Rino Serra/Le fior dël mal/020

Da Wikisource.
Jump to navigation Jump to search

XX. PËRFUM ESÒTICH[modifiché]

Quand ant la càuda sèira d'otogn con euj sarà,
I respiro l'odor ëd tò sen caloros,
Vëddo dëslupesse rive e paesagi giojos
Che da un sol nojos a son ëdcò sbalucà;

Un'isola garga ch'a don-a për natura
Erbo pitòst dròlo e 'd bej frut savoros;
Òmo che a l'han ëd còrp tant svicc e vigoros,
Dòne con euj sorprendent për franchëssa pura.

Vers ël clima 'nciarmant guidà da tò odor
Mi i vëdd un pòrt pien d'erbo e 'd vele ancor
Strache për j'onde dël mar...e ij sò sghiribiss,

Antant che 'l përfum ëd tamarindi vërdzolant,
Ch'a circola 'nt l'aria e an gonfia le nariss,
As mes-cia 'n mia ànima al cant dij navigant.