Rino Serra/Garcia Lorca/024

Da Wikisource.
Jump to navigation Jump to search

BALADA D’UN DI ‘D LUJ[modifiché]

Ciochinere d’argent
A pòrto ij beu.

-Doa ‘t vas, cita mia,
Ëd sol e fiòca?

-Vad për margrite
An sël pra verd.

-Ël pra l’é tant leugn
E a l’ha paura.

-Né l’airon né l’ombra
A tëmm mè amor.

-Tëmm ël sol, cita mia,
Ëd sol e fiòca.

-L’é scapà dai mè cavej
Ormai për sempe.

-Chi ‘t ses , bianca cita?
Da doa ‘t ven-e?

-Ven-o da j’amor
E da j’adoss.

Ciochinere d’argent
A pòrto ij beu.

Còs it l’has an boca
Ch’a pija feu?

-La stèila ‘d mè moros
Ch’a viv e meuir.

-Cos it pòrte ‘n pét,
Tant fin e leger?

-La spa dël mè moros
Ch’a viv e meuir.

-Còs it l’has ant j’euj
Nèir e grandios?

-I mè pensé arnos
Che sempe am ferisso.

-Përchè ‘t pòrte ‘n mantel
Nèir ëd mòrt?

-Ahi i son la vidoa,
Arnosa e sensa gnente,

Dël cont dël Làur
Dij Làur!

-Ch’it serchi sì
S’it veuj bin a gnun?

I serch ël còrp dël cont
Dij Làur.

-Ti ‘t serchi l’amor
Vidovela malegna?
Ti ‘t serchi n’amor
Che magari ‘t treuve.

-Stèile dël cel
A son mè desideri,
Doa truverai mè amor
Ch’a viv e meur?

-A l’é la mòrt ant l’eva,
Citin-a ‘d fiòca,
Quatà ‘d nostalgìe
E ‘d garòfo.

-Ah! Cavajer vagabond
Dij sipress,
Na neuit ëd lun-a
Mia ànima a t’eufr.

-Ah Isis sognatris.
Citin-a sensa amel,
Ti che ‘n boca ai cit
It cambi la conta.
Mè cheur it eufr.
Cheur sotil,
Ferì da j’euj
Ëd le dòne.

-Cavajer galant,
Resta con Nosgnor.
Vad a serché ‘l cont
Dij Làur.

-Adieu, fiëttin-a
Reusa ‘ndurmìa
Ti ‘t vas për amor
E mi a la mòrt.

Ciochinere d’argent
A pòrto ij beu.

Mè cheur a sagna
Come na fontan-a.

Luj 1919