La Bibia piemontèisa/Testament Vej/Salm/Salm 85

←Salm 84

La Bibia piemontèisa Ij Salm

Salm 86→

Ij Salm

85. Nosgnor! Ti 't l'has vërsà con bondosità toe benedission su toa tèra

Ël pòpol ëd Nosgnor as arcòrda coma che Chiel a l'ha përdonaje ij pecà 'nt ël passà, a-j ciama che adess a lo ristabilissa 'nt sò favor e a së speta 'd neuve benedission.

¹Për ël magìster dla mùsica. Scrivù dai Coraita, un salm. Nosgnor! Ti 't l'has vërsà con bondosità toe benedission^[1] su toa tèra; it l'has fàit torna sté bin Giacòb. ²It l'has përdonà le colpe 'd Tò pòpol, it l'has ëstendù 'n vel^[2] dzura tùit ij sò pecà. [Antërludi]

³It l'has fàit chité^[3] tuta toa furia; it l'has tratnù toa giusta rabia. ⁴Adess variss-ne^[4], Nosgnor, nòstr Salvator. Buta da banda toa rabia ancora na vira. ⁵Saras-to sèmper anrabià con nojàutri? Seguiteras-to a esse 'nrabià 'dcò con le generassion ch'a vniran? ⁶An arnovras-to nen la vita 'ncora na vòlta, parèj che tò pòpol a peussa trové 'n ti soa gòj? ⁷Fane vëdde tò amor fedel. Nosgnor! Acòrd-ne la salvëssa!

⁸I scotrai lòn che Nosgnor a l'ha da dì, përché Nosgnor a farà la pas con sò pòpol fedel, ma falo nen artorné a soa folairà. ⁹A l'é sicur che la salvëssa a l'é davzin-a a coj ch'a l'han ëd rispet për Nosgnor, parèj che nòstra tèra a sarà 'mpinìa 'd soa glòria. ¹⁰Amor sincer e fidelità a son ancontrasse; la liberassion e la pas a son ëvnusse 'ncontra a l'han dasse 'n basin. ¹¹La fidelità a chërs da la tèra e la liberassion a varda dal cel.

¹²Èh, Nosgnor a vërserà con abondansa Soe benedission e nòstra tèra a darà sò mësson. ¹³La liberassion a marcia dë 'dnans a Chiel e a-j pronta la stra.

Nòte

1. O "Ij tò favor".
2. O "stërmà".
3. O "it l'has artirà".
4. O "ristabiliss-ne".