Rino Serra/Le fior dël mal/005
MI I-J VEUJ BIN A L'ARCÒRD D'EPOCHE PATAN-E
[modifiché]Cole epoche patan-e am pias arcordé,
Cand Febo le statue a stasìa a 'ndoré.
Antlora l'òmo e la dòna 'n soa agilità
A godìo sensa busìa e sensa ansietà,
Ël cel amoros la schin-a a-j carëssava,
La salute 'd soe nòbij machin-e a duvrava.
Cibele alora dru e 'd frut generos,
A truvava pa ij sò fieuj un pèis tròp gravos,
Ma, luva dal cheur gonfi 'd tenerëssa comun
A borava l'univers ai sòi mimin brun.
L'òm l'avìa 'dcò 'l dirit, chiel fòrt, vigoros, galan
D'esse fier dle blësse ch'a lo ciamavo sovran;
Frut pur da minca dëspresia, vèrgin ëd chërplure,
Dont la carn slissa e dura a cissava a mordiure!
Ël poeta 'ncheuj cand ch'a veul ideé
Le native grandeur, ant ij pòst andoa che...
Patan va l'òmo e la dòna a l'istessa manera,
A sent un frèid tënëbros s-ciassé l'ànima 'ntera
Dëdnans a sto nèir quàder che tant a spaventa.
O mostruosità piansente soe vestimenta!
O ridicoj tronch! Veri tòrs degn ëd le mascre!
O pòver còrp torsù, molanciù, pansù e màire,
Che 'l dio 'd l'Ùtil, implacabil e seren
Già da masnà, an soe fasse 'd bronz av ten!
E voi dòne, ahidé! Coma candèile spalie
Coròse dai vissi ëd vòste nutriente baile;
E voi vèrgin, ës-ciave 'd vissi matern, ardità
Con tute le bruture 'd la fecondità!
Noi i l'oma l'é vera 'd coròte nassion,
Blësse sconossuve a veje popolassion:
I l'oma 'd face rosià dai cancher dël cheur
E coma dì... ëd blësse bin pien-e 'd langor;
Ma coste invension ëd nòste muse tardive
Vieteran pa, a le rasse 'd salute prive,
Ëd rende a la gioventura 'n cadò përfond
-A la santa gioventura da la dossa front,
Da l'aria sempia, euj limpid coma eva corent,
Ch'a va sbardand su tut coma 'n cel ësplendrient
Asur, j'osej, ij sò përfum satì e le fior,
Soe bele canson e sòj bin doss calor!