La Bibia piemontèisa/Testament Vej/Levitich/Levitich 7

←Levitich 6

La Bibia piemontèisa Levìtich

Levìtich 8→

Levìtich

7

La Bìbia piemontèisa - Levitich 07

Sacrifissi ‘d riparassion

¹Coste-sì a son j’istrussion^[1] pr’ ël sacrifissi ‘d riparassion^[2]. A l’é na còsa santa dël gré pì àut^[3]. ²Che la vìtima smonùa an sacrifissi a sia sgorzà ant ël midem leugh andova ch’a së sgorzo le vìtime smonùe an olocàust. Ël sacerdòt a në farà l’aspersion dël sangh tut d’antorn ëd l’autar. ³Peui a smonrà tute le part grasse dla vìtima: la coa, la grassa ch’a coata le ventraje, ⁴ij doi rognon con tuta la grassa ch’a l’han dëdzora, la grassa dij lomb e ‘l loèt dël fidich, tirà fòra con ij rognon. ⁵Ël sacerdòt a farà brusé tut sòn an sl’autar; a sarà consumà dal feu an onor ëd Nosgnor. Sto-sì a l’é ‘n sacrifissi ‘d riparassion.

⁶Tùit j’òm e ij fiolin ch’a ‘parten-o a le famije sacerdotaj a podran mangé la carn dë sti sacrifissi-sì, tutun a l’avran da mangela ant un leugh sacrà. A l’é na còsa santa dël gré pì àut. ⁷Tant për ël sacrifissi 'd riparassion coma pr’ ël sacrifissi pr’ ël pecà, la lege a l'é la midema: la carn ëd la vítima a l'é për ël sacerdòt ch’a fà ël rit d'espiassion. ⁸Cora che cheidun a smon n’olocàust, la pel ëd la vìtima a sarà pr’ ël sacerdòt. ⁹‘Dcò a sarà pr’ ël sacerdòt ch’a smon-a l’oferta ‘d farin-a, tant s’a l’é cheuita al forn, com s’a l’é preparà ant na pèila o an sla grija^[4]. ¹⁰Tute j’àutre oferte ‘d farin-a, ampapëttà con d’euli o sensa, a saran për tùit ij dissendent d’Aron, sensa distinsion.

Sacrifissi ‘d comunion

¹¹Coste-sì a son j’istrussion pr’ ël sacrifissi ‘d comunion^[5] smonù a Nosgnor. ¹²S’a l’é ‘n sacrifissi d’assion ëd grassie^[6], a smonran, con la vìtima, na gionta ‘d galëtte cheuite sens’ alvà e ampapëttà d’euli, fogasse sens’ alvà onzùe d’euli, e fior ëd farin-a cheuita an forma 'd torta farsìa d'euli. ¹³Con la vìtima dël sacrifissi ‘d comunion smonù an assion ëd grassie, a presenteran, con lòn ch'a l'han fàit cheuse, n'oferta 'd pan con alvà. ¹⁴Da minca un-a ‘d coste oferte diverse, na part a sarà presentà coma 'n tribut dàit a Nosgnor: costi aliment a saran pr’ ël sacerdòt ch’a l’avrà fàit l’aspersion con ël sangh ëd la vìtima oferta an sacrifissi d’ comunion. ¹⁵La carn ëd ël sacrifissi ‘d comunion smonù an assion ëd grassie, as dovrà mangesse ‘l midem dì ch’a vnirà smonùa, sensa lassene për l’andoman. ¹⁶Ma se la vìtima a l’é smonùa an compiment d’un vot o coma n‘oferta volontaria, a sarà ‘dcò mangià ant ël midem dì ch’a vnirà smonùa; ma s’as në vansa, as podrà mangesne ‘l dì dòp. ¹⁷Nompà, lòn ch’a vansa dla carn dël sacrifissi, as la dovrà brusé dël tut. ¹⁸Che, se ‘l ters dì cheidun ancora a mangia ‘d carn ëd sò sacrifissi ‘d comunion, Nosgnor a l’avrà nen piasì ‘d cola oferta ni a la tnirà an bon cont, përchè cola carn a sarìa coma cola ‘d carògne. Se cheidun a la mangia, a l’avrà da porté ‘l pèis ëd soa colpa. ¹⁹Se cola carn a l’avèissa tocà për darmagi cheicòsa d’ampur, as dovrà pa mangene, ma a ventrà brusela. Dla midema manera, mach col ch’a l’é an condission ëd purëssa ritual a podrà mangene. ²⁰Tutun, se cheidun ch’as trova an condission d’ampurità ritual, a mangia la carn d’un sacrifissi ‘d comunion smonù a Nosgnor, col-lì a sarà bandì da sò pòpol.

²¹Chicassìa ch’a l’abia tocà cheicòsa ch'a sia nen pur da la mira ritual, ch’a sìa ‘d n’ordura uman-a o ‘d na chèich bestia o bestiëtta 'mpura, e apress ëd lòn, a mangia ‘d carn d’un sacrifissi ‘d comunion smonù a Nosgnor, chiel-lì a sarà bandì da sò pòpol.

Proibission ëd mangé ‘d grassa o ‘d sangh

²²Nosgnor a l’ha ancora parlaje a Mosè. A l’ha dije: ²³Faje savèj sossì a j’Israelita: ’Mangé gnun-a grassa nì ‘d beu, nì ‘d feja, nì ‘d crava. ²⁴La grassa ‘d na bestia mòrta da sola o fàita a tòch da na bestia ferosa, as podrà contut dovresse për d’àutri usagi, ma i në dovreve mai, ëd gnun-a manera, mangene vojàutri. ²⁵Parèj ëdcò chicassìa ch’a vada a mangé ‘d grassa ‘d cheidun-e dle bestie smonùe coma n’oferta për esse brusà an onor ëd Nosgnor, a sarà bandì da sò pòpol. ²⁶An qualsëssìa leugh i dovèisse trové o sté, i l’eve mai da mangé ‘d sangh, nì d’osej nì d’àutre bestie, ²⁷përchè tui coj ch’a mangeran ëd ël sangh a saran bandì da sò pòpol’^[7]”.

Le porsion arservà ai sacerdòt

²⁸Nosgnor a l’ha parlà ancora a Mosè. A l’ha dije: ²⁹‘Faje savèj sossì a j’Israelita: ‘Col ch’a smon a Nosgnor un sacrifissi ‘d comunion, a l’ha da smonje la part ëd la vìtima ch’a-j corispond. ³⁰A presenterà con soe man la part destinà a Nosgnor, visadì, la grassa e ‘l pét. A butrà la grassa dë 'dnans ëd ël pét e a smonrà tut dë 'dnans ëd Nosgnor. ³¹Ël sacerdòt a brusrà la grassa an sl’autar, ma ‘l pét a sarà për Aron e ij sò dissendent. ³²Dij vòstri sacrifissi ‘d comunion i presentereve ‘dcò la cheussa drita dla vìtima, e apress i në fareve don al sacerdòt. ³³Costa cheussa a l’é pr’ ij dissendent d’Aron ch’a l’avran smonù ‘l sangh e la grassa dij sacrifissi ‘d comunion. ³⁴Përchè mi, ël Signor, dij sacrifissi ‘d comunion che j’Israelita a më smonran, i-j pijo ‘l pét ch’am presento e la cheussa arservà, e a-j në faso don al sacerdòt Aron e ai sò dissendent. Costa-sì a l’é na prescrission përpetua për j’Israelita”.

Conclusion e arcapitolassion

³⁵Sòn a l’é lòn ch’a jë speta a Aron e ai sò dissendent ciapà da j'oferte dàite a Nosgnor ant ël dì che Mosè a l’ha presentaje për ufissié coma ‘d sacerdòt a Nosgnor. ³⁶Sòn a l’é lòn che Nosgnor a l’ha comandà ‘d deje a lor da part dj’Israelita ant ël dì che Mosè a l’ha consacraje - la porsion ch’a jë speta an përpètuo da generassion a generassion.

³⁷Coste-sì a son j’istrussion për j’olocàust e për j’oferte ‘d farin-a, dij sacrifissi pr’ ël pecà o ‘d riparassion, dl’oferta ‘d consacrassion sacerdotal e dij sacrifissi ‘d comunion. ³⁸Nosgnor a l’ha daje a Mosè an sël Mont Sinai, ël dì che, ant ël desert ëd ël Sinai, a l’ha comandà a j’Israelita ch’a jë smonèisso soe oferte.

Nòte

1. O “la lej” (תּוֹרָה).
2. O “compensassion për na colpa”, ”, “sacrifissi compensativ”, “oferta d’espiassion ëd na colpa (אָשָׁם)".
3. O “sant dla santità”, “motobin sant”, “santissim”.
4. O “feuja d’aram” (עַל-מַחֲבַת).
5. O “sacrifissi 'd pas” (זֶבַח הַשְּׁלָמִים).
6. O "d'arconossensa".
7. 7:26-27, cfr. Génesi 9:4; Levìtich 17:10-14; 19:26; Deuteronòmi 12:16,23; 15:23.