La Bibia piemontèisa
Levìtich

Levìtich

La Bìbia piemontèisa - Levitich 06

6

Funsion e dovej dij Sacerdòt

¹Nosgnor a l’ha parlà ancora a Mosè. A l’ha dije: ²“Fà savèj a Aron e ai sò fieuj che costa-sì a l’é la lege dj’olocàust: ‘La vìtima sacrificà a starà tuta la neuit al sël brasé dl’autar fin a la matin, e ‘l feu dl’autar a l’ha da sté anvisch. ³Ël sacerdòt as butrà a còl soa vestimenta ‘d lin dëdzora 'd soe braje ‘d lin ëd sota. A prelevrà da l’autar le sënner ëd la vìtima consumà dal feu e a-j lasserà aranda dl’autar. ⁴Peui, as muderà ‘l vestì e a porterà le sënner fòra dal campament ant un leugh pur da la mira ritual. ⁵Ël feu dl’autar as l’avrà mai da dëstissesse: ël sacerdòt a-j giontrà ‘d bòsch minca matin e dëdzora a rangerà la vìtima oferta an olocàust. A-i farà brusé la grassa dij sacrifissi ‘d comunion. ⁶Un feu sèmper anvisch a dovrà essie sèmper an sl'autar, e as dovrà mai lasselo dëstissé’.

Oferte ‘d farin-a

⁷Coste-sì a son j'istrussion për j'oferte ‘d farin-a: ‘Ij sacerdòt dissendent d’Aron a presenteran l’oferta dë 'dnans ëd Nosgnor an facia dl’autar^[1]. ⁸Un ëd lor a ciaprà na branca ‘d fior ëd farin-a ampapëttà d’euli con tut l’ancens ch’a-i é dzora dl’oferta, e a lo farà brusé an sl’autar coma ‘n memorial d’odor agreàbil a Nosgnor. ⁹Lòn ch’a vansa dl’oferta a lo mangeran Aron e ij sò fieuj, sensa alvà e ant un leugh sacrà ant la cort ëd la Tenda dël Rëscontr. ¹⁰A dovrà mai esse cheuita con alvà. A l’é la part ch’i-j dago da j'oferte ch’a l’han da brusé për mi. A l’é cheicòsa 'd pì che sant, coma ch’a l’é col dij sacrifissi d’espiassion pr’ ij pecà o dij sacrifissi ‘d riparassion. ¹¹A në mangeran tuti j’òm e ij fiolin dissendent d’Aron, përchè costa part dj’oferte brusà an mè onor a l’é la mìa për sèmper. Tut lòn ch’a vnirà tocà da sossì a resterà sacrà.

L’oferta ‘d consacrassion sacerdotal

¹²Nosgnor a l’ha parlà ancora a Mosè. A l’ha dije: ¹³“Costa-sì a l’é l’oferta che Aron e ij sò fieuj a l’han da presenté a Nosgnor ant ël dì dla soa consacrassion: tre chilo ‘d fior ëd farin-a coma n’oferta përpetua, la metà a la matin e l’àutra metà a la sèira. ¹⁴A l’ha da fesse cheuse con d’euli ant la feuja d’aram. Apress a la faran a tochetin e a la presenteran an fórma d’oferta sfërvajà d’odor agreàbil a Nosgnor. ¹⁵Ant ël moment che ‘n dissendent d’Aron, coma ij sò sucessor, a sarà consacrà Gran Sacerdòt, a farà la midéma oferta. Costa-sì a l’é na lege përpetua. L’oferta a sarà brusà antrega an onor ëd Nosgnor. ¹⁶Tuta l’oferta presentà an favor d’un sacerdòt a sarà brusà antrega: gnun a podrà mangela”.

Sacrifissi për ij pecà

¹⁷Nosgnor a l’ha parlà 'ncora a Mosè. A l’ha dije: ¹⁸”Fà savèj a Aron e ai sò fieuj che coste-sì a son j'istrussion pr' ij sacrifissi pr’ ël pecà: ‘La vìtima oferta pr’ ël pecà a sarà sgorzà dë 'dnans ëd Nosgnor ant ël leugh anté ch’a së sgòrzo le vìtime oferte an olocàust. A l’é na còsa santa dël gré pì àut. ¹⁹Ël sacerdòt ch’a smon-a ‘l sacrifissi pr’ ël pecà a në mangerà, ma ant un leugh sacrà, ant la cort ëd la Tenda dël Rëscòntr. ²⁰Tut lòn ch’a toca la carn ëd la vìtima a resterà sacrà, e s’a càpita che ‘d sangh a sghicéissa an sle veste, la macia as l’avrà da netié ant un leugh sacrà. ²¹Se ‘l vas anté ch’as fà beuje la carn ëd la vìtima a l’é ‘d teracheuita, apress as lo dovrà s-ciapé; ma se ‘l vas a l’é d’aram, a l’avrà da esse fërtà e arzentà con tanta eva. ²²Tuti j’òm e ij fiolin ch’a aparten-o a le famije sacerdotaj a podran mangé la carn dë sti sacrifissi-sì. A l’é cheicòsa ‘d santìssim. ²³Tutun, gnun a podrà mai mangé la carn ëd cole vìtime che ‘l sangh a va portà ant la Tenda dël Rëscontr për fé la sirimònia d’espiassion ant ël santuari. Tut a l’avrà da esse brusà.

Nòte

↑ 6:1-7 cfr. Nùmer 5:5-8.

[1] 6:1-7 cfr. Nùmer 5:5-8.

[1]