Michea

6

Ël Signor a veul giustissia, pa 'd sirimònie

¹Scoté, donca, lòn che Nosgnor a dis: "Doma! Ven an giudissi dë 'dnans ëd le montagne, e che le colin-e a peusso sente toa vos! ²Scoté, montagne, ël giudissi 'd Nosgnor, sporzì l'orija, fondamente dla tèra, përchè Nosgnor a fà 'n process a soa gent, un giudissi contra d'Israel:

³Car ël mè pòpol, còs l'has-to fàit? An còs i l'hai contristate? Rëspondme. ⁴Përchè mi i l'hai fate montè dal pais d'Egit^[1], i l'hai dësangagiate da la ca d'ës-ciavensa; i l'hai mnate dë 'dnans Mosè, Aron^[2] e Miriam^[3]. ⁵Cara la mia gent, arcòrd-te 'd col ch'a l'era 'l progèt ëd Balach^[4], re 'd Moab, ëd lòn ch'a l'ha rësponduje Balam, fieul ëd Beor. Arcòrdte 'd Sitim e Galgala^[5], përch' it peusse conòsse j'euvre giuste 'd Nosgnor".

⁶Con còsa 'm presenterai dë 'dnans a Nosgnor? Com im prostërnerai dë 'dnans al Pì-Àut. Im presentrai con l'olocàust, con ëd bocin ëd n'ann? ⁷Agradirà-lo mila moton e torent ëd buve d'euli? Ventrà-lo che jë smon-a mè prim nassù coma pressi 'd mè delit, ël frut ëd mie ventraje për ij mè pecà". ⁸I l'hai fate conòsse, òm, lòn ch'a l'é 'l bin, e lòn che Nosgnor a veul da ti: nen d'àutr che pratiché la giustissia, ëd vorèi-je bin a la misericòrdia, e 'd marcé con umiltà con tò Dé".

⁹A l'é la vos ëd Nosgnor! Chiel a crija a la sità: "Scoté, tribù e ciambreje dla sità! ¹⁰Ant la ca dël përvers a-i é 'ncora 'd tesòr ch'a son avusse con la frauda e na mzura sfaussà. Forse che mi i peuss soporté na mzura fàussa e na min-a carenta? ¹¹Forse che mi i peuss consideré pur col ch'a deuvra 'd balanse sfaussà, o na borsa 'd pèis con ël truch? ¹²Ij sò rich a son pien ëd violensa e ij sò abitant a l'han pì car la busiardarìa! ¹³Dcò mi istèss i l'hai ancaminame a frapate, a vastete pr' ij tò pecà. ¹⁴Ti 't mangeras ma sensa gavete la fam; ti 't butras da part, ma it podras salvé pa; e s' it podras salvé cheicòsa mi i lo lasrai an podèj dla spa. ¹⁵Ti 't sëmneras, ma it podras pa fé l'amson; it presseras j'ulive, ma it podras pa ónzte d'euli; ël most, ma it podras pa bèive 'd vin. ¹⁶Ti 't goerne le lege d'Omri^[6], tute le pràtiche 'd la ca d'Acab^[7]; ti 't pòrte conform ai sò prinsìpi, për che mi i fasa 'd ti n'oget ëd stupor e i chita ij tò abitant për soe svergne: e ch'i pòrte l'onta dle gent.

Nòte

[1] Cfr. Surtìa 12:50-51.

[2] Cfr. Surtìa 4:10-16.

[3] Cfr. Surtìa 15:20.

[4] Cfr. Numer 22:2-24:25.

[5] Cfr. Giosué 3:1-4:19.

[6] Cfr. 1 Rè 16:23-38.

[7] Cfr. 1 Rè 16:29-34; 21:25-26.

[1]

[2]

[3]

[4]

[5]

[6]

[7]