Osea[modifiché]

12[modifiché]

Angann e busiardarìa d’Israel[modifiché]

¹Nosgnor a dis: “Coj d’Efraim a l’han ambrojame con ëd busiardarìe e coj d'Israel a l’han anganame con la fràuda. Giuda a s'arvira contra 'd Nosgnor, ch’a l’é tut sant. ²Efraim as alimenta 'd vent; tut ël di a-j va dré al vent d'orient; a moltìplica busiardarìe e violense; a fan d'aleanse con l'Assiria e as pòrto via l'euli an Egit. ³Nosgnor a rusa con Giuda e a-j ciama cont a Giacòb për soa condòta, a-j farà paghé për ël mal ch’a l’ha fàit.

⁴Chiel già da la fàuda dla mare a l'ha piaje 'l pòst a sò frel e da grand a l'ha lotà con Nosgnor^[1]. ⁵A l'ha lotà con n'àngel e a l'ha vagnà; a l’ha suplicalo e a l’ha otnune sò favor. Nosgnor a l’é andàit a trovelo a Betel^[2] e ambelelà a l'ha parlà a nojàutri: ⁶“Nosgnor a l’é ‘l Dé dl’Univers. A l’é con ësto nòm-sì ch’i l’oma da 'nvochelo. ⁷Ti, donca, torna a tò Dé, esse fedel e giust, spera sèmper an tò Dé”.

⁸Nosgnor a dis: “Coj ëd Canan a ten-o an man ëd balanse fàusse, a-j pias d’ambrojé. ⁹E coj d’Efraim a diso: “Ël cas a l’é ch’i soma sgnor, i soma fasse na fortun-a, e an tuti nòstri guadagn, gnun a në troverà nì colpa nì pëccà”. ¹⁰Ore, mi, ël Signor, ch’i son vòstr Dé da cand ch’i j’ere an Egit, av farà torna vive sota ‘d tende^[3], com ant ij di dël Rëscontr. ¹¹I l’hai parlà ai profeta, i l’hai acordaje tante vision, e për ël mojen dij profeta im dëspiegherai”.

¹²Se Ghilead a l'é mach përversità, lor a son nen d'àutr che faussità. A Ghilgal a fan ëd sacrifissi ai tòr, për lòn ij sò autar a saran parèj ëd pere an sle preus dij camp^[4]. ¹³Giacòb a scapa ant ël pais dj’Aramé, Israel a l'é servì da na fomna, e për na fomna a goerna jë strop^[5]. ¹⁴Grassie a ‘n profeta Nosgnor a l’ha fàit monté Israel da l'Egit, e për un profeta a l'é stàit goernà! ¹⁵Coj d’Efraim, contut, a l'han ofendù con ameiror sò Signor e a-j rendrà responsàbij dël sangh vërsà, sò Signor a-j camprà an facia sò oltrage.

Nòte[modifiché]

[1] 12:3-4 cfr. Génesi 32:24-26.

[2] Cfr. Génesi 28:10-22.

[3] Cfr. Levitich 23:42-43.

[4] Cfr. Génesi 29:1-20.

[5] Cfr. Surtia 12:50-51.

[1]

[2]

[3]

[4]

[5]