La Bibia piemontèisa/Testament Vej/Isaia/Isaia 61

Da Wikisource.
Jump to navigation Jump to search

Isaia[modifiché]

61[modifiché]

Nosgnor a farà artorné giovo Sò pòpol[modifiché]

1Lë Spìrit dël sovran Signor a l'é an mi, përchè Nosgnor a l'ha sernume[1]. A l'ha dame la comission ëd porté la bon-a neuva[2] ai pòver, ëd giuté coj ch'a l'han ël cheur crasà, ëd proclamé la liberassion dij përzoné e ch'a vëdran torna la lus coj ch'a son an caden-e; 2ëd proclamé l'ann ëd grassia 'd Nosgnor, ël di che nòstr Dé a farà giustissia, e 'd consolé tùit coj ch'a son sagrinà[3]. 3A tùit coj ch'a porto 'l deul për Sion chiel a-j darà na coron-a[4] an leu 'd sënner, ël përfum ëd la festa[5] an leu dël pior dël deul, ëd ròbe sfarsose[6] an leu dël dëscorament. Ant la giustissia ch'a 'rseivran, lor a saran coma la granda rol che 'l Signor a l'ha piantà për arvelé Sò splendrior.

4Lor a 'rcostruvran le ruin-e antiche e restaureran le sità devastà, abandonà 'nt la desolassion tant temp fa. 5Ëd forësté a soagneran ij vòstri strop, ëd forësté a travajeran vòstri camp e vòstre vigne. 6I sareve ciamà: "Ij sacerdòt dël Signor, ij ministr ëd nòstr Dé". I godreve le richësse dle nassion e iv gloriereve 'd tùit ij bin ch'i arseivreve da lor. 7An leugh ëd la vërgògna i arseivreve na dobia porsion d'onor. An leugh ëd l'umiliassion as arlegreran ëd la tèra ch'a 'rseivran. Eh, lor a arseivran na dobia porsion an soa tèra e a saran sodisfàit për sèmper. 8Përchè mi, ël Signor, i dago 'n grand valor a la giustissia e i l'hai 'n ghignon l'ingiustissia e la rapin-a. I arcompenserai mè pòpol përchè i son fedel. I farai con lor un pat ch'a dura për sèmper. 9Ij sò dissendent a saran famos an tra le nassion, ij sò fieuj an tra ij pòpoj. Tuti coj ch'a-j vëdran a arconosseran che 'l Signor a l'ha benedije.

10I sarai pien ëd gòj për Nosgnor, mè Dé, përché Chiel a l'ha 'rvestime con la vestimenta dla salvëssa e festonà con ël mantel ëd la giustissia. I smijo a në spos con soa vestimenta 'd nòsse[7], i smijo a na sposa ch'a porta sòa giòja. 11Nosgnor Dé a mostrerà soa giustissia a le nassion dël mond. Tuti a lo lauderan! Soa giustissia a sarà coma 'n giardin ant ël temp ëd le fior con ëd piante ch'a chërso daspërtut!

Nòte[modifiché]

  1. O "unsion" > "onzù", ch'a sta a l'origin dël tèrmin "Messia" e "Crist".
  2. O "ëd fé coragi".
  3. O "ch'a l'han ël magon".
  4. O "un diadema".
  5. O "l'euli dla gòj".
  6. O "làude".
  7. O "quand ch'a porta un turban coma 'n sacerdot".