La Bibia piemontèisa/Testament Vej/Salm/Salm 11
Ij Salm
[modifiché]11. Nosgnor a l’é mia sosta
[modifiché]- Ël Salmista a ‘rfuda ‘l consej dë scapess-ne lontan dai sò nemis pericolos, e a conferma che chiel a l’ha fiusa ant ël caràter giust ëd Nosgnor. A-j ciama che l’esecussion ëd sò giudissi ëd condan-a a sia dëscadnà dzora tùit ij malfasent.
1Nosgnor a l’é mia sosta. Coma peude-ve dime “Vatne, osel, a ‘rfugete an montagna!”? 2Varda: ij gram[1] a son lì ch’a tendo ij sò arch, a l’han la flecia posà a la còrda pronta për tiré ant l’ombra drit al cheur dij giust. 3Ij fondament ëd la lege e dl’órdin a son dësblasse: còs a podrìo mai fé ij giust?
4Ma Nosgnor a stà an sò Templi sant; Nosgnor ancora a l’ha sò tròno ant ël cel. Da là a bèica ‘l mond e a osserva tute le përson-e ch’a-i son an sla tèra. 5Chiel a esàmina tant ij giust che ij gram. Chiel a l’ha an òdio coj ch’a-j pias la violensa. 6Ch’a fasa pieuve ‘d feu e ‘d sorfo dzora dj’ingiust; ch’a-j punissa con ëd vent afoà. 7Përchè Nosgnor, ch’a l’é giust, a-j pias la giustissia. J’òm giust a lo vëdran an fàcia.
Nòte
[modifiché]- ↑ Ant ij Salm, "ij gram", o "la gent grama" a l'é 'd sòlit coj che, arogant, a diso 'd nen chërde an Dé, coj ch'a dëspresio lòn che chiel a l'ha comandà, a comëtto 'd pecà, a diso busiardarìe e a trasso j'àutri. A fan oposission a Nosgnor e a mnasso sò pòpol.