La Bibia piemontèisa/Testament Neuv/Timot/1Timot 5

←1 Timòt 4

La Bibia piemontèisa Litre a Timòt

1 Timòt 6→

La Bìbia piemontèisa - 1 Timòt 5

1 Timòt

5

L’assistensa a le vidoe e d’àutre istrussion

¹Faje nen d’arprocc con rudiëssa a n'òm d'età, ma esort-lo coma s’a fussa tò pare e tùit ij giovo coma s’a fusso ij tò frej. ²Trata le fomne d’età com a ‘d mare, le giovo coma ‘d seur, e sèmper con purëssa.

³Le vidoe ch’a l’han gnun d’àutri ch’as na pijo soen it l’has da tnije an granda considerassion^[1], ⁴ma se quaj vidoa a l’ha ‘d masnà o ‘d novod, a son prima lor ch’a l’han da amprende a comportesse con pietà anvers a soa famija ‘d lor e ‘d compì ij dover ch’a l’han con coj ch’a l’han daje la vita. Sossì a l’é bon e agreàbil dë 'dnans a Nosgnor. ⁵L’ùnica speransa ch’a l’ha na vidoa ch’a sia përdabon restà sola a l’é an Nosgnor. An efet, chila a prega dì e neuit e a ciama agiut a Nosgnor. ⁶Contut, cola ch’a pensa mach ai sò piasì, combin ch’a viva a l’é già coma s’a fussa mòrta. ⁷Dà coste istrussion a la comunità përchè tuti a l’abio da esse sensa rimpròcc, ⁸përché chi ch’a l’ha nen soen dij sò, dzurtut ëd coj ch’a son ëd soa famija^[2], a mostra ch’a l’ha arnegà la fede e ch’a l’é pes ëd ij mischërdent.

⁹A peudo esse butà an sla lista dle vidoe da giutesse mach le fomne ch’a sio rivà almanch a sessant’agn d'età e ch’a sio restàje fedej a sò marì. ¹⁰A l’han da esse conossùe^[3] coma 'd fomne ch’a fan d’euvre bon-e, ch’a l’abio anlevà bin soe masnà, ch’a sio ‘d bon-a ca, e che sèmper dispòste a fé ‘l bin, a l’abio rendù ‘d servissi con umiltà al pòpol sant^[4] e giutà coj ch’a patisso d’aflission. ¹¹D’àutra banda, le vidoe giovo a l’han nen da esse butà an cola lista, përchè soe passion ëd lor a podrìo dventé pì fòrte che soa devossion al Crist e a vorìo bin maridesse torna. ¹²A podrìo incore ant un giudissi përchè ch’a l’han mancà a soa promëssa^[5]. ¹³Se cole fomne a fusso butà an sla lista dle vidoe da giutesse, a amprendrìo mach a d’esse ossiose e a andrìo da ca a ca a spëttegolé, ampacend-se ‘d lòn ch’a-j riguarda nen, e an dëscorand ëd còse ch’a van nen bin. ¹⁴A l’é për lòn ch’a l’é mej che le vidoe giovo as marido torna, ch’a l’abio ‘d masnà e ch’as pijo soen ëd soa famija ‘d lor. Parèj a daran pa al nemis l’ocasion ëd fé ‘d maldicense,  ¹⁵përchè cheidun-e a son già butasse an sla cativa stra e a son andaje dapress a Sàtana.

¹⁶Se na fomna ch’a l’é na chërdenta a l’ha an famija ‘d vidoe, a l’é chila ch’a l’ha da pijess-ne soen e nen dene la responsabilità a la cesa; parèj la comunità a na sarà dëscarià e a podrà sostnì le vidoe ch’a l’han gnun ch’a-j peuda giuteje.

Coj ch’a l’han la presidensa dla comunità

¹⁷Che j’ansian ch’a pressiedo la comunità coma ch’as deuv a mérito d’arsèive tant l’onor che l’onorari^[6], dzurtut coj ch’as dedico a la predicassion e a l’amaestrament. ¹⁸La Scritura, an efet, a dis: “Buta pa 'l musel al beu, antramentre ch’a bat ël gran”^[7], e “ël travajeur a l’é degn ëd sò salari^[8]”.

¹⁹Arsèiv gnun-a acusa contra l’ansian s’a l’é nen confermà da doi o tre testimòni^[9]. ²⁰ma coj ch’a fan ëd pëccà a l’han da esse rimprocià dë 'dnans a tuti përchè ‘dcò j’àutri a n’abio tëmma.

²¹It suplico dëdnans a Nosgnor, a Gesù Crist e a j’àngej pì àut^[10] ëd fé ubidiensa a coste istrussion, sensa lassete condissioné da ‘d pregiudissi o ‘d preferense.

²²Cand ch’as ha da nominé dj’ansian dla comunità, abie nen pressa d’impon-e le man a cheidun, përché it podries esse acusa ‘d conivensa con ël pëccà ‘d col-lì. Goerna toa purëssa.

²³Bèiv pì nen mach d’eva. It dovries bèive ‘dcò un pò ‘d vin ch’at farà bin a lë stòmi e at sarà d’agiùt për j’indisposission ch’it l’has ëd soens,

²⁴Ij pëccà ‘d cheidun a son ciàir fin-a anans ch’a sio giudicà, ma a-i son ëd pëccà ch’a saran dëscurvì mach pì tard. ²⁵A l’é l’istess për j’euvre bon-e: cole ‘d cheidun as vëddo sùbit, ma d’àutre, ch’a son fàite dë stërmà, a vniran al ciàir pì tard.

Nòte

1. O “da onoreje”.
2. O “provëdd nen a soa famija, dzurtut coj ch’a stan con chiel”.
3. O “da rende testimoniansa”.
4. Let. “ch’a l’ha lavà ij pé dij sant”.
5. A peul desse che antlora le vidoe ch’a l’ero butà an sla lista dl’asistensa a l’avìo da promëtte ‘d nen avej ëd relassion con dj’òm fòra da ‘n mariagi regolar.
6. O “onorà ‘l dobi”.
7. Cfr. Deuteronòmi 25:8.
8. Cfr. Maté 10:10; Luca 10:7.
9. Cfr. Deuteronòmi 17:6; 19:15.
10. O let. “sernù”.