La Bibia piemontèisa/Testament Neuv/Gioann Litre/1Gioann 3

←1 Gioann 2

La Bibia piemontèisa Litre 'd Gioann

1 Gioann 4→

Prima litra 'd Gioann

3

¹Vardé che bela preuva d'amor a l'ha dane 'l Pare: ch'i sio ciamà ij fieuj ëd Nosgnor^[1]! E i lo soma për dabon! Però, coj ch'a son dë sto mond a l'arconòsso nen përchè a conòsso nen Chiel^[2]. ²Car ij mè amis! I soma già fieuj ëd Nosgnor, ma chiel a l'ha 'ncora nen mostrane coma ch'i saroma 'nt ël moment che 'l Crist as manifestrà. I savoma mach ch'i smijeroma a Chiel, përchè i lo vëdroma tal coma ch'a l'é. ³Chionque a l'ha costa speransa an Chiel as manten pur pròpi coma Chiel a l'é pur.

⁴Chionque a fà 'n pecà a contraven a la lege 'd Nosgnor, përchè 'l pecà a l'é lòn ch'a va contra a la lege. ⁵E vojàutri i seve che Gesù Crist, ch'a l'ha 'n Chiel gnun pecà, a l'é manifestasse për gavé ij nòstri pecà^[3]. ⁶Tuti coj ch'a stan an comunion con Chiel a chito 'd fé 'd pecà; tuti coj ch'a seguito a pëcché, a l'é përchè a l'han nen conossulo nì a capìsso chi ch'a sia Chiel. ⁷Car ij mè fieuj! Feve nen ambrojé: col ch'a fà lòn ch'a l'é giust, a mostra ch'a l'é na person-a giusta, tanme Gesù Crist ch'a l'é giust. ⁸Contut, col ch'a viv ant ël pecà, a l'é dël diav, përché 'l diav fin-a dal prinsipi a l'ha mai chità 'd fé 'd pecà. A l'é për sòn ch'a l'é manifestasse 'l Fieul ëd Nosgnor: për dësblé j'euvre dël diav. ⁹Col ch'a l'é nassù da Nosgnor a viv nen ant ël pecà, përchè la smens ëd Nosgnor a stà 'n Chiel e a peul nen përsiste a pëcché da già che a l'é nassù da Nosgnor. ¹⁰A l'é da sòn ch'as peul arconòsse ij fieuj ëd Nosgnor e ij fieuj dël diav: col ch'a fà nen lòn ch'a l'é giust e ch'a veul nen bin a sò frel, a l'é nen ëd Nosgnor. Nosgnor a l'é amor: a l'é për lòn ch'i l'oma da vorèisse bin l'un l'àutr

¹¹Ël messagi ch'i l'eve sentù fin-a dal prinsipi a l'é sto-sì: chi l'oma da vorèisse bin l'un l'àutr^[4]. ¹²I l'oma nen da fé parèj 'd Cain, ch'a l'era dël diav e ch'a l'ha massà sò frel^[5]. Për che motiv, peui, ha-lo massalo? A l'era përchè soe euvre a l'ero grame e cole 'd sò frel a l'ero giuste.

¹³Frej, maravijeve nen se 'l mond a v'ha an òdio: ¹⁴la preuva ch'i soma passà da la mòrt a la vita^[6] a l'é ch'i voroma bin ai nòstri frej e seur an Crist. Col ch'a-j veul nen bin a stà 'ncora 'nt la mòrt. ¹⁵Col ch'a l'ha n'òdio sò frel o seur a l'é tanme 'n sassin, e i seve che gnun sassin ha l'ha vita eterna an Chiel medesim. ¹⁶I savoma lòn ch'a sìa l'amor genit dal fàit che Gesù a l'ha dàit Soa vita për nojàutri. Për lòn ëdcò nojàutri i l'oma da dé nòstra vita për ij nòstri frej e seur. ¹⁷Se quajdun ch'a l'ha 'd bin ëd cost mond a vëdd che sò frel o seur a l'ha da manca e a-j mostra gnun-a compassion, coma podrìa-lo l'amor ëd Nosgnor sté an Chiel?

¹⁸Car ij mè fieuj, sìe nen ëd coj che mach a diso 'd volèj bin a j'àutri: mostrelo con ij fàit ch'a l'é vera. ¹⁹Lòn ch'i foma, nòstre assion, a son cole ch'a mostro ch'i soma dla vrità e, quand ch'i soma dë 'dnans a Chiel, nòstra consiensa a peul sté tranquila.

²⁰Nòstra consiensa a podrìa fin-a condanene, ma Nosgnor a l'é pì grand che nòstra consiensa e i soma sicur che Chiel a conòss ògni còsa. ²¹Car ij mè amis! Se nòstra consiensa an condan-a nen, i podoma ven-e dë 'dnans a Nosgnor con na fiusa ardìa ²²e i podroma arsèive da Chiel tut lòn ch'i-j ciamoma, përchè i ubidioma ai Sò comandament e i foma tut lòn ch'a-j pias. ²³Sto-sì a l'é sò comandament, ch'i chërdo al nòm ëd sò Fieul Gesù Crist e ch'is voroma bin l'un l'àutr, pròpi coma ch'a l'ha comandane^[7]. ²⁴Coj ch'a ubidisso ai Sò comandament a stan an comunion con Chiel, e Chiel con lor. Pì 'd lòn, da sossì i savoma che Chiel a sta an noi: da lë Spìrit ch'a l'ha dane.

Nòte

1. Gioann 1:12.
2. O "ël mond an arconòss nen, përché a l'ha nen arconossù Chiel".
3. Gioann 1:29.
4. Gioann 13:34.
5. Génesi 4:8.
6. Gioann 5:24.
7. Gioann 13:34; 15:12,17.