La Bibia piemontèisa/Testament Vej/Giona/Giona 2

←Giona 1

La Bibia piemontèisa Giòna

Giòna 3→

La Bìbia piemontèisa - Giòna 2

2

Giòna salvà

¹Parèj Giòna a l'ha pregà Nosgnor Dé da la pansa dël pess. A l'ha dìt^[1]:

²"Për l'angossa ch'i l'avìa, i l'hai crijà a Nosgnor, e chiel a l'ha rëspondume; dal përfond dël mond dij mòrt i l'hai ciamà, e ti, Nosgnor, it l'has ëscotà mia vos. ³It l'avìe campame ant le përfondità dël mar, angolfà ant j’eve dl’abiss, e j'ondà am saravo an mes. Tute toe onde e toe corent a son passame dzora. ⁴E mi i disìa: Nosgnor! It l’has separame da toa presensa. Se mach i podèissa ancora vëdde tò Templi sant! ⁵J'eve a l'han ansërciame fin-a a la gola; l'abim a l'ha anvërtojame. La lësca dël mar a l'é antërtojasse a mia testa. ⁶I son përfondà a le rèis ëd le montagne, ant un pais andova le pòrte^[2] dël pais ëd la mòrt a son sarasse darera ‘d mi. Ma da la tampa^[3] ti 't l'has fàit torna montè mia vita, Nosgnor mè Dé. ⁷Cand ch'an mi mia ànima a mancava, mi i son avisamne 'd Nosgnor e mia preghiera a l'é rivà fin-a a ti an tò Templi sant. ⁸Coj ch'a servo ëd divinità falëtte^[4], ch’a chito d’adoreje^[5]! ⁹Mi, con acsant ëd làuda, i të smonrai un sacrifissi. Ël vot ch'i l'hai fàit, i lo compirai. A l’é ‘l Signor ch’am salva^[6]!".

¹⁰Peui Nosgnor a l'ha comandaje^[7] al pèss ch'a gumitèissa Giòna an sla riva.

Nòte

1. A l’é ‘n salm d’arconossensa, na testimoniansa tocanta dël cheur ëd la fede israelita e del cheur dël profeta. Chiel a l’avrìa avù ancora tant d'amprende. Soa vision ëd la misericòrdia ‘d Nosgnor a l’era ancora strèita.
2. O “...che le bare a l'ero stàite tirà dzora 'd mi për sèmper”. Giòna a stà a le pòrte dla mòrt, cfr. Salm 9:13: “Nosgnor! Àbie pietà 'd mi, varda coma che ij mè nemis am dan ëd torment. Ciapme al vòl prima ch'i tombo ant la gola dla mòrt”.
3. Ambelessì “fossal o tampa” a l’é dovrà për descrive ‘l regn ëd la mòrt (Giòb 33:22,24; Salm 49:9; Isaia 51:14). La situassion a parëss sensa speransa, ma ‘l profeta pentì a l’é salvà dal regn ëd la mòrt e ristabilì ant la comunion con Nosgnor.
4. Giòna a arcòrda ij marinar ch’a l’avìo pregà i sò fauss dé ma sensa efet.
5. O “a chito soa speransa ‘d grassia”.
6. O “Da Nosgnor a ven la salvëssa”.
7. La creassion a rëspond con ubidiensa ai comand sovran dël Creator (cfr. Gènesi 1:4,15,17). Col pèss, ch’a l’avrìa podù esse në strument ëd mòrt ant le man ëd Dé, për grassia a ven a esse në strument ëd liberassion.