La Bibia piemontèisa/Testament Vej/Salm/Salm 82
Salm[modifiché]
82. A l’é Nosgnor ch’a pressied la cort dël cel[modifiché]
- Ël Salmista a figura Nosgnor ch’a stà a la presidensa ëd “la ciambreja d’El”, andoa ch’a acusa “ij dé” d’avèj mancà ‘d mandé anans la giustissia an sla tèra. Nosgnor a pronunsia soa sentensa contra ‘d lor e a-j nunsia ch’i meuireran tanme tùit ij mortaj. Apress d’esse stàit testimòni ëd costa sen-a, ël Salmista a 'nvoca Nosgnor ch’a stabilissa sò giust domini an sla tèra.
1Un salm d’Asaf. A l’é Nosgnor ch’a pressied la cort dël cel; a l’é chiel ch’a pronunsia sò giudissi an mes dij dio[1] e a-j rimprocia: 2“Fin-a a quand i giudicreve contra giustissia për dé ‘d protession a ‘d colpèivol malfasent? [Intërludi]
3Rende, pitòst, giustissia ai pòver e a j’orfanin; sostnì ij dirit ëd coj ch’a son acablà e ch’a l’han nen. 4Liberé ij pòver ch’a-i é gnun ch’a-j giuta, salveje da le man ëd la gent maléfica. 5Sti giudes, contut, a san nen: a son na massa d’ignorant! A van an gir ant lë scur, damentre che tut ël mond a l’é socrolà fin-a da soe fondassion. 6Av pias ch’av diso: “Vojàutri i seve ‘d divinità[2]; i seve ij fieuj dël Pì-Àut”. 7Contut i meuirereve tanme tuti j’àutri mortaj, i tombreve giù coma ch’a son drocà tuti j’àutri governant”. 8Nosgnor! Àlvte e giùdica la tèra, përchè tùit ij pòpoj a son ij tò.
Nòte[modifiché]
- ↑ Cost Salm a paress d’esse na polémica contra la religion cananita. Ij Cananita a chërdìo ch’a-i fussa an cel na cort ëd divinità pressiedùa dal dé El. A l’é Nosgnor, e pa nen El, ch’a pressied cola cort e a l’é chiel ch’a giùdica cole divinità, ch’a son ëd malfasent, e a-j condan-a.
- ↑ O "ëd dio", cfr. Gioann 10:34.