Neuv Sermon Subalpin/Na preparassion fàita con soagn

Na preparassion fàita con soagn

Cand ch’i organisoma ‘n disné gròss a ca nòstra për anviteje ij parent e j’amis, i butoma tut l’impegn e 'l soèn ch’i podoma për prontelo da bin, peuj i mandoma për temp j’anvit për ëscrit. L’istess a l’ha fàit Nosgnor Dé cand ch’a l’ha prontà tut për la vnuva an cost mond dël Salvator Gesù Crist. La letura bìblica d’ancheuj an mostra coma che Nosgnor a l’ha fàit costa preparassion.

"Vardé sì coma ch'a l'é anandiasse l'anonsi dl'Evangeli, la bon-a neuva ch'a riguarda Gesù Crist, ël Fieul ëd Dé. Coma ch'a l'é scrit ant ij lìber dij profeta: "Varda-sì: it mando 'dnans ëd ti mè nunsi: chiel at pronterà la stra. La vos ëd col ch'a crija 'nt ël desert a dis: 'Pronteje la stra a Nosgnor, spianeje ij sò senté'". Për lòn Gioann a batijava 'nt ël desert, e a predicava un batésim ëd pentiment për ël përdon dij pecà. E tut ël pais ëd la Giudèa e j'abitant ëd Gerusalem a andasìo da chiel, e chiel a-j batijava 'nt ël Giordan, an ëscotand la confession dij sò pecà. Gioann a l'era vëstì con na pel ëd gamel, e ai fianch a l'avìa na sëntura 'd coram, e as sostentava an mangiand ëd cavalëtte e d'amel servaj. Soa predicassion a disìa: "Dapress ëd mi, a-i në ven un ch'a l'é pì potent che mi, un ch'i son gnanca degn ëd basseme për dësgropéje le liasse dle sàndole. Mi i l'hai batjave con d'eva, ma chiel av batjerà con lë Spìrit Sant" (March 1:1-8).

La vnuva ant ësto mond dël Signor e Salvator Gesù Crist, a l’é nen cheicòsa ch’a sia rivà a l’amprovista, che gnun as lo spetava anans. Ël leugh e ‘l temp anté ch’a l’é capità a quadro bin con lòn che Nosgnor Dé, a l’avìa bin pianificà e fàit conòsse për ël mojen dij profeta d’Israel. L’apòstol Pàul a dis: “Cand a l'é vnuje 'l temp giust, Nosgnor a l'ha mandà sò Fieul, nassù da na fomna, nassù an sogession a la Lege (Gàlat 4:4).

Al moment ëd soa vnuva Nosgnor Dé a-i riva con na preparassion diligenta. La stòria dël pòpol antich d’Israel e ‘l messagi dij profeta a na son le tape. Tut a l’era stàit finalisà a la vnuva dël Crist, ël Mëssìa: la Lege e ij Profeta, ma ‘dcò j’àutri scrit dël Testament Vej. Gioann ël batesator (Batista a l’é nen un nòm, ma në stranòm, ch’a veul dì “col ch’a batija”), a l’é l’ùltim dij profeta, l’ùltima vos autorèivola dël Testament Vej. La manera ch’a l’era vestì, soa vita, sò mëssagi, a lo mostro ‘d na manera ch’i podoma nen ësbaliesse a sò riguard: a l’éra ‘n profeta génit ëd Nosgnor.

A l’é ‘l mond dël Testament Vej ch’as piega, ch’as armèt “al pì potent”, al pì fòrt. Ël Testament Vej a l’é “pì bass”, ma nen dësùtil. Cola-lì a l’é la rason për ch’i l’oma da lese e bin dë studié ‘l Testament Vej. I l’oma da felo da la prospetiva dël Crist, ma la Paròla ‘d Nosgnor, ël Crist medésim, a l’é ‘d chila ch’a fà eco, ch’a-j arson-a tut a travers. Ël Testament Vej a fà part dla “spiegassion” dël Crist (chi ch’a l’é e lòn ch’a l’ha fàit) A l’é për ël mojen dël Testament Vej, dla Lege, dij profeta e dj’àutri sò scrit, ch’i arseivòma l’anunsi dël Salvator Gesù Crist. ch’i në comprendo"ma ‘l caràter e la fonsion. I podrio nen apressié, deje ‘l valor ch’a mérita, al Salvator Gesù Crist, s’i conossoma nen la Lege 'd Nosgnor che ‘l Testament Vej a proclama. A l’é na Lege ch’an condan-a, ma mach për portene a trové an Gesù Crist col ch’an salva da cola condan-a.

La Bibia a l’é un lìber ùnich ch’a conten ël Testament Vej e ‘l Testament Neuv. La Bibia a conten jë scrit ëd Mosé e jë scrit dij prim dissépoj ëd Gesù, coj ch’a l’han ëscrivù ij vangej e j’epìstole. Tuta la Bibia a l’é ispirà da Nosgnor e an n’é da vantagi. Ant la bibia nen a l’é da scarté, da lassé da banda. L’apòstol a dis: “Tuta la Scritura a l’è ispirà da Nosgnor e ùtil për mostré la vrità. An fà rend-ne cont ëd lòn che an nòstra vita a va nen; an coregg cand ch’i soma ant l’eror e an mostra lòn ch’a l’é giust. Nosgnor a la dovra për pronté sò pòpol[ a fé d'ògni sòrt d'euvre bon-e” (2 Timòt 3:16-17).

Gioann, ël batesator, a prédica “un batésim ëd pentiment pr' ël përdon dij pecà”. Chiel a fortiss ciàir e net lòn che Nosgnor Dé an comanda an soa Lege 'd condòta moral. An fa rend-se cont dij nòstri faliment grev da la mira moral e dle conseguense fataj ch’a n’arzulto. A l’é parèj che Gioann a fà seurte ant la gent ël bzogn ch’a l’ha dël Salvator Gesù Crist. D’òm e ‘d fomne a rivo parèj al pentiment, e l’eva ‘d col batèsim për lor a l’é la marca, ël segn, dla purificassion ch’a oten-o cand ch’as fido al Salvator Gesù Crist. Lolì a l’é l’istess ch’a càpita cand che ancheuj l’Evangeli a l’é predicà coma ch’as deuv. L’Evangeli an nunsia an prim leugh la Ljge 'd Nosgnor, cola ch’i l’oma da sogetess-ne, an fa rend-ne cont ëd nòstre trasgression a cola lege, ij nòstri pëccà, dle conseguense fataj ëd cole nòstre trasgression, e dël bzogn ch’i l’oma dël salvator Gesù Crist. Cand ch’i confessoma a Nosgnor nòstri pëccà e i-j chitoma 'd feje, e cand ch’i arseivòma Gesù Crist coma nòst Salvator e Signor, chiel an buta a pòst con Nosgnor Dé, a stabiliss la pas an tra nojàutri e Chiel. A l’é antlora che, an na comunion arnovà con Nosgnor Dé, i vëddoma dovertesse dë 'dnans ëd nojàutri la pòrta ‘d na vita pien-a ‘d significassion e sensa fin. Mach Gesù Crist a peul doverté për nojàutri cola pòrta, la pòrta dël paradis; gnente e gnun d’àutri. I soma parèj batijà ant l’eva, ma a l’é ‘l Crist ch’an “batija” da la mira dlë spirit, col ch’an “fonga” ant la vita dlë Spirit Sant. Cola vita-lì gnun a podrà mai portela via.

Preghiera

Nosgnor! It làudo e it ringrassio për la sapiensa ch’ìt l’has avù cand ch’it l’has rangià tut për bin ant la stòria e ant mia vita, për porté d’òm e ‘d fomne, për porté mi, al Salvator Gesù Crist. I arsèivo ‘d bon gré toa Paròla e i veuj angageme a lesla e studiela con diligensa. Vera, l’anunsi ‘d toa Lege am buta an crisi, ma am men-a sicura a la grassia ch’it ëm fase conòsse ant ël Crist. Giut-me a d’esse testimòni ‘d cost’Evangeli për ël mojen ëd mie paròle e con na vita ch’a-j sia conforme. Amen.