La Bibia piemontèisa/Testament Vej/Samuel/2 Samuel 4

←2 Samuel 3

La Bibia piemontèisa Prim e scond lìber ëd Samuel

2 Samuel 5→

La Bìbia piemontèisa - 2 Samuel 04

2 Samuel

4

Sassinament d’Isboset

¹Cand Isboset, fieul ëd Saul, a l’ha savù che Abner a l’era mòrt a Ebron, a l’é përdusse d’ànim e tut Israel a l’é restane stravirà.

²Ël fieul ëd Saul a l’avìa dòi òm ch’a l’ero d’ufissiaj specialisà ant j’incursion. As ciamavo Bana e Recab, fieul ëd Rimon ëd Berot, ëd la tribù ëd Beniamin (Berot a l’é da consideresse ‘d pertinensa ‘d Beniamin ³përchè coj ëd Berot a l’ero scapà a Ghitaim e ancora al di d’ancheuj a n’han la residensa coma dj’imigrà). ⁴Ore, Giònata, fieul ëd Saul, a l’avìa ‘n fieul ch’a l’era në stròpi da tùit e dòi pé^[1]. A l’avìa sinch agn cand la neuva al rësguard ëd Saul e Giònata a l’era rivà da Iesrel. Soa guernanta a l’avìa tiralo sù e a l’era scapà, ma ant la pressa dë scapé, chiel a l’era tombà a tèra e a l’era restà në stròpi. Sò nòm a l’era Mefiboset.

⁵Ora, ij fieuj ëd Rimon ëd Berot, Recab e Bana, a l’ero ancaminasse ant l’ora pì càuda dël di për andé a ca ‘d Isboset, damentre che chiel as godìa sò arpòs dël dòp-disné. ⁶A son intrà antëcà fasend visa ‘d pijé ‘d gran e a l’han frapalo a mòrt ant lë stòmi. Apress, Recab e sò frel Bana a son ëscapà.

⁷A l’ero intrà antëcà^[2] damentre che Isboset a l’era ‘n camin d’arposesse an sò let an soa stansia. A l’han frapalo a mòrt e peui a l’han tajaje la testa. Con cola testa a l’avìo marcià për tuta la neuit për l’Arabà. ⁸A Ebron a l’han portaje a David la testa ‘d Isboset, e a l’han dije: “Varda-sì la testa d’Isboset, fieul ëd Saul, ël tò nemis, col ch’a l’avìa sërcà ‘d massete! Ancheuj Nosgnor a l’ha rendù giustissia al rè, nòst signor, contra Saul e ij sò dissendent!”.

⁹Ma David a l’ha rësponduje a Recab e a sò frel Bana, fieuj ëd Rimon ëd Berot. “Com a l’é vera che Nosgnor a l’ha salvame da tùit ij pericoj, ¹⁰it diso che col ch’a l’avìa nunsiame che Saul a l’era mòrt, bele s’a pensava d’esse arseivù coma ‘n messagé ‘d bon-e neuve, i l’hai ciapalo e massalo a Ziclagh. Cola-lì a l’é stàita soa ‘rcompensa^[3]! ¹¹Ore, vojàutri, criminaj ch’i seve, i l’eve sassinà an soa ca, an sò let midem, n’òm nossent. Pensev-ne adess ch’iv ciamrai nen cont ëd sò sangh e ch’iv fasa pa dësparì da la fàcia dla tèra?”.

¹²A l’é parèj che David a l’ha daje l’órdin ai sò òm ëd buteje a mòrt. Apress, a l’han tajaje le man e ij pé e a l’han penduje, coj dòi òm, dacant a j’aque d’Ebron. Ma la testa d’Isboset a l’han fala sotré ant la tomba d’Abner, a Ebron.

Nòte

1. Cfr. 2 Samuel 9:3.
2. Sta-sì a l’é na conta pì detajà dl'istess episòdi.
3. Cfr. 2 Samuel 1:1-16.