La Bibia piemontèisa/Testament Vej/Salm/Salm 66

←Salm 65

La Bibia piemontèisa Ij Salm

Salm 67→

Ij Salm

La Bìbia piemontèisa - Salm 066

66. Crijé fòrt vòste làude a Nosgnor da tuta la tèra

Ël Salmista a làuda Nosgnor përchè a l’ha delivrà sò pòpol da na crisi.

¹Për ël magìster dla mùsica. Da canté. Un Salm. Crijé fòrt vòste làude a Nosgnor da tuta la tèra. ²Canté ‘d làude për la majestà ‘d sò nom. Dèje l’onor ch’as mérita! ³Dì a Nosgnor: “Lòn ch’it fase a l’é përdabon ampressionant! Për motiv ëd toa potensa granda, dë 'dnans ëd ti ij tò nemis as fan cit për la tëmma. ⁴Tuta la tèra as buta an gënojon dë 'dnans a ti e a canta toe làude. A canta ‘d làude a tò nom! [Intërludi].

⁵Vnì, e sie ij testimòni dj’amprèise^[1] ‘d Nosgnor! Lòn che chiel a fà an favor ëd sò pòpol a l’é përdabon ampressionant^[2]! ⁶A l’ha cangià ‘l mar an tèra sùita^[3]. Lor a l’han passà ‘l fium a pé^[4]. Arlegromse ‘d chiel ambelelà! ⁷Nosgnor a dòmina con sò podèj për sèmper! A varda bin lòn ch’a fan le nassion. J'arviros^[5], testard, a dovrìo nen tant fé ij galèt! [Intërludi].

⁸Laudé Nosgnor, vojàutre tute le nassion! Con viva vos fé sente vòstre làude a chiel! ⁹Chiel a guerna nòstra vita e a l’ha nen lassà che ij nòstri pé a sghijèisso. ¹⁰Përchè ti, Nosgnor Dé, it l’has butàne a la preuva, it l’has mondane coma d'argent arfinà. ¹¹It l’has fàne tombé ant un trabucèt, it l’has fàne tribulé. ¹²It l’has lassà che dj’òm a cavalchèisso dzora nòstre teste^[6]. ¹³I l’oma passà travers ël feu e travers ëd l’eva; peuj, nopà, it l’has portàne fòra ant un pòst largh e duvert.

¹⁴I intrëraj an tò templi con dj'olocàust, i compiraj ij vot ch’i l’hai fàte. ¹⁵I të smonrai ‘d bestie butà a l’angrass coma ‘d sacrifissi complèt, ansem al bon odor dij moton sacrificaj.

¹⁶Vnì, scotè, vojàutri ch’i seve fidej a Nosgnor! Iv conterai 'd lòn che Nosgnor a l’ha fame. ¹⁷A vos àuta i l’hai ciamà sò agiut e i l’hai laudalo con viva vos. ¹⁸Se mi i l’avèissa coà ‘l pecà an mè cheur, Nosgnor a l’avrìa pa scotame. ¹⁹Nopà, Nosgnor a l’ha scotame, a l’ha scotà mia sùplica. ²⁰Nosgnor a mérita ‘d làude, përché chiel a l’ha pa arfudà mia sùplica, nì chità ‘d vorèjme bin!

Nòte

1. D’at, d’assion, lòn ch’a fa.
2. O “Lòn che chiel a fa a l’é ampressionant e motobin pì grand che qualsëssìa còsa che l’òm a podrìa mai fé”.
3. Cfr. Surtìa 14:21.
4. Cfr. Giosuè 13:14-17.
5. Al podèj ëd Nosgnor.
6. O “seufre”