La Bibia piemontèisa/Testament Vej/Numeri/Numeri 10

←Numeri 9

La Bibia piemontèisa Nùmeri

Nùmeri 11→

Ij nùmer

La Bìbia piemontèisa - Numer10

10

Le trombe d’argent

¹Nosgnor a l'ha parlaje ancora a Mosè e a l'ha dije: ²Fate doi trombe d'argent; it jë faras travajé a sbàuss con ël martel. A podran servì a ciamé ansema la comunità e a deje al campament ël signal ëd partensa. ³Ant ël moment ch'a sonran, tuta la comunità as rassëmblerà davzin a ti a l'intrada dla Tenda dël Rëscontr. ⁴ Ma se a në sonerà mach un-a, a saran ij rapresentant, ij cap ëd j’unità d'Israel ch'a vniran ansema da ti. ⁵Ant ël moment che i sonereve n'arson d'alarme^[1], ij campament che as treuvo a levant as butran an marcia. ⁶Cora che i sonereve na sconda vira 'l son d'alarme, a saran j'acampament che as treuvo a mesdì che as butran an camin; as soneran arson d'alarme cand a dovran butesse an marcia. ⁷Ant ël moment che a dev esse convocà la comunità, i sonereve, ma pa n'arson d'alarme. ⁸L’ancombensa ‘d soné la tromba a l’avran ij sacerdòt, ij fieuj d’Aron. Sta-sì a sarà n’istitussion përpetua, tant për vojàutri che pr’ ij vòst dissendent.

⁹Cand ch’i sareve an vòst pais, s’i intre an guèra contra ‘n nemis ch’av ataca, i sonereve le trombe con n’arson d’alerta: Nosgnor vòst Dé as n'aviserà 'd vojàutri e i sareve liberà dai vòstri nemis. ¹⁰Ij dì ‘d festa, ëd festa granda e ‘d selebrassion ëd ël prim dì dël mèis, i sonereve le trombe durant j’olocàust e ij sacrifissi ‘d comunion. Parèj vòst Signor a tnirà vojàutri sempre present. Mi i son ël Signor, vòst Dé”.

Partensa dal Sinai

¹¹Dlë scond ann, dlë scond mèis, ël vint dël mèis, la Nìvola a l'é aussasse dzora dla Tenda dël Rëscontr. ¹²J'Israelita a son partì dal desert dël Sinai conform a sò órdin ëd marcia; la Nìvola a l'é fermasse ant ël desert ëd Paran. ¹³A l’era la prima vira ch’a l’ero butasse an marcia, conform al comand dàit da Nosgnor për mojen ëd Mosè. ¹⁴Ël drapò dël camp dla tribù 'd Giuda a l'é col ch'a l'é bogiasse për prim, spartì conform a soe unità. Nacson, fieul d'Aminadab a comandava l'armeja 'd Giuda. ¹⁵Netanel ben Suar, a comandava l'esércit dij fieuj d'Issacar; ¹⁶a la testa dël contingent ëd la tribù 'd Zabulon, conform a soe unità, a j'era Eliab fieul ëd Chelon. ¹⁷La Tenda a l'é stàita dësmontà e ij fieuj ëd Gherson e coj ëd Merari a son portasse an camin an portand ël Tabërnàcol. ¹⁸Peui a l'é bogiasse l'ansëgna dël campament ëd Ruben, dividù an soe trope. Elisor ben Sedeur, a comandava l'armeja 'd Ruben. ¹⁹Selumiel, fieul ëd Surissadai, a comandava 'l trop ëd la tribù 'd Simeon. ²⁰Eliasaf ben Deuel, a comandava l'armeja dij fieuj ëd Gad. ²¹Apres a son partì ij fieuj ëd Cheat, an portand d'asi sacrà; j'àutri a dovìo drissé ‘l Tabërnàcol, anans che costi-sì a rivèisso. ²²An séguit, ël drapò dël camp d'Efraim a l'é butasse an marcia, a l'era dividù scond soe unità. Elisama, fieul d'Amiod, a comandava la schiera d'Efraim. ²³Gamliel ben Pedasor, a comandava l'armeja dla tribù dij fieuj ëd Manasse. ²⁴Abidan, fieul ëd Ghideoni a l'era a la testa dl'esércit dla tribù 'd Beniamin. ²⁵Apress, a l'é bogiasse l'ansëgna dl'acampament ëd Dan, dividù conform a soe unità d'armeja, an formand la retroguardia 'd tùit ij contingent. Achieser fieul d'Amisadai, a l'era al comand ëd l'esércit ëd Dan. ²⁶Paghiel, fieul d'Ocran, a l'era a cap ëd la tropa dla tribù d'Aser, ²⁷e Achira, fieul d'Enan, a comandava l'armeja dla tribù 'd Neftali. ²⁸Cost a l'é stàit l'órdin ëd marcia dj'Israelita, scond soe unità. E a son partì.

Ël viagi dël pòpol pr’ ël desert

²⁹Mosè a l'ha dije a Obab, fieul ëd Reuel, Madianita, mëssé 'd Mosè: “Nojàutri i soma an comin ëd parte, anvers al pòst che Nosgnor a l'ha dit: ‘A sarà dàit a vojàutri an proprietà’. Ven con nojàutri, e it faroma dël bin, përchè Nosgnor a l'ha promëttù 'd feje dël bin a Israel”. ³⁰A l'ha rësponduje: “Mi i vnirai pa! Nopà i tornerai a mè pais da mia gent”. Mosè a l'ha replicà: ³¹“Chita nen nojàutri, për ël motiv che ti 't conòsse ij leugh andova ch'i butroma camp ant ël desert e ti it saras nòstri euj për fene da guida. ³²S’it ven-e con noi, tut ël bin che Nosgnor a farà a nojàutri, noi i lo faroma a ti!”.

³³Përparèj che a son partì dal mont ëd Nosgnor e a l'han fàit tre di 'd marcia; l'Èrca dl'Aleansa dël Signor a j'andasìa anans për tre di 'd marcia për serchéje un pòst a la sosta. ³⁴La nìvola dël Signor a l'era pròpi dzora 'd lor ant ël di, dal moment ch'a l'ero partì. ³⁵Cora che l'Èrca a partìa, Mosè a disìa: Àuss-te, Nosgnor, e che ij tò nemis a sio dësbërgiairà, e coj ch'at han an òdio, che lor a scapo da ti”. Ant ël moment che as posava a disìa: “Torna Nosgnor! A son mirié jë strop d’Israel!^[2]”.

Nòte

1. La paròla për “alarme” a l’é  תְּרוּעָה (truʿah). La rèis dël verb a veul dì “dé n’arson ëd tromba”, ma quaivòta a peul significhé: “dé un crij ‘d guèra” (Giosuè 6:10).
2. Cfr. Salm 68:1