La Bibia piemontèisa/Testament Neuv/Gioann Litre/1Gioann 2

←1 Gioann 1

La Bibia piemontèisa Litre 'd Gioann

1 Gioann 3→

Prima litra 'd Gioann

2

¹Car ij mè fieuj! I vë scrivo ste ròbe përchè i comëtte nen ëd pecà. Però, se quaidun a l'ha pëccà, i l'oma n'avocat difensor ch'a stà dacant al Pare, Gesù Crist, ch'a l'é 'l Giust. ²A l'é chiel la vìtima^[1] d’espiassion^[2] për ij nòstri pecà, e nen mach për ij nòstri, ma 'dcò për coj dël mond antregh.

L'ubidiensa ai comandament ëd Nosgnor

³Da sossì i savoma ch'i l'oma conossulo, s'i scotoma ij Sò comandament. ⁴Col ch'a dis: "I l'hai conossulo", e ch'a scota nen ij Sò comandament, a l'é 'n busiard, e a-i é nen ëd vrità an chiel. ⁵Ma coj ch'a scoto Soa Paròla a dan la dimostrassion che l'amor ch'a ven da Nosgnor a l'é për dabon rivà an lor a sò compiment. A l'é dë sta manera-sì ch'i podoma savèj ch'i soma an Chiel. ⁶Col ch'a dis d’esse 'n comunion con chiel a l'ha da vive coma Gesù Crist medésim a vivìa.

⁷Car ij mè amis, ël comandament ch'i vë scrivo a l'é nen quaicòsa 'd neuv^[3], ma 'n comandament antich, col ch'i l'eve avù fin-a dal prinsipi. Col comandament antich a l'é la paròla ch'i l'eve già sentù. ⁸Contut, da l'àutra banda, ël comandament ch'i vë scrivo a l'é 'dcò neuv - e sossì a l'é sicur tant an Gesù Crist coma an vojàutri, përchè 'l top a l'é artirasse e già la vera lus a splendriss. ⁹Col ch'a dis ch'a stà 'nt la lus e ch'a l'ha n'òdio sò frel cristian, a stà 'ncora 'nt ël top. ¹⁰Col ch'a veul bin a sò frel cristian, a stà 'nt la lus, e a-i é gnente an chiel ch'a peussa felo antrapé. ¹¹Col ch'a l'ha n'òdio sò frel cristian, a stà 'nt ël top e a marcia 'nt ël top. A sà nen andoa ch'a vada, përchè 'l top a l'ha amborgnalo.

Paròle 'd confòrt

¹²Mè fieuj, i vë scrivo përchè ij vòstri pecà a son përdonà grassie al nòm ëd Gesù Crist. ¹³Vojàutri pare, i vë scrivo përchè ch'i l'eve conossù col ch'a esistìa fin-a dal prinsipi. Giovo, i vë scrivo përchè ch'i l'eve vinciù 'l Malign. ¹⁴Fieuj, i vë scrivo përchè ch'i l'eve conossù 'l Pare. Pare, i vë scrivo përchè i l'eve conossù col ch'a esistìa fin-a dal prinsipi. Giovo, i l'hai scrivuve përchè ch'i seve fòrt. La paròla 'd Nosgnor a stà an vojàutri e i l'eve vinciù 'l Malign.

¹⁵Sté nen tant tacà al mond e a le ròbe ch'a son dël mond: se a quaidun a-j pias ël mond, l'amor dël Pare a peul nen esse an chiel^[4]. ¹⁶Përchè tut lòn ch'a l'é dël mond, le passion carnaj^[5], l'anvìa dj'euj, l'orgheuj 'd possede^[6], tut sòn a l'é nen dël Pare, ma a l'é dël mond. ¹⁷Ël mond con tute soe anvìe a passa, ma coj ch'a fan ël volèj 'd Dé a vivo për sèmper.

Fé atension ai magìster fàuss

¹⁸Mè fieuj, l'ora dariera a l'é rivà. I l'eve 'd sicur sentù dì ch'a sarìa vnù l'Anticrist; bin, già a son spontà tanti anticrist. A l'é da sossì ch'i savoma ch'a l'é l'ora dariera. ¹⁹Costa gent a l'ha chità nòstre cese^[7], ma a l'ero pròpi nen dij nòstri. S'a lo fusso stàit, a sarìo restà ansem a nojàutri. Sossì a l'é capità përch'i vëddèisso che nen tuti a son dij nòstri^[8].

²⁰Vojàutri, tutun, i seve nen coma lor, përché 'l Sant a l'ha dave 'd Sò Spìrit e tuti voi i conòsse la vrità. ²¹A l'é parèj ch'i vë scrivo, nen përchè i conòsse nen la vrità, ma pròpri përchè i la conòsse e përchè gnun-a busiardaria a ven da la vrità^[9]. ²²Chi é-lo, donca, ël busiard? A l'é chicassìa ch'a dis che Gesù a l'é nen ël Messìa. Col ch'a nega 'l Pare e 'l Fieul a l'é n'anticrist. ²³Col ch'a nega 'l Fieul, a l'ha 'dcò nen ël Pare; col ch'a 'rconòss^[10] ël Fieul, a l'ha 'dcò 'l Pare.

²⁴Vojàutri, tutun, i l'eve da resté fedej a lòn ch'a l'han mostrave fin-a dal prinsipi. S'i fareve parèj, i restreve 'n comunion con ël Pare e con ël Fieul. ²⁵Costa-sì a l'é la promëssa che Chiel a l'ha nunsiave: la vita eterna. ²⁶I l'hai scrivuve ste còse rësguard a coj ch'a vorìo ambrojeve.

²⁷Ma vojàutri i l'eve arseivù lë Spìrit Sant e chiel a viv an vojàutri. A l'é për lòn ch'i l'eve nen da manca che quaidun a ven-a a mostreve lòn ch'a sia la vrità. Përchè a l'é lë Spìrit ch'av mostra tut lòn ch'i l'eve da manca 'd savèj, e lòn che chiel a mostra a l'é vera - a l'é nen na busiardarìa. Për conseguensa, d'acòrdi con la dotrin-a ch'i l'eve 'rseivùa da chiel, resté 'n comunion con ël Crist.

Fieuj 'd Nosgnor

²⁸Ora, donca, mè fieuj, resté an comunion con ël Crist, parèj che, ant ël moment che chiel a artornerà, an col dì-là, i sareve pien ëd fiusa e i l'avreve nen da stërmeve da chiel për la vërgògna! ²⁹I savoma che 'l Crist a l'é giust e i savoma 'dcò che tuti coj ch'a fan lòn ch'a l'é giust a son ëd fieuj 'd Nosgnor^[11].

Nòte

1. O "ël sacrifissi".
2. O "propissiassion".
3. Gioann 13:34.
4. O "Avèj nen d'amor pr' ël mond né për le còse ch'a son dël mond; se quaidun a l'ha d'amor për ël mond, l'amor dël Pare a sta nen an chiel".
5. O "concupissensa dla carn","anvìa dla carn".
6. O "la superbia dla vita".
7. O "a son sortì d'an mes a noi".
8. O "Ch'a l'abio bandonane a l'é la preuva ch'a 'n efet a l'ero nen dij nòstri".
9. O "i l'eve la conossensa".
10. O "confessa"
11. O "a son nassù da Chiel".