La Bibia piemontèisa/Testament Vej/Salm/Salm 46
Ij Salm[modifiché]
46. Dé a l’é nòst arpar e fortëssa[modifiché]
- An costa “Càntica ‘d Sion”, ël pòpol ëd Nosgnor a fortiss con fiusa ch'a peud stess-ne al sicur përchè Dé, ël gran rè Guerié, a stà a Gerusalem e a la guerna da le mnasse dle nassion, che ant ël mond a son càusa d'agitassion granda. Un refren (vv. 7 e 11) a sara le doe division pì grande dë sto salm.
1Pr’ ël diretor dël còro. Na càntica dij dissendent ëd Còre, da dovresse për vos ëd sopranin[1]. Dé a l’é nòst arpar e fortëssa, sèmper pront a giutene ant l’ora dël privo. 2A l’é per lòn ch’i l’oma gnun-e tëmme cand ch’a ven ël taramòt e le montagne a së sfriso e a calo ‘nt ël mar[2]. 3Che pura j’océan a breugio e a s-ciumo; che pura le montagne a tërmolo e che j’aque as levo! [Intërludi]
4Ij brass ëd na rivera a ‘rlegro la sità ‘d Dé, la mison pì sacrà dël pì-Aut. 5Dé a l’é an mes ëd chila: a peul pa esse dësblà. Dé a la guarda anans ch’a sponta ‘l dì. 6Le nassion a son an confusion e ij sò regn a së sfriso! La vos ëd Dé a tron-a e la tëra as dësfa! 7Ël Signor ëd l’Univers a l’é con nojàutri; nòstra muraja a l’é ‘l Dé ‘d Giacòb. [Intërludi].
8Vnì a vëdde j’imprèise ëd Nosgnor, coma ch’a l’ha causà desolassion dzora dla tèra. 9Chiel a fà chité le guère për tuta la tèra; a l’ha s-ciapà j’arch e le lanse; a l’ha daje feu a jë scu.
10Sté chiet e arconòsse che mi i son Dé: i sarai onorà da tute le nassion; i sarai onorà për tut ël mond. 11Ël Signor ëd l’Univers a l’é con nojàutri; nòstra muraja a l’é ‘l Dé ‘d Giacòb [Intërludi].