Michea

1

Introdussion

¹Paròla 'd Nosgnor ch'a l'é stàita adressà a Michea 'd Moreset, al temp ëd Iotam^[1], d'Acas^[2] e d'Esechia^[3], rè 'd Giuda. Soe vision a riguardo Samaria e Gerusalem.

Ël Giudess a l'é 'n camin ch'a riva

²"Scoté, tute vojàutre le gent! Tèra, fà atension, con tut lòn ch’a t'ampiniss! Nosgnor a l'é 'n camin ëd testimonié contra 'd voi, ël Signor, da Sò santuari dël cel! ³Nosgnor a seurt da sò palass: chiel a cala, chiel a marcia dzora dj’auture dla tèra. ⁴Le montagne a së slinguo sota ai sò pass, le valade a fondo parèj ëd la sira dë 'dnans dël feu, parèj dl'eva spantià an sle pendiss. ⁵Tut sòn a lo pròvoca la colpa ‘d Giacòb, ij pëccà dla nassion d’Israel. Col ch'a l'é 'l delit ëd Giacòb? É-lo pa Samaria? Col ch'a l'é 'l sènter dij pecà dla ca 'd Giuda? É-lo pa Gerusalem? ⁶Nosgnor a dis: “Mi i farai 'd Samaria na ruin-a ant la campagna, na tèra da vigne. I farai rotolé soe pere ant la comba, i dëscoaterai soe fondamenta. ⁷Tùit ij sò ìdoj a saran fàit a tòch, tùit ij guadagn ch’a në tira a saran campà ant ël feu. Ëd tute cole statue i në farai un baron ëd mnis, përchè ch’a l’è ‘d metal ch’a ven da salari ‘d meretris e lòn a torneran a esse.

Plenta për le sità ‘d Giuda

⁸Për sòn, i farai 'd plente e i crierai, im n'andrai dëscàuss e patanù, i ucherai com a fan jë siacaj, i gëmmerai coma jë struss. ⁹Përché a-i é pa na cura për le piaghe dla sità; a son rivà fin-a a Giuda, a së spantio fin-a a la pòrta 'd mè pòpol, fin-a a Gerusalem. ¹⁰A Gath, nunsiejlo nen, an Acri pioré pa! Ant la ca d'Afra, ravioleve ant la poer! ¹¹Son-a dël còrn, popolassion ëd Safir! Patanùa, coatà mach ëd vërgògna, chila a l'é pa surtìa da soa sità, cola ch'a sta an Canan! Bet-Esel a l'é rancà da soe fondassion, dal basament andova ch'a l'é stàita! ¹²La popolassion ëd Maròt a së spetava 'l boneur, nopà 'l maleur a l'é calà da part ëd Nosgnor fin-a a le pòrte 'd Gerusalem. ¹³Taca ij cavaj ai chèr ëd guèra, ti ch'i të staghe a Lachis! Përchè vojàutri, a imitassion dj'anfedeltà d’Israel, ij seve stàit ij prim a fé pëcché la sità ‘d Sion. ¹⁴Dcò ti it l'avras da vërsé na dòta për Moreset-Gat. La ca d'Aczib a sarà n'angann pr' ij rè d'Israel. ¹⁵Vojàutri j’abitant ëd Maresa, un conquistador av atacherà! Ij cap d’Israel a scaperan a Adulam. ¹⁶Ranca ij tò cavèj, toson-je, coma marca ‘d deul, për ij tò fieuj che a fasìo toa gòj! Slarga toa cirià com ël voltor, përchè lor a son esilià lontan da ti!

Nòte

↑ Cfr. 2 Rè 15:32-38; 2 Crònache 25:1-7.
↑ Cfr. 2 Rè 16:1-20: 2 Crònache 28:1-27.
↑ Cfr. 2 Rè 18:1-20:21; 2 Crònache 29:1-32:33.

[1] Cfr. 2 Rè 15:32-38; 2 Crònache 25:1-7.

[2] Cfr. 2 Rè 16:1-20: 2 Crònache 28:1-27.

[3] Cfr. 2 Rè 18:1-20:21; 2 Crònache 29:1-32:33.

[1]

[2]

[3]