La Bibia piemontèisa
Geremìa

Geremìa

La Bìbia piemontèisa - Geremia 45

45

Un mëssagi për Baruch

¹Paròla che 'l profeta Geremìa a l'ha dije a Baruch, fieul ëd Nerià, cora che a l'avìa scrivù coste paròle ant ël lìber, sota detatura 'd Geremia, l'ann quart ëd Joachim, fieul ëd Iosia, rè 'd Giuda^[1]. Geremìa a l'ha dit: ²Përparèj a parla 'l Signor, Dé d'Israel a ti, Baruch. ³Ti 't dise: “òmmi povròm, im sento tant sensa speransa! Përchè Nosgnor a l'ha giontà ‘d sagrin a mè maleur. I son ësvèrs dal gëmme. I treuvo gnun-e réchie”.

⁴Nosgnor a l'ha dije a Geremìa: "Dije a Baruch, ‘Ël Signor a dis: I stago për campé giù lòn che i l'avìa edificà e dësraisé lòn che i l'avìa piantà. I lo farai an tuta la tèra. ⁵E ti 't vade an sërcand për ti lòn che a l'é strasordinari! Sérch-lo pa, përchè varda, mi i manderai ‘d maleur dzora tùit ij mortaj, a dis ël Signor, ma a ti i salverai la vita an qualsëssìa pòst ch'it vade”.

Nòte

↑ Cfr. 2 Rè 24:1; 2 Crònache 36:5-7; Daniel 1:1-2.

[1] Cfr. 2 Rè 24:1; 2 Crònache 36:5-7; Daniel 1:1-2.

[1]