La Bibia piemontèisa/Testament Vej/Genesi/Genesi 3

←Genesi 2

La Bibia piemontèisa Genesi

Genesi 4→

Génesi

3

La Bibia piemontèisa - Génesi 3

La tentassion e la Crova

¹Ore, ël serpent^[1] a l'era 'l pì furb ëd tuti j'animaj servaj^[2] che Nosgnor Dé a l'avìa fàit. A-j dis a la fomna: "É-lo vera che Nosgnor a l'ha dit: 'Vojàutri i peule pa mangé ij frut ëd j'erbo^[3] dël vërzé?'".  ²La fomna a rispond al serpent: "Sicur ch’i podoma mangé dij frut ëd j'erbo dël vërzé. ³A l'é mach al rësguard dël frut ëd l'erbo ch'a l'é 'n mes al vërzé che Nosgnor a l'ha dit: 'Vojàutri i l’eve nen da mangene e gnanca da tochene, dësnò i meuire". ⁴Ël serpent a dis a la fomna: "A l'é pa vera ch'i meuire. ⁵A l'é mach che Nosgnor a sa bin che s'i në mange ij vòsti euj as duverterìo e i sarìe tanme Dé^[4] ch'a conòss ël bin e 'l mal".

⁶Anlora, quand che la fomna a l'ha vëddù che 'l frut ëd l'erbo a l'era bon da mangé e ch'a l'era desideràbil për podèj dventé savi, chila a l'ha ciapane e a l'ha mangiane. Chila a l'ha dàjne 'dcò a sò marì ch'a l'era con chila e chiel a l'ha ‘dcò mangiane. ⁷A l'é parèj che j'euj dl'un e dl'àutra a son duvertasse, ancorzend-se d'esse patanù. Anlora a l'han cusì 'nsema ‘d feuje 'd fié e a son fasse dle cuverture^[5].

Ij giudissi 'd Nosgnor apress ëd la Crova

⁸Anlora l'òm e soa fomna a l'han sentù la vos^[6] ëd Nosgnor Dé ch'a 'rsonava 'nt ël vërzé a l'ambrun-a seiran-a^[7] e a son ëstermasse da Nosgnor antrames j'erbo dël vërzé. ⁹Ma 'l Signor Dé a l'ha ciamà l'òm e a l'ha dije: "Andova ses-to, Adam?^[8]"  ¹⁰e chiel a l'ha risponduje: "I l'hai sentù toa vos ant ël vërzé e i l'hai avune tëmma për mia nudità e i son ëstërmame". ¹¹E Nosgnor Dé a l'ha dit: "Chi é-lo ch'a l'ha dite ch'it ses patanù? L'has-to mangià da l'erbo ch'i l'hai comandate 'd nen mangene?". ¹²L'òm a l'ha dit: "La fomna ch'it l'has butame 'nsem, a l'é chila ch'a l'ha dame 'l frut ëd col erbo e mi i l'hai mangiane". ¹³Anlora Nosgnor Dé a l'ha dit a la fomna: "Përché l'has-to fàit lòn?^[9]". La fomna a l'ha rispondù: "Ël serpent a l'ha 'mbrojame^[10] e i l'hai mangiane".

¹⁴Nosgnor Dé a l'ha dit al serpent: "Përch'it l'has fàit sòn, it saras sogetà, antrames a tute le bestie sarvaje e a tute le creature vive dij camp, a na maledission: ti it andras a rabaston e 't mangëras la póer ëd la tèra tuit ij di 'd toa vita. ¹⁵E i butraj 'd nimicissia^[11] antra ti e la fomna, an tra toa dissendensa e soa dissendensa; soa dissendensa at crasrà la testa e ti 't feriras sò garèt". ¹⁶A la fomna a l'ha dit: "It farai chërse ij dolor ëd toa grossëssa e 't l'avras dij cit con dolor; it l'avras l'anvìa d'anviare-te 'nvers tò marì, ma a sarà chiel a dominete^[12].  ¹⁷Ma a Adam a l'ha dit: "Përch'it l'has ëscotà toa fomna e 't l'has mangià 'l frut dl'erbo ch'i l'avìa comandate 'd nen mangene, për càusa toa la tèra a sarà sogetà a na maledission; ti 't na mangëras ij frut con motobin ëd pen-a për tuit ij di 'd toa vita. ¹⁸At porterà dë spin-e e ‘d ronze, e ti't mangëras ël forment^[13] dij camp^[14]. ¹⁹Con ël sudor ëd la front it mangëras tò pan^[15] fin-a a tant ch' it artornëras ant la tèra d'anté ch'it ses stàit ciapà, dàit che ti't ses póer e it artornëras ant la póer".

²⁰L'òm a l'ha ciamà soa fomna Eva^[16] përchè chila a l'é stàita la mare 'd tùit ij vivent. ²¹Peui Nosgnor a l'ha fàit për Adam e për soa fomna ‘d vestimente ‘d coram^[17] e a l'ha arvestìe. ²²E Nosgnor Dé a l'ha dit: "Ora che l'òm a l'é dventà tanme un ëd nojàutri e ch'a cognòss ël bin e 'l mal, a venta nen ch'a sìa përmetuje dë slonghé la man për ciapé 'dcò 'l frut ëd l'erbo dla vita^[18] e ch'a viva për sèmper. ²³A l'é parèj che Nosgnor Dé a l'ha campalo fòra dal vërzé dl'Eden për ch'a coltivèissa la tèra d'anté a l'era stàit ciapà. ²⁴ Quand ch'a l'ha campà fòra l'òm, Nosgnor, a l'ha posissionà 'd cherubin^[19] a levant dël vërzé për fé la vardia e ch'a svantavo na spa 'd feu për guerné 'l senté dl'erbo dla vita.

Nòte

1. Cfr. Arvelassion 12:9; 20:2.
2. O "j'animaj dij camp".
3. O "da tùit j'erbo dël vërzé".
4. As podrìa 'dcò volté: "tanme d'esse divin", o "tanme coj dla cort dël cel", ma ant ël contest inmedià אֱלֹהִים (elohim), bele se plural, as arferiss sèmper al Dé ùnich.
5. O  "a son quatasse".
6. O "vos tronanta".
7. O "e a l'era na sèira ventosa".
8. O "Perché it l'has-to stërmate?".
9. O "Còsa 't l'has-to fàit?".
10. O "Ancantame", "dëstradame". Cfr.2 Corint 11:3; 1 Timòt 2:14.
11. O "a-i sarà 'd guera". Cfr. Arvelassion 12:17.
12. lj pecà a càusa na lòta 'd podèj tra l'òm e la fomna, ma a-i sarà n'arlass an Crist: l'òm e la fomna riscatà a 'ncomenseran a vive an armonìa (cfr. Efesin 5:18-32).
13. O "l'erba".
14. Cfr. Ebréo 6:8.
15. O "ij tò aliment".
16. A la létera: "Cola ch'a dà la vita".
17. O "ëd pel".
18. Cfr. Arvelassion 22:14.
19. O "dj'àngej".