La Bibia piemontèisa/Testament Vej/Surtia/Surtia 26
Surtìa
[modifiché]26
[modifiché]La strutura dël Tabërnàcol
[modifiché]
1Për lòn ch’a riguarda ël Tabërnàcol, it lo faras con des taj ëd tèila fin-a ëd damasch. A l’avran d’avèj na tinta porpra rossa e scarlata, decorà con figure ‘d cherubin brodà ‘d manera artìstica. 2Tùit ij taj ëd tèila a l’han da esse dl’istessa mzura: quatòrdes méter ëd longhëssa për doi ‘d larghëssa. 3Gionta 'nsema sinch ëd coste tende, e fà l’istess con j’àutre sinch. 4Peui fà dj’àsole ‘d color viòla an sël bòrd ëd la tenda ‘d fòra dla prima série; fà l’istess al bòrd ëd la tenda ‘d fòra dla sconda série. 5Fà sinquanta àsole an sla prima tenda e sinquanta àsole an sël bòrd ëd la tenda ‘d fòra dla sconda série ‘d tende; j’à(n)sole a saran an corispondensa j’un-e con j’àutre. 6Fà ‘dcò sinquanta bócle d’òr e gionta ij tèil l’un a l’àutr pr’ ël mojen ëd le bócle parèj che ‘l Tabërnàcol a forma un tut ùnich.
7Antërsa 'ncora óndes tèil ëd pel ëd crava për fé na tenda ch’a staga dzora dël Tabërnàcol. 8J’óndes tèil a l’han da avèj l’istessa mzura: quindes méter ëd larghëssa për doi ‘d larghëssa. 9Gionta 'nsema sinch tèil an tra ‘d lor, e d’àutri ses an tra ‘d lor. It dobieras andaré ‘l sest tèil ësversàndlo an sla part an facia dla tenda. 10Fà sinquanta àsole an sla bordura dël tèil ëd fòra dla prima série e sinquanta àsole an sla bordura dël tèil ëd fòra dla sconda série ‘d tèil. 11Fà ‘dcò sinquanta bócole d’aram e it faras intré le bócle ant j’àsole. It giontras parèj la tenda ‘d manera ch’a forma ‘n tut ùnich. 12Ore, la part ch’a resta dij tèil ëd la tenda, ël mes tèil ch’a resta, a pendrà darera dël Tabërnàcol, 13e 'd la part dë dzora dla tenda, as në spartirà mes méter për mincadun dij fianch dël Tabërnàcol. A resterà parèj dël tut quatà. 14Për la tenda, peui, it l’has da fé na covertura ‘d pèil ëd moton tensùe ‘d ross e dëdzora 'ncora na covertura ‘d pèil ëd vitel ëd mar[1].
La boscamenta
[modifiché]15Le plance ‘d bòsch për sostnì ‘l Tabërnàcol, da butesse drite, fàje ‘d bòsch ëd gasìa. 16Minca na plancia a l’ha da esse longa vint branche e larga tre, 17con doi morion gionzù un a l’àutr da ‘n rinfòrs. Tute le plance dël Tabërnàcol a l’avran da esse dj’istesse mzure. 18Fane vint për la banda vers ël mesdì, a sud. 19Fà ‘dcò quaranta sòcoj d’argent sota le vint plance, doi pé sota minca n’ass, për ij sò doi sòcoj d’argent, e doe basi sota l’àutra plancia për ij sò sostegn. 20Për lë scond fianch dël Tabërnàcol, anvers tramontan-a, fà ‘dcò d’àutre vint plance. 21Con quaranta sòcoj d’argent sota i vint ass, doi për minca n’ass. 22Për la part darera dël Tabërnàcol, anvers ponent, faje ses plance. 23e doi an pì për ij sò doi canton ch’a son daré. 24Le plance a saran assemblà con doi tòch istess cobià e giontà ‘d pianta da sota fin-a dzora, a l’autëssa dël prim anel. A l’ha da fesse parèj 'dcò con ij doi ass dij doi canton. 25An total, a-i saran eut plance con ij sò sòcoj, l’é a dì, doi sòcoj per minca na plancia.
26Fà ‘dcò ‘d traverse ‘d bòsch ëd gasìa: sinch për le plance d’un fianch dël Tabërnàcol, 27sinch për le plance dl’àutra banda dël Tabernàcol, e sinch ëd pì për le plance ‘d la part darera, anvers ponent. 28La traversa ‘d mes, a metà autëssa dj’ass, a l’ha da dëstraverseje da na banda a l’àutra. 29Le plance e le traverse a l’han da esse tute laminà d’òr, e ‘dcò d’òr a saran ij sò anej, ch’a serviran për anfileie le traverse, e ‘dco cole-lì a l’han da esse arvëstìe d’òr. 30Ël Tabërnàcol a l’ha da esse fabricà precis conform a la nòrma ch’i l’hai mostrate an sla montagna.
Ël Vel
[modifiché]31Fà ‘n Vel bin antorzù ‘d porpra violëtta, porpra rossa, ëscarlat e damasch decorà con figure ‘d cherubin brodà ‘d manera artìstica. 32A l’avrà da esse pendù a quat colòne ‘d gasìa, laminà d’òr, con ëd rampin d’òr e ch’as pogio ansima a quat sòcoj d’argent. 33Ël Vel a l’ha da esse pendù sota j’àsole e ambelelà, darera dël Vel, faje intré l’Èrca dla Testimoniansa. Ël Vel a l’avrà da separé ‘l Leu Sant da ‘l Leu Santissim[2]. 34Dzora dl’Èrca, ch’a conten lë Strument dl’Aleansa e ch’as treuva drinta ‘l Leu Santissim, a l’avrà da butesse ‘l Coèrcc dël Përdon. 35La Tàula, a l’opòst, a l’ha da esse butà fòra dal Vel, an sla part a mesdì dël Tabërnàcol; nopà, la Tàula a sarà butà a tramontan-a. 36Për l’intrada dla tenda, fàje n’àutr vel torzù ‘d porpra viòla e rossa. ëd porpra scarlata e damasch, travaj ëd brodeus. 37Për ël Vel a l’é da fesse sinch colòne ‘d gasìa ch’a saran ëdcò patinà d’òr. So rampin a saran d’òr e sinch sòcoj d’aram a saran fondù.