La Bibia piemontèisa/Testament Vej/Salm/Salm 25
Ij Salm[modifiché]
25. Nosgnor! Con mia preghiera i ven-o dë 'dnans ëd Ti[modifiché]
- L'autor a prega Nosgnor për soa protession, guida e përdon e a conferma ch'a veul essje fedel e ch'a l'ha fiusa an chiel.
1Un salm ëd David. Nosgnor! Con mia preghiera i ven-o dë 'dnans ëd ti[1]. 2Mè Dé! I l'hai fiusa an ti, che mi i sìa pa umilià, fà pa che ij mè nemis as arlegro 'd mia derota. 3Gnun ch'as confida 'n ti a sarà mai dësvërgognà, ma a saran pitòst dësvërgognà coj ch'a monto 'd tràpole për fé droché 'ndrintra d'àutri. 4Nosgnor! Fà che mi i conòssa col ch'a l'é 'l giust senté; mostr-me la stra ch'i l'hai da marceie ansima. 5Menme an toa vrità e fame da guida, përchè ti 't ses ël Dé ch'am salva. A-i é mai 'n moment sol che mi i buta nen mia speransa 'n ti. 6Dësmentia pa, Nosgnor, d'esse compassionèivol e fedel, përché ti 't ses sèmper stàit parèj. 7Dësmentia pitòst ij pecà ch'i l'hai fàit cand ch'i j'era giovo. Nosgnor! Arcòrd-te 'd mi për tò amor, për toa bontà.
8Nosgnor a l'é bon e a fà lòn ch'a l'é giust, Chiel a mostra 'l senté giust ai pecador. 9A 'ncamin-a j'ùmij a fé lòn ch'a l'é giust e a-j mostra la stra ch'a l'han da ciapé.
10Nosgnor a men-a sèmper con amor e fidelità coj ch'a rispeto le disposission ëd sò pat d'aleansa. 11Nosgnor! Për l'onor ëd tò nòm përdon-a ij mè pecà, përchè a son tanti.
12Chi ch'a son coj ch'a l'han timor ëd Nosgnor? Chiel a-j mostrerà 'l senté ch'a l'han da pijé. 13Minca neuit a arposeran content[2] e ij sò dissendent a arditran la tèra.
14Nosgnor a l'é n'amis për coj ch'a lo rispeto[3] e a-j mostra l'amportansa d'essje gropà da n'Aleansa. 15Ij mè euj a vardo sèmper anvers ëd Nosgnor, përché chiel am salva da le tràpole ch'am buto dë 'dnans ij mè nemis. 16Vìrte anvers ëd mi e ch'it l'abie compassion përchè mi im treuvo sol e a-i é gnun ch'am giuta. 17Ij mè problema a son pes che pes: pòrt-me fòra da tùit ij mè sagrin! 18Varda coma ch'i son, pien ëd sagrin e dësgrassià: përdon-a tùit ij mè pecà. 19Varda vàire ch'a son ij mè nemis, che 'd gramissia ch'a l'han e ch'a l'han mi 'n òdio. 20Guerna mia vita e lìberme. Lassa nen ch'i sia dësvërgognà, përchè ti 't ses mè arfugi. 21La dritura e l'onestà am guerneran, përché mach an ti i treuvo mia speransa.
22Nosgnor! Riscata Israel da tuit ij maj ch'a lo sagrin-o.