nùmer censì 'd vintessesmila òm për servissi 'd guera.

Nòte

↑ Ch'as vëdda la spiegassion ëd concubin-a ant la nòta ch'a-i è an 1:32.

[1] Ch'as vëdda la spiegassion ëd concubin-a ant la nòta ch'a-i è an 1:32.

[1]