La Bibia piemontèisa/Testament Vej/Cronache/2Cronache17

←2 Crònache 16

La Bibia piemontèisa Ij lìber dle Crònache

2 Crònache 18→

La Bìbia piemontèisa - 2 Crònache 17

17

Ieosafat a l’é consacrà rè an Giuda

¹Ël sucessor ëd rè Asa a l’é stàit Ieosafat, sò fieul. Chiel a l’ha rinforsà Giuda për arziste contra j’atach d' Israel. ²A 'ha butà 'd trope an tute le sità fortifià e 'd garnigion militar daspërtut ant ël pais ëd Giuda e ant le sità d'Efraim che sò pare Asa a l'avìa ocupà.

³Nosgnor a l'era con Ieosafat përchè a l’ha seguità l’esempi dij prim agn ëd regn ëd sò pare e a l’ha pa adorà j'ìdoj ëd Baal. ⁴Chiel a l’ha sërcà ‘l Dé ‘d sò pare e a l’ha fàit ubidiensa ai sò comandament e a l’é pa andaje dapress a le pràtiche dël regn d’Israel^[1]. ⁵A l’é parèj che Nosgnor a l’ha rendù frem ël contròl ëd Ieosafat an sù ‘l regn ëd Giuda. Tuta la gent ëd Giuda a l’avìo gòj ‘d porté ‘d cadò a Ieosafat, ch’a l’é parèj dventà motobin rich e rispetà. ⁶A l’é angagiasse ‘d cheur a seguité Nosgnor e a l’ha fàit dësblé tùit ij santuari pagan e ij paloch d’Asera ch’a j’ero an Giuda.

⁷Dël ters ann ëd sò regn, chiel a l'ha mandà ij sò ufissiaj Ben-Ave, Obadia, Zacaria, Netanel e Micaia a mostré ant le sità 'd Giuda. ⁸Lor a l'ero compagnà dai Levita Semaia, Netania, Zebadia, Asael, Semiramot, Jeonatan, Adonia, Tobia e Tob-Adonia e dai sacerdòt Eliseo e Ieoram. ⁹Lor a l’han dotrinà an tut Giuda, an portand con lor còpie dël Lìber ëd la Lege 'd Nosgnor. Për lòn a l'han viagià an tute le sità 'd Giuda e mostrà a la gent.

¹⁰Nosgnor a l'ha butà sparm a tùit ij regn che a riondavo Giuda, parèj ch’a l'han pa pì faje guera a Ieosafat. ¹¹Da part dij Filisté a son portasse 'd tribut a Ieosafat e d'argent an don. J'Arab a l'avìo portaje ëd cabial cit: 7.700 moton e 7.700 boch.

¹²L’influensa e ‘l podej ëd Ieosafat a chërsìa sèmper ëd pì e a l’ha podù tiré sù vàire fortësse e 'd sità 'd proviandament për tut Giuda. ¹³A l’ha dàit esecussion a tanti travaj ant le sità ‘d Giuda e a l’avìa an Gerusalem ëd guerié, òm fòrt e vajant.

¹⁴Soa armeja a l’era formà d’òm ëscond ij sò clan ancestraj. Da Giuda a l’avìa 300.000 guerié ‘d valor organisà an unità ‘d mila soldà sota ‘l comand d’Adna. ¹⁵Jeocanan a në comandava 280.000 sota 'd chiel. ¹⁶A soe dëpendense a-i j'era Amasia, fieul ëd Zicri, che a l'avìa fàit vot ëd serve Nosgnor, e con chiel 200.000 guerié sernù. ¹⁷Da Beniamin, a-i j'era Eliada, òm ëd valor, a guidava 200.000 òm armà d'arch e dë scù ¹⁸e Jeosabad che a portava 180.000 guerié vajant. ¹⁹Coste-sì a j’ero le trope stassionà a Gerusalem për serve ‘l rè, oltre a coj che 'l rè a l'avìa stabilì ant le sità fortificà an tut Giuda.

Nòte

1. Cfr. Luca 1:6; 1Tessalonicèis 2:12; 4:1; 1Rè 12:28,30,33; 13:33,34; 16:31-33; 2Rè 8:18; 17:19; Geremìa 3:7,8; Osea 4:15.