Introdussion

Ël lìber ëd Sacarìa as adressa a j'Israelita ch'a j'ero tornà an patria da l'esili. Soa intension a l'é 'd'arviscolé an lor la speransa përchè ch'a j'ero motobin dëscoragià për le dificoltà 'd soa vita 'd minca di. A vëddìo nen ël compiment ëd lòn che ij temp a smijavo nunsié. An efet, ij disórdin polìtich ch'a l'ero sortije dòp ëd la mòrt ëd Cambise, fieul ëd Ciro, rè 'd Persia, a l'avìo portaje a pensé che la fin dij temp e la vnùa dël Signor a fusso dsorëstant. Ël rè Dario, contut a l'avìa ristabilì sò domini an sl'imperi persian e lolì a l'avìa faje perde soe speranse 'd lor.

Ij prim eut capìtoj d'ës liber a presento l'atività 'd Sacarìa a Gerusalem dal 520 al 518 a. C. (cfr. 1:1,7; 7:1), ant ël perìod midem andova ch'a l'avìa predicà 'l profeta Agé. Ij dòi përsonage ch'a realiso la restaurassion e ch'a son ij segn ëd la speransa për n'avnì ch'a sia mej, a son ël governator Zorobabel e 'l grand sacerdòt Giosuè. Pì tard, l'aspetativa dla vnùa 'd Dé coma rè dla tèra e la speransa dla mission ëd n'òm sernù e mandà da chiel, as fan sempe pì fòrt. A l'é 'd costi sogèt ch'a trata la sconda part d'ës liber che, për ël dësvari dë stil e contnù, a l'é posterior ëd la prima e d'origin diversa, vàire savant a son ëd l'opinion ch'a sia stàita butà ansema vers la fin dël sécol quart a. C.

Ël lìber ëd Sacarìa as divid an doe part diferente. La prima part (capìtoj 1-8) a buta ansema 'l rendicont d'eut vision, ch'a son compagnà da 'd promësse 'd pas e 'd benesse. Ël profeta a nunsia a la gent ëd sò temp che lor a l'han pa sperà a dzoneus. A ventrà arcostruve 'l Templi për arsèive Nosgnor, përchè chiel a ven për ristabilì sò regn e a benedì 'l pòpol salvà da chiel e riunì. Ant la sconda part (capìtoj 9-14) ël profeta a nunsia che 'dcò j'àutre nassion, apress d'avèj patì 'l giudissi, a faran part ëdcò lor dël pòpol ëd Nosgnor. Cand ch'a sarà tacà da le nassion, chiel a sarà purificà dai sò pecà e, ant la bataja dariera, Nosgnor a lo salverà. An costa sconda part a seurt an evidensa particolar un përsonage ch'a stabilirà 'l regn ëd Nosgnor, e che a l'é presentà coma 'n rè ùmil e vitorios, coma 'n bon bërgé, n'òm ferì e butà a mòrt. J'evangelista a l'han arpijà costi element për presenté la përson-a e la mission ëd Gesù Crist, dzortut ant la conta dla passion (cfr. Maté 21:4-5; 26:31; Gioann 19:37).

Schema

Prima part:

Le eut vision ëd Sacarìa -1:1-7,14
Promësse 'd pas e 'd benedission - 8:1-23

Sconda part:

Israel e j'àutre nassion - 9:1-11,17
La Gerusalem ëd l'avnì - 12:1-14:21