Geremìa[modifiché]

30[modifiché]

Promëssa ‘d liberassion[modifiché]

¹Nosgnor a l'ha parlà a Geremìa. A l’ha dije: ²“Sossì a l’é lòn che ‘l Signor, ël Dé d’Israel, a dis: “Scriv ant un lìber^[1] tute le paròle ch’i son an camin d’adressete. ³Varda: a-i rivrà ‘l temp ch’i ranvërsrai la sòrt ëd mè pòpol, Israel e Giuda’, a dis ël Signor. ‘I-j farai torné ant ël pais ch’i l'avìa daje ai sò antich e lor as në pijeran torna ‘l possess’”.

⁴Parèj, vardé lòn ch’a dis ël Signor a propòsit d’Israel e ‘d Giuda. ⁵Vera, vardé lòn che chiel a dis: “I sentoma ‘d crij dë sparm; a-i é dë sbaruv e gnun-a pas. ⁶Donca ciamé pura e penseje da bin: Miraco che n’òm a partorissa na masnà? Përchè, antlora, i s-cèiro tuti j’òm con le man an sij ren parèj ëd fomne an condission? Përchè tuti sti moro a son fasse niss? ⁷Maleur! Che ‘d temp ëd tribulassion a son ësti-sì për ij dissendent ëd Giacòb! Tutun, da tut sòn lor a saran salvà. ⁸Col di-là,” a dis ël Signor ëd l’Univers, mi i sbriserai ël giov che a greva dzora 'd tò cupiss e i s-ciaprai toe chen-e. Antlora it dovras pa pì sërve ‘d forësté, ⁹ma Israel e Giuda a serviran ël Signor tò Dé e tò rè a sarà un dissendent ëd David - col ch’i farai seurte për ti. ¹⁰Anlora gnun-e tëmme, Giacòb, mè servent; pì gnun ësburdiment, Israel”, a dis ël Signor. “Përché mi i farai artorné a ca ti e ij tò dissendent dai pais lontan anté ch’it j’ere stàit esilià e crasà. Ij dissendent ëd Giacòb a artornran a soa tèra ‘d lor e a godran la pas. Lor a vivran ambelelà an tuta sicurëssa e gnun a-j farà pì spavent. ¹¹Përchè mì, ël Signor i fortisso ch’i stago con ti e it salverai. I dësblerai dël tut le nassion andova ch’i l’avìa sbardlate. Nò, ti 't dësblerai pa dël tut. A l’é sicur, contut, ch’it l’avìe bin da patì mè giudissi, ch’a l’é sèmpe giust e mzurà, përchè mi i lasso gnun ch’a vada 'mpunì^[2]”.

¹²Pì ‘d lòn, Nosgnor a dis al pòpol ‘d Sion: “Toe fërleche as peulo pa sanesse, toe ferìje a son greve. ¹³A-i é gnun che a sosten-a toa càusa; për n'ólciola, pa 'd meisin-e, për ti gnun-e varision. ¹⁴Tùit ij tò moros - ij tò aleà - a l'han dësmentiate, at sërco pa pì! Mi i l'hai frapate com as bat un nemis. I l’hai date un castigh rudi për tùit ij tò pecà, për toe colpe greve. ¹⁵Përchè ti ‘t fase le lande për toe ferìje, përchè ti ‘t dise che tò dolor as peul pa curesse? Mi i l’avìa bin da castighete për tùit ij tò pecà e për toe colpe greve. ¹⁶Ma tuti coj ch’at vorìò dësblete a saran dësblà; tuti coj ch’a l’avìo vorsù dëspojete a saran dëspojà, e tuti coj ch’a l’avìo vorsù marodete a saran votà al ravagi. ¹⁷Vera, mi it farai artorné an salute, mi i varirai tute toe ferìje. Mi, ël Signor, i lo fortisso! Propi ti, ch’it j’ere stàita ciamà l’Arpudià, Sion, che gnun at dasìa dament”.

¹⁸Nosgnor a dis parèj: “Vardé, i vado torna a buté an pé le cà an ruin-a dij dissendent ëd Giacòb, i l’avrai compassion dij sò tèit crovà. Tute le sità a saran torna arcostruìje dzora ‘d soe fondamenta d'antan. Ij fortilissi a saran restaurà propi là ‘ndova ch’a-i j’ero na vòta. ¹⁹Da coj pòst là as sentiran torna ‘d cant ëd ringrassiament, ëd rije e gòj granda. I-j farai aumenté ‘d nùmer e pì nen calé. I-j rendrai onor e a saran pa pì meprisà. ¹Ij dissendent ëd Giacòb a l’avran torna tùit ij privilegi ch’a l’avìo anans. Soe ciambreje a saran ristabilìe an mè favor e mi i castijerai tuti coj ch’a l’avìo daje ‘d tribulassion. ²¹Ij sò cap a saran elegiù da lor midésim, sò rè a surtirà d'an mes ëd lor. I starai a scoteje e i j’anvitrai a acostesse a mi e lor a lo faran. As avzinrà a mi gnun che mi prima i l’avìa pa invità. Mi, ël Signor i lo fortisso. ²²Antlora vojàutri i sareve torna mè pòpol e mi i sarai vòst Dé. ²³Vardé: l’ira ‘d Nosgnor a calerà tanme n’orissi. Coma na tempesta greva a calerà an sla testa dla gent grama. ²⁴Ël fot afoà ëd Nosgnor as dëstornerà pa fin-a ch'a l'abia pa compì e realisà ij dissegn ch’a l’avìa an cheur. Ant ij temp ch’a vniran i capireve ‘l sens ëd tut sossì.

Nòte[modifiché]

↑ O “un ròtol”.
↑ 30:10-11 cfr. Geremìa 46:27-28.

[1] O “un ròtol”.

[2] 30:10-11 cfr. Geremìa 46:27-28.

[1]

[2]