La Bibia piemontèisa/Testament Vej/Salm/Salm 44

←Salm 43

La Bibia piemontèisa Ij Salm

Salm 45→

La Bìbia piemontèisa - Salm 044

Ij Salm

44. Nosgnor! Nojàutri midem i l’oma sentulo

Coj ch’a parlo ant ës Salm (la comunità dij chërdent israelita ch’a rend soa adorassion a Nosgnor) a l’ero stàit delus da Nosgnor. Ël Salm a 'ncamin-a con na nòta positiva, an laudand Nosgnor ch’a l’avìa guidà Israel a ‘d vitòrie an guèra. Ij vers 1-8 a parësso ‘n cantich ëd fiusa e a ciamo al pòpol ëd reciteje anans la bataja. Bin tòst, contut, l’umor a cambia ant na complenta për motiv ed na derota recent ch’a l’avìo avù. La diferensa an tra l’ancheuj e ‘l passà a fà vnì pì granda la confusion ëd la gent. Israel a l’avìa fiusa che Nosgnor a l’avrìa daje vitòria, ma chiel adess a l’avìa arpossaje e permëttù ch’a fusso umilià ant la bataja. Se Israel a fussa stàit 'nfedel a Nosgnor, soa derota a sarìa stàita sensà, ma la nassion a l’era bin ëstàita fedel a Nosgnor. An comparissionand Nosgnor a ‘n bërgè negligent, la nassion a cissa Nosgnor a dësviejesse e a manifesté soa compassion për un pòpol ch’a patìa.

¹Pr’ ël maestro dël còro. Un Salm dij dissendent ëd Còre. Cant. Nosgnor! Nojàutri midem i l’oma sentulo; ij nostri cé a l’han contane ‘d toe 'mprèise, ëd tut lòn ch’it l’has fàit për lor ant ij temp antich. ²Con toa man it l’has piantaje dëspiassand d’àutre nassion. It l’has ëscassà ‘d pòpoj për fé pòst a lor. ³A l’han pa conquistà la tèra për soe spa e a l’era pa stàit sò bras fòrt a deje la vitòria. A l’era stàita toa man drita e tò bras fòrt, e la lus amborgnanta ‘d to moro ch’a l’avìa giutaje, përchè ti it l’has vorsuje bin. ⁴It ses ëstàit ti, mè^[1] Rè e mè Dè, ch’it l’has decretà le vitòrie ‘d Giacòb. ⁵A l’é stàit mach për tò podèj^[2] ch’i l’oma podù arpossé ‘ndré^[3] ij nòstri nemis; a l’é mach an tò nòm ch’i l’oma podù scarpisé ij nòstri aversari. ⁶I l’hai pa confidà an mè arch; a l’é pà stàita mia spa a feme trionfé. ⁷A l’é stàit ti midésim ch’it l’has salvane dai nòstri nemis, e ch’it l’has quatà ‘d confusion coj ch’a l’avìo nojàutri an òdio. ⁸Nosgnor! Nojàutri i doma glòria mach a ti tut ël dì e i selebreroma për sèmper tò nòm. [Interludi].

⁹Tutun, ant ël dì d’ancheuj ti it l’has campane da banda ant ël disonor. It seurte pa pì a combate con nòstre armeje. ¹⁰It ën fase bate l’artreta dë 'dnans ai nòstri aversari e coj ch’an detesto a ravagio nòstra tèra. ¹¹It l’has rendune tanme d’agnej ch’a van al massatòjo, it l’has dësbergiairane an mes ëd le nassion. ¹²It l’has vendù tò pòpol për quat sòld, it ses gnanca butate a marcandene ‘l pressi. ¹³It përmëtte che ij nòstri nemis an faso le schergne, it l’has rendune la burla e la sbefia dij pais ch’an ëstan dantorn, ¹⁴It l’has rendune l’oget dij sò schers; cand ch’an vëddo a sopato la testa con l’ària ‘d pijene ‘n gir. ¹⁵Tut ij dì i soma umilià, e l’onta a l’é scrita an sù nòstra facia. ¹⁶I sentoma mach j’oltragi ëd coj ch’an fan dë schergne. I vëdoma nòstri nemis ch’a veulo pijesse l’arvangia ‘d nojàutri.

¹⁷Tut sossì a l’é capitane sensa che nojàutri it t’avèisso dësmentiate^[4]. I l’oma ‘d gnun-a manera brisà toa aleansa. ¹⁸Ij nostri cheur a l’han pa chitate; i soma pa nen dëstornasse dai tò senté. ¹⁹Tutun, ti ‘t l’has crasane ant na tan-a ‘d siacal, it l’has quatane con un mantel ëd top^[5]. ²⁰S’i l’avèisso dësmentià ‘l nòm ëd nòst Dé, s’i l’avèisso alvà nòstre man për anvoché n’àutr dé, ²¹Nosgnor a l’avrìa bin visass-ne, përchè chiel a conòss tùit ij segret dij cheur. ²²A l’é për ti ch’i andoma a meuire tut ël dì e an ten-o parèj ëd feje da masel^[6].

²³Nosgnor! Dësvijte! Përché deurmes-to? Àuss-te! Has-to bandonane për sèmper? ²⁴Përchè fas-to visa ‘d nen e ‘t varde da n’àutra banda^[7]? Përchè fas-to visa ‘d pa savèj e ‘d nen vëdde nòstra soferensa e opression? ²⁵I tomboma a tèra ant la póer e nòstra facia a l’é ant la pàuta. ²⁶Àuss-te, ven a giutene! Lìberne s’a l’é vera ch’it ën veule bin!

Nòte

1. Col ch'a parla ambelessì a l'é na sola përson-a, miraco 'l selebrant o 'l rè. Ij cangiament da plural a singular (vv. 4, 6) e plural (vv. 1-3, 5, 7-8) a peul d'esse che 'l Salm a sia da canté për antìfone.
2. O "an tò nòm"
3. Let. "deje 'd cornà" coma ch'a fan dij tòr.
4. O "arfudate".
5. O "l'ombra dla mòrt".
6. Cfr. Roman 8:36.
7. O "it l'has stërmane la facia".