La Bibia piemontèisa/Testament Neuv/Efesin/Efesin 2

←Efesin 1

La Bibia piemontèisa Efesin

Efesin 3→

2

La Bìbia piemontèisa - Efesin 2

Da la mòrt a la vita

¹A-i era 'n temp che vojàutri i j'ere coma mòrt^[1] për motiv ëd vòstra dzubidiensa e ij tanti vòstri pecà. ²I l'avìe pijà l'andi 'd vive 'nt ël pecà, second ch'as costuma an ës mond, e i scotave mach ël diav, ch'a l'é 'l cap^[2] ëd le potense dël mond invisìbil^[3]. A l'é chiel lë spìrit ch'as dà tant da fé ancheuj ant ij cheur ëd coj ch'as arfudo 'd fé ubidiensa a Nosgnor^[4]. ³Tuti nojàutri na vòta i vivìo 'dcò parèj: i seguitavo mach j'anvìe passionaj e j'inclinassion ëd nòstra natura 'd pecator. I j'ero 'd natura l'oget ëd l'ira 'd Nosgnor^[5], tanme tuti j'àutri^[6]. ⁴Nosgnor, contut, ch'a l'é rich an misericòrdia e ch'an veul tant bin, ⁵bele s'i j'ero mòrt për motiv ëd nòstri pecà, a l'ha dane vita cand ch'a l'ha arsussità 'l Crist dai mòrt. (A l'é mach për la grassia 'd Nosgnor ch'i seve stàit salvà!). ⁶Chiel a l'ha fane arsussité ansema a Crist e l'ha fane asté con chiel ant ij cej, përchè ch’a l'ha butane 'n comunion con Gesù Crist. ⁷A l'é parèj che Nosgnor a l'ha rendune l'esempi da mostré a le generassion ch'a vniran ëd la richëssa sensa paragon ëd soa grassia e bontà anvers ëd nojàutri, coma ch'a l'é mostrà 'nt lòn ch'a l'ha fàit për noi an Crist Gesù. ⁸Nosgnor a l'ha salvave për grassia cand ch'i l'eve chërdù^[7]: lolì a l'é nen cheicòsa ch'i l'eve merità an na quaj manera^[8], ma a l'é 'n don che Nosgnor a l'ha fave. ⁹La salvëssa a l'é nen n'arcompensa për avèj fàit cheicòsa 'd bon^[9]: gnun a peul vantess-ne! ¹⁰A l'é chiel ch'a l'ha fàit cheicòsa 'd neuv an nojàutri: a l'ha torna creane an Crist Gesù, parèj che adess i podoma fé 'd còse bon-e, cole che chiel a l'ha prontà tant temp fa përchè i-j fèisso.

Un pòpol sol an Crist

¹¹Dësmentieve nen che na vira, vojàutri i fasìe nen part dël pòpol ëd Nosgnor. I j'ere considerà dai Giudé, ch'as vanto 'd soa sirconcision, dij pagan ch'as sogeto nen a sirconcision, ma cola lì a l'é cheicòsa ch'a rësguarda mach la carn e nen ël cheur. ¹²An coj di là i vivìe separà dal Crist. I stasìe fòra dai privilegi dla sitadinansa dël pòpol d'Israel e i conossìe nen le promësse dl'Aleansa che Nosgnor a l'ha fàit con lor. I vivìe 'nt ës mond sensa Nosgnor e sensa speransa. ¹³Adess, nopà, i seve stàit butà 'n comunion con Gesù Crist. Na vira i j'ere lontan da Nosgnor, ma adess i seve stàit avzinà a chiel për ël mojen dël sangh ëd Crist.

¹⁴A l'é stàit Crist medésim a porté la pas an tra 'd noi. Chiel a l'ha gionzù ij Giudé e coj ch'a lo son nen ant un pòpol ùnich cand, ant sò còrp an sla cros, chiel a l'ha campà giù 'l mur ëd nimicissia ch'an dividìa ¹⁵A l'ha falo cand ch'a l'ha portà a la fin ël sistema dla Lege con ij sò comandament e nòrme^[10]. A l'ha portà la pas an tra ij Giudé e coj ch'a lo son nen cand ch'a l'ha creà an chiel medesim, dai dòi grup, un pòpol ùnich. ¹⁶Ansema, an un còrp sol, ël Crist a l'ha arconsilià^[11] a Nosgnor un grup e l'àutr për ël mojen ëd soa mòrt an sla cros, e la nimicissia ch' i l'avìo l'un contra l'àutr a l'é stàita butà a mòrt. ¹⁷Chiel a l'ha portà costa bon-a neuva 'd pas a vojàutri, chi seve nen ëd Giudé e ch' i j'ere motobin lontan da Nosgnor^[12], e pas ai Giudé ch'a na j'ero davzin. ¹⁸Adess tuti nojàutri i podoma ven-e al Pare për ël mojen dël midem Ëspìrit Sant, për motiv ëd lòn che Crist a l'ha fàit për nojàutri. ¹⁹A l'é për lòn che adess vojàutri, ch'i seve nen ëd Giudé, i seve pì nen ëstrangé e forësté. I seve 'd sitadin ansema a tut ël pòpol sant ëd Nosgnor. I seve mèmber ëd la famija 'd Nosgnor. ²⁰Ansema, i soma soa ca, edificà an sle fondassion ëd j'apòstoj e dij profeta. Crist Gesù midem a n'é la pera d'àngol. ²¹I soma butà ansema con deuit për dventé 'n templi sacrà për ël Signor. ²²Për sò mojen vojàutri ch'i seve nen ëd Giudé i seve 'n camin a dventé la residensa andoa che Nosgnor a viv për ël mojen ëd sò Spìrit.

Nòte

1. Cfr. Colossèis 2:13.
2. O "prinsi".
3. O "potense 'd l'ària".
4. O let. "ij fieuj dl'incredulità", o "dij rivoltos".
5. O “fieuj dl’ira”.
6. 2:1-5 cfr. Colossèis 2:13.
7. O "për la fede".
8. O "ch'a ven da vojàutri".
9. O "për ëd bon-e euvre".
10. Cfr. Colossèis 2:14.
11. Cfr. Colossèis 1:20.
12. Cfr. Isaia 57:19.