La Bibia piemontèisa/Testament Vej/Salm/Salm 13
Ij Salm
[modifiché]13. Nosgnor! It ses dësmentiate ‘d mi!
[modifiché]- Ël Salmista, ch’a l’é disperà e lì-lì për meuire, crasà dai sò nemis, a jë smija che Nosgnor a l’abia chitalo, ma as arcòrda che Nosgnor a l’ha promëttù dë steje dacant e ‘d giutelo e ch’a l’é sèmper ëstaje fedel. A l’é parèj ch’a sà che bin tòst a podrà torna canté ‘d làude gioiose.
1Për ël diretor dël còro. Salm ëd David. Nosgnor! It ses dësmentiate ‘d mi! Fin-a a cand sta situassion-sì a durerà? Fin-a a cand ch’i varderas da n’àutra banda e ch'it ancorze nen che mi i son anbelessì parèj? 2Fin-a cand ch’i l’avrai ‘d porté an mia ànima csi tanta angossa e ‘d sagrin për tut ël dì! Fin-a a cand ch’i l’avrai da soporté che ij mè nemis a l’abio da prevalèj dzora ‘d mi? 3Nosgnor, mè Dé! Vìrte e rëspond-me! Ampiniss ëd ciàir ij mè euj[1], dësnò i meuiro. 4Lassa nen che ij mè nemis as arlegro e ch’a diso: “I l’oma batulo!”. Lassa nen che ij mè aversari as arlegro ‘d vëdd-me tombé. 5Malgré tut lòn I l’hai fiusa che tò amor anvers ëd mi a vnirà mai a manch. I sarai mi pitòst a arlegreme përchè ch’it l’has liberame. 6I sai ch’a vnirà tòst ël dì ch’i canterai a Nosgnor për tut ël bin che chiel a l’ha fame!
Nòte
[modifiché]- ↑ Ambelessì 'l Salmista a rapresenta chiel midem an sla broa dla mòrt. Ij sò euj a son lì lì për saresse e se Nosgnor a fà nen cheicòsa sùbit, chiel a "tomberà andurmì" për sèmper.