La Bibia piemontèisa/Testament Vej/Isaia/Isaia 62

Da Wikisource.
Jump to navigation Jump to search

Isaia[modifiché]

62[modifiché]

Nosgnor a treuva Soa delissia an Sion[modifiché]

1Pròpi përch' i veuj bin a Sion, i starai pa ciuto. Pròpi përch' i sosnisso Gerusalem, i peuss nen stemne chiet. I chitrai nen ëd preghé për chila fin-a a tant che soa giustissia a splendrà tanme 'l sol a la primalba, e soa salvëssa[1] a brusrà tanme 'n flambò afoà. 2Le nassion a vëdran toa giustissia. Tùit ij rè dël mond a saran sbalucà da toa glòria. A ti at sarà dàit un nòm neuv da la boca midèma 'd Nosgnor. 3Nosgnor at tnirà an man parèj che tùit at vëddo - na splèndida coron-a 'nt le man ëd Dé. 4Mai pì it saras ciamà "La sità bandonà" o "Tèra 'd desolassion". Tò nòm neuv a sarà: "Sità delissia 'd Nosgnor" e "La sposa 'd Dé", përché an ti Nosgnor a treuva Soa delissia e at vorerà coma Soa sposa.

5Ij tò fieuj a faran anvers ëd ti un giurament ëd fidelità, òh Gerusalem, pròpi tanme 'n giovnòt ch'as angagia con na giovna. Anlora 'l Signor a s'arlegrerà an ti tanme në spos ch'a s'arlegra 'd soa fomna. 6Gerusalem! I l'hai butà 'd guardie an sij tò murajon: lor a vijeran an preghiera neuit e dì. Pijeve gnun arpòs, òh vojàutri ch'i pregheve Nosgnor. 7Dé a Nosgnor gnun-a requie fin-a a tant che Chiel a finìss sò travaj, fin-a a tant che Chiel a fasa 'd Gerusalem l'orgheuj ëd la tèra.

8Nosgnor a l'ha giurà a tuta fòrsa[2]: "Mai pi it consignerai ai tò nemis. Mai pì a vniran dij guerié strangé për portete vìa tò forment e tò vin neuv. 9It ses ëstàit ti a coltivé 'l forment e ti 't lo mangeras ringrassiand-ne Nosgnor. Ant le cort dël Templi i sareve vojàutri a bèive 'l vin ch'i l'eve torcià. 10Seurte fòra dai porton e preparé la strà parèj che Mè pòpol a peussa 'rtorné. Spiané le strà, gavé le pere d'antrap ch'a-i son, aussé 'n drapò parèj che tute le nassion a lo vëddo. 11Nosgnor a l'ha mandà 's mëssagi a tùit ij pais: "Dì al pòpol d'Israel: Vardé: vòstr Salvator a l'é an camin ch'a riva. Vardé, chiel a pòrta 'dcò n'arcompensa".

12Lor a saran ciamà: "Ël pòpol sant", "Coj ch' ël Signor a l'ha riscatà". E Gerusalem a sarà ciamà: "Leugh ch'a l'é 'n piasì da steje" e "La sità pì nen bandonà".

Nòte[modifiché]

  1. O "liberassion".
  2. O "Con Soa man drita e con Sò bras potent".