La Bibia piemontèisa/Testament Vej/Salm/Salm 24
Ij Salm
[modifiché]24. A l'é 'd Nosgnor la Tèra e tut lòn ch'a viv an chila
[modifiché]- Lë scritor a fortiss la regalità universal dël sovran Creator e a 'rciama a la ment a Sò pòpol che mach a coj ch'a l'han un cheur pur a l'é consentije d'adorelo. Peui a sélebra lë splendrior ëd Dé coma 'n vajant rè guerié.
1Un salm ëd David. A l'é 'd Nosgnor la Tèra e tut lòn ch'a viv an chila, ël mond e tuti coj dont a l'é soa abitassion[1]. 2A l'é stàit chiel ch'a l'ha pogiane le fondassion an sij mar përfond e a l'ha renduje fërme tant che le corent a-j peulo nen dësbogeje.
3A chi ch'a l'ha acordaje d'andé an sël mont ëd Nosgnor? Chi é-lo ch'a peul monté a sò templi sant? 4Coj ch'a l'han un cheur sincer[2] e le man sensa colpa, ch'a fan pa d'afidament a 'd divinità fàusse, nì ch'a fan ëd giurament mach për angané la gent. 5A son coj-lì ch'a arseivran ëd benedission da Nosgnor, a son coj-lì ch'a arseivran ij favor dël Dé ch'a-j salva. 6A l'é pròpi col-lì ël pòpol che Nosgnor a sërca, ij dissendent ëd Giacòb ch'a lo prego.
7Pòrte antiche: duverteve! Porton antich, duverteve, ch'a l'ha da intré 'l Rè 'd glòria! 8Chi ch'a l'é sto Rè 'd glòria? A l'é Nosgnor Dé, vajant e poderos! Nosgnor, poderos ant ël combatiment! 9Pòrte antiche: duverteve! Porton antich: duverteve, ch'a l'ha da intré 'l Rè 'd glòria! 10Chi ch'a l'é cost Rè 'd glòria? A l'é Nosgnor, Dé dl'Univers: a l'é chiel ël Rè 'd glòria!
Nòte
[modifiché]- ↑ Cfr. 1 Corint 10:26.
- ↑ O: "pur", cfr. Maté 5:8.