La Bibia piemontèisa/Testament Neuv/Pero/1Pero 1

←Giaco 5

La Bibia piemontèisa Litre 'd Pero

1 Pero 2→

1 Pero

1

Salut

¹Pero, apòstol ëd Gesù Crist, a coj ch’a vivo com ëd forësté e ch’a son stàit dësperdù^[1] 'nt ël pais dël Pònt, an Galàtia, an Capadòcia, ant la provinsa dl’Asia e an Bitìnia, ²e ch’a son stàit sernù conforma a la preconossensa ‘d Nosgnor Dé ‘l Pare, butà da banda^[2] da lë Spìrit për l’ubidiensa a Gesù Crist e për l’aspersion ëd sò sangh; che la grassia e la pas av sìo dàite an abondansa^[3].

Na neuva nàssita a la gòj e la santità

³Ch’a sìa benedet Dé, ël Pare ‘d Nosgnor Gesù Crist, che për soa granda misericòrdia, a l’ha argenerane për avèj na speransa viva për ël mojen dl’arsurression ëd Gesù Crist dai mòrt, ⁴për oten-e n’ardità ch’a peul nen vastesse, anflesse o sfaussesse, e ch’a l’é conservà 'nt ij cej për nojàutri, ⁵ch’i soma guernà për la potensa ‘d Nosgnor, për la fej, parèj ch’i otnioma la salvëssa, ch’a l’é davzin a esse arvelà 'nt ij dì darié.

⁶A l’é tut sòn ch’av dà na granda gòj, combin ch’i l’eve bin da soporté, për ël moment, ëd diverse preuve, ⁷parèj che la preuva ‘d vòstra fej, ch’a l’é pì pressiosa che l’òr - l’òr che, combin ch’a perìssa, a l’é provà dal feu - av rendrà làuda, glòria e onor quand che Gesù Crist a sarà arvelà. ⁸Combin che chiel i l’eve mai vëddulo, tutun i-j veule bin. Adèss i lo vëdde nen, epura i chërde an chiel. A l’é për lòn ch’i l’eve na gòj gloriosa ch’as peul gnanca dëscrive, ⁹e i seve ‘n camin a vagné ‘l bu ëd vòstra fej, visadì la salvëssa 'd vòstre ànime.

¹⁰Al rësguard ëd costa salvëssa, ij profeta, ch'a l'han fàit la predission dla grassia ch'a l'era arservà për voi, a l'han arsercala e investigala con diligensa. ¹¹A l'han sondala për comprende 'l temp e le circostanse che lë Spìrit dël Crist an lor a mostrava quand che chiel^[4] a-j rendìa testimoniansa an antìcip dij patiment ch'a deuvìo rivé al Crist e dla glòria ch'a sarìa seguitane.

¹²A l'han comprendù për arvelassion che a l'era për nojàutri e nen për lor ch'a rendìo un servissi. A l'é propi lòn ch'a l'han nunsià coj ch'a l'han proclamave l'Evangeli për lë Spirit Sant mandà dal cél, còse che fin-a j'àngej dël cél a na son gelos.

¹³Për costa rason, che vòstra ment a sia pronta a l’assion^[5]. Resté bin dësvij^[6] e vòstra speransa a sia sostnùa dal pensé che un dì, quand che ‘l Crist as manifesterà, a l'é sicur ch'i arseivreve 'l don ëd la grassia.

¹⁴Coma 'd fieuj ubidient, lasseve pì nen andé a sodisfé ij desideri dla carn tanme i fasie na vòta quand ch'i j'ere 'nt l'ignoransa, ¹⁵ma sicoma col ch'a l'ha ciamave a l'é sant, procuré d'esse sant ëdcò vojàutri 'nt tut lòn ch'i feve^[7], ¹⁶përchè ch’a l'é scrit: "I sareve sant përché Mi i son sant".

¹⁷Quand ch'i preghe, i ciame Dé vòst Pare. Chiel a giudica sensa avèj rësguard a l'aparensa dle përson-e, conforma lòn che ciaschëdun a fà. Për costa rason, ant ël temp ch'i l’eve da passé an ësto mond, porteve sèmper con grand rispet anvers ëd Chiel.

¹⁸I conòsse la manera ch'i seve stàit liberà da la vita sensa sens^[8] ch'i l'eve ardità dai vòstri vej^[9] - ël pressi 'd vòst riscat a l'é nen stàit pagà con d'òr o d’argent, ch'a son ëd ròbe sogetà a la corussion, ¹⁹ma con ël sangh pressios ëd n’agnel sensa difet e sensa macia, visadì ‘l Crist, ch'a l'é sacrificasse për vojàutri. ²⁰Chiel a l'era stàit predestinà^[10] 'dnans ëd la fondassion dël mond, ma a l'é manifestasse për vojàutri an ësti temp-sì, ch'a son ij darié. ²¹Për sò mojen, vojàutri i chërde an Nosgnor, ch'a l'ha arsussitalo dai mòrt e a l'ha daje glòria, parèj che adèss vòstra fede e vòstra speransa a son fissà an Nosgnor.

²²Apress d’avèj purificà vòstra ànima con l'ubidiensa a la vrità për manifesté n'amor sincer da frej, vorèive bin l'un a l'àutr con un cheur pur. ²³I seve nassù na sconda vira^[11] nen da na smens ch'a marsa^[12] ma da na smens ch'a peul nen andé 'n corussion, visadì la Parola 'd Nosgnor viva e eterna^[13].

²⁴Përché: "Tuti a son^[14] parèj ëd l'erba, e tuta la glòria dl'òm parèj ëd la fior ëd l'erba; l'erba a sëcca e le fior as anfiapisso, ²⁵ma la Paròla ‘d Nosgnor a dura për sèmper". Costa-sì a l'é la Paròla ch'a l'é stave nunsià.

Nòte

1. O: “ant la dëspersion”.
2. O: “santificà”.
3. O: “av sio moltiplicà”.
4. Visadì lë Spìrit.
5. Che vòstra ment a sia 'nt la condission ëd coj ch'a gropo soa longa vesta ai fianch pront për la corsa përchè a-j fasa nen antrapé.
6. Nen gargh, molanciù, ma dësgagià, an pien contròl ëd vojàutri.
7. O "an tuta vòstra condòta".
8. O "condòta veuida".
9. O "ch'a l'han mostrave ij vòstri pare".
10. O "preordinà".
11. O "I seve stàit argenerà".
12. O "corutibil".
13. O "përmanent".
14. O "Ògni carn a l'é".