La Bibia piemontèisa
Ij Salm

Salm[modifiché]

La Bìbia piemontèisa - Salm 135

135. Laudé Nosgnor! Laudé ‘l nòm ëd Nosgnor![modifiché]

Ël Salmista a ansiga a laudé Nosgnor përché chiel a l’é ‘n Dé ch’as peul paragonesse a gnun d’àutri. Nosgnor a l’é sovran an sël mond e a fà ‘d còse maravijose për Israel.

¹Laudé Nosgnor! Laudé ‘l nòm ëd Nosgnor! Smon-e ‘d làude, vojàutri ij servidor ëd Nosgnor ²ch’i steve ant ël templi 'd Nosgnor, ant le cort dël templi 'd nòst De. ³Laudé Nosgnor, përché chiel a l’é brav! Canté ‘d làude a sò nòm, përché ch’a l’é agreàbil. ⁴Sensa dubi Nosgnor a l’ha sernù Giacòb për chiel medèsim, Israel për esse soa proprietà particolar. ⁵Vera, mi i sai che Nosgnor a l’é grand e che nòst Dè a l’é pì grand che tuti coj che an cost mond a son considerà 'd dio. ⁶Chiel a fa tut lòn ch’a-j pias, an cel e an sla tèra, ant ij mar e ant le përfondità dj’océan. ⁷Chiel a fà che le nìvole as levo ai confìn ëd la tèra, a fà che la lòsna a compàgna la pieuva e a tira fòra ‘l vent dai sò depòsit. ⁸Chiel a l’ha frapà ij prim nà dl’Egit, comprèis òm e bestie. ⁹A l’ha fàit d’euvre maravijose e d’assion ëd giudissi antrames ëd ti, Egìt, contra ‘l Faraon e ij sò servidor.

¹⁰Chiel a l’ha butà ‘n derota motobin ëd nemis e massà dij re potent - ¹¹¹Sicon, ël re dj’Amorita e Ogh, ël re ‘d Basan e tùit ij regn ëd Canan. ¹²A l’ha dàit an ardità le soe tère, com’ an ardità a Sò pòpol Israel. ¹³Nosgnor! Tò nòm a l’é pèr sèmper, Toa reputassion a resta ‘d generassion a generassion, ¹⁴pèrché Nosgnor a dà a sò pòpol l’arvangia e a l’ha compassion dij sò servidor.

¹⁵Ij buracio 'd divinità ch'a l'han fasse ij pòpoj a son mach d’argent e d’òr: a l’han faje ‘d man d’òm. ¹⁶A l’han la boca, ma a peudo nen parlé, a l’han dj’euj, ma a peudo nen vëdde. ¹⁷A l’han dj’orìje, ma a peudo nen sènte, sensa dubi a peudo pa fiatì. ¹⁸Coj ch’a-j fan a faran l’istèssa fin, parèj coma coj ch’a-j fan fede^[1]. ¹⁹ Famija d’Israel! Laudé Nosgnor! Famija d’Aron! Laudé Nosgnor! ²⁰ Famija ‘d Levi! Laudé Nosgnor! Vojàutri ch’i vade dapress a Nosgnor, laudelo! ²¹Nosgnor a mérita la làuda an Sion - chiel ch’a sta ‘d cà a Gerusalem. Laudé Nosgnor!

Nòte[modifiché]

↑ 135:15-18 cfr. Salm 115:4-8; Arvelassion 9:20.

[1] 135:15-18 cfr. Salm 115:4-8; Arvelassion 9:20.

[1]