La Bibia piemontèisa/Testament Vej/Isaia/Isaia 25

←Isaìa 24

La Bibia piemontèisa Isaìa

Isaia 26→

La Bìbia piemontèisa - Isaia 25

Isaia

25

¹Nosgnor! Ti't ses mè Dé, i t'esaltrai con ëd làude e i proclamrai tò nòm: ti 't fase d'euvre maravijose! It l'has progetaje tant temp fà e adess it l'has compije. ²Dla granda sità it l'has fane 'n drocheri, ëd soe muraje ch'as disìo 'nviolàbij, na massa 'd ruvin-e. Le fortësse strangere a son pì nen ëd sità e a saran pa pì arcostruvìje. ³A l'é për lòn che 'd nassion poderose a 'rconossran toa glòria; le sità 'd nassion sensa pietà a l'avran tëmma 'd ti. ⁴Ti 't ses stàit l'arfugi dij déboj, Signor, n'arpar për ij pòver sagrinà. Ti 't ses na sosta da la tempesta e n'àrpar da la càud ch'a stenz. La furia dij tiran a l'é tanme na tempesta ch'a sbat contra na muraja, ⁵tanme 'l ruvin dël sol contra na tèra 'rsëccà. Ti 't fase sté ciuto 'l breugg ëd nassion ëstrangere. Coma l'ombra 'd na nìvola a 'rfrësca dal sol afoà, parèj a 'nmutisso ij cant trionfaj dij tirann.

⁶Ël Signor ëd l'Univers^[1] a prontrà 'n disné gròss an sël mont Sion për tute le nassion dël mond. A sarà 'n disné avosà con ëd bon vin vej e 'd carn soasìa. ⁷Ansilà Dé a farà svanì 'l vel ëd sagrin ch'a quata tùit ij pòpoj, l'ombra 'd mòrt^[2] ch'a fà scura tuta la tèra.

⁸Chiel a travondrà la mòrt për sèmper^[3]! Ël Signor Dé a suvrà tute le lerme e a gavrà l'onta^[4] 'd Sò pòpol da tuta la tèra. A l'é vera: ël Signor a l'ha nunsialo!

⁹An col dì là 'l pòpol a proclamrà: "Sto-sì a l'é nòstr Dé. I l'oma butà 'n Chiel nòstra speransa e a l'ha salvane! Sto-sì a l'é 'l Signor: i l'oma butà 'n Chiel nòstra speransa. Arlegromse 'nt la salvëssa che chiel a l'ha dane!". ¹⁰La man ch'a benedìss dël Signor a l'é posà an sël mont Sion. Moab, tutun, a sarà crasà. Lor a saran tanme 'd paja scarpisà ch'a l'é lassà a marsé. ¹¹Dé a farà fonghé 'l pòpol ëd Moab tanme 'n noador ch'a possa giù l'eva con soe man për noé. Cola-lì a sarà la fin ëd soa arogansa e 'd soe euvre 'd gramissia. ¹²Le muraje àute 'd Moab a saran dësblà. A saran campà giù a tèra, giù 'nt la póer^[5].

Nòta

1. O "ch'a comanda d'armade".
2. O "sudari".
3. Cfr. 1 Corint 15: 54.
4. O "dësgrassia"
5. 25:10-12 cfr. Isaia 15:1-16:14; Geremìa 48:1-47; Esechiel 25:8-11; Amos 2:1-3; Sofònia 2:8-11.