La Bibia piemontèisa/Testament Neuv/Roman/Roman 7

←Roman 6

La Bibia piemontèisa Litra ai Roman

Roman 8→

Litra dl'Apòstol Pàul ai cristian ëd Roma

7

La Bìbia piemontèisa - Roman 07

Liberà dal podèj ëd la Lege

¹Ora, car ij mè frej e seur - i parlo a coj ch’a capisso lòn ch’a sia la Lege - seve nen che la Lege a s’aplica mach a coj ch’a son viv? ²Pr’ esempi, cand che na fomna as marida, la Lege a l’angagia anvers ëd sò marì mach antant che chiel a l’é viv. Ma se ‘l marì a meuir, la Lege dël mariagi a s’aplica pì nen a chila. ³Parèj, se mentre che sò marì a l’é ancora viv, chila as marida con n’àutr òm, chila a comëttrìa n’adulteri. Ma se sò marì a meuir, chila a l’é lìbera da cola Lege e a comëtt nen n’adulteri s’ as marida torna.

⁴Anlora, car ij mè frej e seur, vojàutri i seve stàit liberà dal podèj ëd la Lege cand ch’i seve mòrt con Crist. Adess i seve 'd pertinensa 'd n’àutr, ëd col ch’a l’é arsussità dai mòrt, për ch’i pòrto 'd frut për Nosgnor. ⁵Cand ch’i j’ero sota 'l podèj ëd nòstra natura veja^[1], l’anvìa për lòn ch’a l’é pecà, cissà da la Lege, a l’era cola ch’a determinava nòstra condòta e an fasìa porté 'd frut anvelenà^[2]. ⁶Ora, contut, i soma stàit dësgropà da la Lege, i soma mòrt a lòn ch’an tnisìa përzoné. Ora i podoma serve Nosgnor, nen ant la veja manera dl’ubidiensa a la létera dla Lege, ma 'nt la neuva manera 'd vive 'nt lë Spìrit.

La Lege 'd Nosgnor a arvela nòst pecà

⁷Còsa dirom-ne, donca? Che la Lege a sìa pecà? Ëd gnun-a manera! An efet, a l’é stàita la Lege ch’a l’ha fame conòsse lòn ch’a l’é ‘l pecà. Se la Lege a l’avèissa nen dime: “It l’avras nen anvìa ‘d lòn ch’a l’é dj’àutri”^[3] i l’avrìa nen savù che cola sòrt d’anvìa a l’é falëtta. ⁸Ma ‘l pecà a l’é profitasse 'd cost comandament për fé nasse an mi d’ògni sòrt d’anvìe për lòn ch’a l’é nen consentì! S’a-i fussa gnun-a Lege, ël pecà a l’avrìa nen ël podèj ch’a l’ha^[4]!

⁹A j’era ‘n temp ch’i vivìa sensa comprende la Lege. Cand ch’i l’hai amprendù ‘l comandament^[5] ëd nen avèj d’anvìa për lòn ch’a l’é dj’àutri, pr’ esempi, a l’é fasse sente^[6] an mia vita ël podèj dël pecà, ¹⁰e mi i l’hai conossù lòn ch’a l’é la mòrt. A l’é parèj ch’i l’hai dëscurvì che ij comandament ëd la Lege, ch’a l’avrìo dovù deme vita, a l’han portame, a l’opòst, a la mòrt^[7]. ¹¹Ël pecà a l’é profitasse ‘d coj comandament e a l’ha ambrojame^[8]; a l’ha dovrà ij comandament për feme meuire. ¹²Contut, la Lege a l’é santa, e 'l comandament a l’é sant, giust e bon.

¹³Com a podrìa esse, anlora, che lòn ch’a l’é bon a l’abia fame meuire? A l’é nen propi parèj: a l’é stàit ël pecà ch’a l’é servisse 'd lòn ch’a l’é bon^[9] për fé ch’i fussa condanà a mòrt. Ansì i podoma bin vëdde vàire ch’a sia spaventosa la malissia dël pecà. Ël pecà a dovra ij bon comandament ëd Nosgnor për ij sò proponiment maléfich.

Combate contra 'l pecà

¹⁴Ël problema a sta nen con la Lege, përchè la Lege a l’é spiritual e bon-a. Ël problema, an efet, a l’é che mi i son dë sto mond-sì^[10], vëndù coma në s-ciav al pecà. ¹⁵I capisso nen lòn ch’i faso, da già ch’i faso nen lòn ch’i veuj, ma i faso lòn ch’i l’hai an ghignon^[11]. ¹⁶Ma s’i sai che lòn ch’i faso a l’é sbalià, sossì a fà vëdde ch’i son d’acòrdi che la Lege a l’é bon-a. ¹⁷Anlora a l’é nen mi ch’i agisso parèj, ma a l’é 'l pecà ch’a sta andrinta 'd mi, ¹⁸përchè i sai che an mi, visadì, an mia natura 'd pecà^[12], a-i é bele che gnente ch’a sìa bon. ¹⁹I veuj bin fé lòn ch’a l’é giust ma i son nen bon a felo. I veuj nen fé lòn ch’a l’é sbalià, ma i lo faso l’istess. ²⁰Ma s’i faso lòn ch’i veuj nen fé, a l’é nen pròpi mi ch’a fà lòn ch’a l’é sbalià: a l’é ‘l pecà ch’a sta andrinta ‘d mi ch’a lo fà.

²¹I trovo, donca, sta Lege andrinta 'd mi, che cand ch’i veuj fé ‘l bin, i peuss nen fé d’àutr che ‘l mal. ²²I veulo bin con tut mè cheur a la Lege ëd Nosgnor, ²³Contut, a-i é n’àutra fòrsa^[13] drinta 'd mi ch’a fà guèra contra mìa ment. Sta fòrsa am rend përzoné dël pecà ch’a-i é ancora andrinta ‘d mi. ²⁴Miserabil ch’i son! Chi é-lo ch’am libererà da costa vita dominà dal pecà e da la mòrt^[14]? ²⁵Che Nosgnor a sìa ringrassià! La rispòsta a l’é an Gesù Crist, Nosgnor! Peude-ne adess comprende coma ch’a l’é? A l’é drinta 'd mia ment ch’i veuj ëscoté la Lege 'd Nosgnor, ma për motiv ëd mia natura 'd pecà, i arconòsso d’esse në s-ciav dël pecà^[15].

Nòte

1. O “la carn”.
2. O “ch’a mnavo a la mòrt”.
3. Cfr. Surtìa 20:17; Deuteronòmi 5:21.
4. O “Sensa la lej ël pecà a l’é mòrt”.
5. O “Quand ch’a l’é vnù ‘l comandament”.
6. O “ël pecà a l’é dësvijasse”.
7. O “i son mòrt”.
8. Cfr. Génesi 3:13.
9. O “ël comandament”.
10. O “I son carnal”.
11. Cfr. Galati 5:17.
12. O “carn”.
13. O “n’àutra lej”.
14. O “dal còrp dë sta mòrt”.
15. O “I servo la lej dël pecà”.