La Bibia piemontèisa/Testament Vej/Daniel/Daniel 8

←Daniel 7

La Bibia piemontèisa Daniel

Daniel 9→

La Bìbia piemontèisa - Daniel 08

Daniel

8

La vision dël moton e dël boch

¹Ant ël ters ann dël regn ëd rè Baldassar, a mi, Daniel, dòp ëd lòn ch’a l’era già comparime anans, a l’é vnume n’àutra vision, . ²Sossì a l’é lòn ch’i l’hai vëddù: im trovava a Susa, sità fortificà^[1] dla provinsa d’Elam, aranda dël canal Ulai. ³I l’hai aussà j’euj e i l’hai s-ciairà un moton ch’as tenìa drit dë 'dnans al canal. A l’avìa dòi gran’ còrn, ma un pì àut che l’àutr, e ‘l pì àut dij dòi a l’era chërsuje për ùltim. ⁴I l’hai vëddù che ‘l moton a dasìa ‘d gran cornassà anvers ponent, tramontan-a e meridion. Gnun-a bestia a podìa arzistje e pa nen a jë scapava. A fasìa lòn ch’a-j piasìa e a vnisìa sèmper pì potent. ⁵Damentre ch’i pensava a lòn ch’i l’avìa vëddù, a l’é rivà da ossident un boch ch’a passava a rasa tèra për tut ël mond, ma sensa toché ‘l teren. Ël boch a l’avìa an tra j’euj un còrn grand ch’a fasìa 'mpression. ⁶Ël boch a l’é avzinasse al moton dij dòi còrn ch’i l’avìa vëddù anans aranda al canal e a l’é slansasse contra ’d chiel con tute soe fòrse. ⁷I l’hai vëdulo rivé e, 'nfurià, deje contra ‘l moton. A l’ha frapalo e s-ciapaje ij dòi còrn sensa che ‘l moton a l’avèissa la fòrsa ‘d tenje testa; a l’ha campalo për tèra ciapinand-lo con le piòte, e gnun a l’é stàit bon ambelelà a salvelo.

⁸Ël boch a l’é vnùit a esse motobin potent ma, al cò ‘d soa potensa, sò gran còrn a l’é sfrisasse e a sò pòst a son surtì quatr còrn ëd pì, tuti ch’a fasìo motobin d’ampression, orientà vers i quatr pont cardinaj^[2]. ⁹Da la pì cita ‘d coste protuberanse a l’é s-cioduje un còrn, ch’a l’é vnùit a chërse fòra ‘d misura ant la diression dël meridion, dël levant e dël Pais dlë Splendrior^[3]. ¹⁰A l’é chërsù fin-a a le stèile dël cél, e a l’ha fàit tombé dzora dla tèra na part ëd le stèile e a l’ha scarpisaje^[4]. ¹¹A l’é esaltasse fin-a contra ‘l Cap dj’esse celestiaj^[5]; a l’ha abolì ël sacrifissi përpetuo e a l’ha daje ‘l gir a le fondassion ëd sò Santuari. ¹²An soa përversità, anté che anans as ësmonìa ‘l sacrifissi përpetuo, a l’ha fàit acampé n’armeja^[6]. La vrità a l’é stàita campà për tèra. A l’ha fàit tut sòn e a l’ha trionfà. ¹³Anlora i l’hai sentù un dël pòpol sant^[7] ch’a parlava e n’àutr ch’a-j ciamava: “Vàire ch’a durerà lòn ch’i l’oma vëddù ant la vision: l’abolission dël sacrifissi përpetuo, la profanassion vastatriss, ël Santuari e la milissia celestial ëscarpisà?” ¹⁴Col-lì a l’ha rësponduje: “A durarà dòimilatërzent sèire e matin. Apress ëd lòn ël Santuari a sarà purificà^[8]. ¹⁵Damentre che mi, Daniel, i contemplava la vision e i sërcava ‘d comprend-la, a l’é presentasse dë 'dnans a mi cheidun ch’a l’avìa na sembiansa uman-a. ¹⁶I l’hai ‘dcò sentù na vos uman-a ant tra j’ante dla pòrta d’Ulai e ch’a crijava: “Gabriel!^[9] Fà comprende a sto Daniel la vision!”. ¹⁷Chiel a l’é fasse anans anvers al pòst andova ch’i stasìa mi, e cand ch’a l’é rivà, i son prostërname, sesì da lë sparm, con la facia fin-a a tèra. A l’ha dime: “Fieul d’òm! It l’has da comprende che la vision a riguarda ‘la fin dij temp”. ¹⁸Chiel a parlava ancora cand ch’i son tombà për tèra, ma chiel a l’ha tocame e a l’ha fame sté drit a l’istess pòst che chiel a l’era. ¹⁹Peui a l’ha dime: “I vado a fete conòsse lòn ch’a capiterà al compiment ëd l’Ira përchè già a n’é fissà la Fin.

²⁰Ël moton con ij sò dòi còrn ch’it l’has vëddù a rapresenta ij rè dij Medi e dij Persian. ²¹Ël boch con tanti pluch a l’é l’imperi dij Grech, e sò gran còrn, col ch’a l’ha antra j’euj, a l’é ‘l prim rè. ²²Ij quatr còrn ch’a son surtì apress che ‘l còrn a l’é stàit ësfrisà, a son ij quatr regn ch’a seurtiran da cola nassion, ma ch’a l’avran pa autërtant fòrsa. ²³A la fin ëd coj regn, cand ij gram a saran rivà a sò cò pì àut, as levrà un rè 'nsolent e motobin antrigant. ²⁴Soa potensa a chërserà an fòrsa, ma nen për sò mérit. A farà ‘d dëstrussion da nen chërdse, e a trionferà an tut lòn ch’a farà. A farà ravagi ëd nassion potente e dl’istess pòpol sant^[10]. ²⁵A realiserà lòn ch’a l’è proponusse ‘d fé grassie a soa furbarìa^[11]. Butà ‘d superbia coma ch’a sarà, a farà ravagi ‘d tante nassion ch’as chërdìo sicure. As arvirerà contra ‘l sovran dij sovran^[12], ma a sarà campà giù sensa che gnun a ven-a për giutelo”. ²⁶La vision ëd sèire e ‘d matin ch’a l’é stàita spiegà a l’é vera, pròpi parèj, ma ti ten segreta toa vision, përchè ch’as compirà ant un temp motobin lontan.

²⁷Mi, Daniel, i son restà svers e i son sentume mal për vàire di. Peui i son alvame për porté anans j’afé dël rè, ma i j’era anciarmà da cola vision, përchè gnun a la podìa dëspieghé.

Nòte

1. O:“sitadela”, “piassafòrt”.
2. O: “ij quat vent dël cel”.
3. O: “dla Bela Tèra” (Ebr. הַצֶּבִי [hatsevi] = “la blëssa”), n’arferiment stërmà a la tèra d’Israel. Cfr. 11:16, 41, anté ch’a l’ha la paròla אֶרֶץ (’erets, “tèra”).
4. Cfr. Arvelassion 12:4.
5. O: “Nosgnor”, “l’àngel Michel” (cfr.12:1).
6. O: “an sël sacrifissi a l'ha posà l'abominassion ëd la desolassion”.
7. O: “n’àngel sant”.
8. O: “reintegrà a sò dirit”.
9. Cfr. Luca 1:19-26.
10. O: “‘pòpol dj’àngej sant”.
11. O: “malissia”,
12. O: “ël prinsi dij prinsi”.