La Bibia piemontèisa/Testament Vej/Salm/Salm 84
84. Coma ch'a l'é bel ël leugh andoa ch'it vive[modifiché]
- Ël Salmista a manifesta sò desideri d'esse a la presensa 'd Nosgnor ant ël Templi 'd Gerusalem, përchè Nosgnor a l'é col ch'a guerna Sò pòpol.
1Për ël diretor ëd la mùsica, scond la melodìa dita "Haguitit", scrivù dai Coraìta. Salm. Coma ch'a l'é bel ël leugh andoa ch'it vive, Nosgnor ëd l'univers! 2Coma ch'i l'hai anvìa d'intré 'nt le cort ëd la ca 'd Nosgnor! Con ël cheur e con tut mè còrp i crijo 'd gòj anvers al Dé ch'a viv.
3Fin-a j'osej a-i trovo na ca, la róndola a-i fà sò nì andoa guerné soa fiolansa, aranda ij tò autar, Nosgnor ëd l'univers, mè rè e mè Dé. 4A son beà coj ch'a vivo an toa ca e ch'a-i canto 'd làude tùit ij di! [Pàusa]
5A son beà coj ch'a treuvo an ti la fòrsa ch'a-j manca e ch'a l'han anvìa 'd përcore le stra ch'a pòrto a tò templi. 6Quand ch'a passo për la val ëd Baca[1] Nosgnor a-j forniss ëd na sorgiss për bèive. La pieuva d'otogn a j'arvest ëd benedission. 7A seguitran a chërse fòrt e minca un ëd lor a comparirà dë 'dnans a Nosgnor a Gerusalem.
8Nosgnor, Dé dl'univers, scota mia sùplica; sent lòn ch'i diso, òh Dé 'd Giacòb! [Pàusa]
9Nosgnor! Varda con favor ël rè, nòst ëscu! Fissa tò sguard an sla facia 'd col ch'it l'has consacrà[2].
10Un di sol passà 'nt le cort dël templi, a val ëd pì che sent di passà da n'àutra part. I vorerìa pitòst ësté mach tut daspërmi dë 'dnans a la pòrta dla cà 'd mè Dé che sté 'd ca ansema a 'd gent ch'a l'ha gnun-a tëmma 'd Nosgnor.
11Nosgnor Dé a l'é tanme 'l sol ch'a 'nlumina e në scu ch'a dà 'd protession. A l'é Nosgnor ch'a dà la grassia e la glòria. Chiel a l'é sèmper dispòst a fé 'd bin a coj ch'a fan lòn ch'a l'é giust. 12Nosgnor ëd l'univers, a son beà coj ch'a l'han fiusa an ti.