La Bibia piemontèisa/Testament Vej/Deuteronomi/Deuteronomi 34
Deuteronòmi[modifiché]
34[modifiché]
La mòrt ëd Mosè[modifiché]
1Antlora Mosè a l'é montà dal desert ëd Moab an sël Mont Nebo, ansima a la colin-a 'd Pisga, cola ch'a l'é dë 'dnans ëd Gérico. Nosgnor a l'ha faje vëdde tut ël paìs, da Ghilead fin-a a Dan, 2tut Neftali, la tèra d'Efraim e 'd Manasse, tuta la tèra 'd Giuda fin-a al mar ëd ponent, 3ël Neghev e la pian-a dla val ëd Gérico, la sità dle palme da dàtoj, fin-a a Zoar.
4Nosgnor a l'ha dije: "Costa-sì a l'é la tèra ch'i l'hai promëttuje a Abraham[1], Isach[2] e Giacòb[3], quand ch'i l'hai dije: 'Tut sossì i lo darai a toa dissendensa'. I l'hai fàilo vëdde, ma ti it j'intreras pa". 5Anlora Mosè, ël servitor dël Signor, a l'é mòrt ambelelà, ant la tèra 'd Moab, coma che Nosgnor a l'avìa dije. 6A l'han sotralo 'nt la tèra 'd Moab, davzin a Bet-Peor, ma gnun fin-a al di d'ancheuj a sà anté ch'a sia 'd precis cola tomba.
7Mosè a l'avìa sent e vint agn quand ch'a l'é mòrt, ma a s-ciairava ancora bin e soa vitalità a l'era nen vnuje meno. 8J'Israelita a l'han fàit dël deul për Mosè tranta di 'nt ël desert ëd Moab, e peui ij di 'd deul për Mosè a son rivà a la fin.
Iscrission sepolcral ëd Mosè[modifiché]
9Ore Giosuè, fieul ëd Nun, a l'era pien dë spìrit ëd sapiensa, përché Mosè a l'avia 'mponuje le man, e j'Israelita a lo scotavo e a fasìa pròpi lòn che Mosè a l'avìa comandaje.
10An Israel a l'é mai pì surtì un profeta tanme Mosè, ch'a l'avèissa conossù Nosgnor facia a facia[4]. 11A l'ha fàit tùit ij segn, le marche e ij miràcoj che Nosgnor a l'avìa mandalo a fé 'nt ël pais d'Egit, dë 'dnans al Faraon, a tùit ij sò servidor e al pais antregh. 12 E a l'ha dimostrà fòrsa granda e na potensa da fé 'mpression dë 'dnans a tut Israel.
Nòte[modifiché]
- ↑ Cfr. Génesi 12:7.
- ↑ Cfr. Génesi 26:3.
- ↑ Cfr. Génesi 28:13.
- ↑ Cfr. Surtìa 33:11.