La Bibia piemontèisa/Testament Vej/Salm/Salm 83
83. Mè Dé, stà nen chiet
[modifiché]- Ël Salmista a ciama Nosgnor ëd liberé Israel da j’atach dij sò nemis, le nassion pagan-e ch’a-jë stan dantorn. Arciamand a la ment coma Nosgnor a l’ha butà ij sò nemis an derota ant ij dì ‘d Débora e ‘d Gedeon, a prega che ste nassion nemise a sio umilià.
1Càntich. Salm dl’archeuita d’Asaf. Mè Dé, stà nen chiet sensa dì na paròla; tas pa. 2Vëddes-to nen che brut ciadèl ch’a fan ij tò nemis? Vëddes-to pa l’arogansa dij tò nemis ch’a àusso la testa? 3A monto ‘d tràpole contra ‘d tò pòpol, a complòto contra ij tò, ch’a son tò tèsor. 4A diso: ”Domse da fé, ramassoma via la nassion d’Israel da la fassa dla tèra, che fin-a sò nòm a sia dësmentià!” 5Vera, a l’é stàita soa decision concòrdi ‘d lor: contra 'd ti a l’han aleasse e a l’han signà ‘n tratà, 6sti Edomita e Ismaelita, Moabita e Agrita, 7Ghebalita, Amonita e Amalechita, gent dla Filistìa e da Tir. 8A lor a l’é giontassje fin-a l’Assiria, fianch a fianch dij fieuj ëd Lòt. [Antërludi].
9Fà con lor lòn ch’it l’has fàit a Madian[1] e a Sisera, com a Iabin ant ël torent dël Chison[2]. 10Tùit a l’ero stàit butà an derota a En-dor, e ij sò cadàver ëd lor a son dësfasse e a son dventà tanme ‘d drugia pr’ ël teren. 11Trata ij sò nòbij coma ch’it l’has tratà a l'Horeb e a Zeb[3]. Che tùit ij sò prinsi a meuiro tanme Sheba e Salmon-a[4], 12përchè a l’ero lor ch’a disìo: ”Ciapomse për nojàutri le pasture dël Signor. 13Mè Dé, faje dventé tanme ‘n vòrti ‘d card, coma dla paja al vent, 14coma ’n feu ch’a brusa la foresta, come na fiama ch’a sëcca le montagne. 15Daje dapress con toa tempesta e sbarùvje con tò uragan. 16Nosgnor! Quata sò moro ‘d lor con lë dzonor fin-a ch’as sogeto a tò Nòm. 17Ch’a sio dësconcertà tant da vërgogness-ne për sèmper. 18Parèj a amprendran che mach ti ‘t ses ciamà ‘l Signor, che mach ti ‘t ses ël Pì-Àut dzora ‘d tuta la tèra.
Nòte
[modifiché]- ↑ Cfr. Giudes 7:1-23.
- ↑ Cfr. Giudes 4:6-22.
- ↑ Cfr. Giudes 7:25.
- ↑ Cfr. Giudes 8:12.