La Bibia piemontèisa/Testament Vej/Salm/Salm 10
Ij Salm[modifiché]
10. Nosgnor! Com é-lo ch’it të në stas tant lontan?[modifiché]
- Vàire manoscrit ebràich e la version antìca djë stanta a combino Salm 9 e 10 ant n’ùnich salm. Pijà an isolament, Salm 10 a l’é n’arcesta d’agiùt anté che ‘l Salmista a cissa Nosgnor a liberelo dai sò nemis pericolos, ch’a-j në fà la dëscrission con ëd detaj viv e scaros. Ël salmista a tèrmina con na nòta ‘d fiusa: a l’é sicur che la giustissia ‘d Nosgnor a vincerà.
1Nosgnor! Com é-lo ch’it të në stas tant lontan? Përchè të stermes-to cand ch’im treuvo ant ij pastiss? 2La gent grama, an soa 'nsolensa, as fà gnun ëscrupol a deje a còl a coj ch’a peulo nen dësfend-se: ch’a sio lor, la gent grama, a casché ant le tràpole ch’a l’han ëstermà an sij vieuj.
3As ansuperbiss ël maléfich ëd soe ambission; àvid ëd sòld, chiel a meprisa ‘l Signor. 4Pien ëd bòria, ël maléfich a àussa ‘l nas e a sclama: “I l’hai pa da rendne cont a Nosgnor; ëd lòn ch’i faso chiel a-i n’anfà nen”. Sossì a l’é lòn ch’a pensa. 5Sèmper a pròspera ant lòn ch’as ancamin-a ‘d fé. A ved nen che ij tò giudissi a lo speto. A tùit ij sò nemis a fà lë schergne. 6A pensa an sò cheur: “Am capiterà mai gnente ‘d mal. Për mi a passeran d’agn dël tut sensa sagrin”. 7A l’ha la boca pien-a ‘d maledission, busiardarìe e mnasse. Sota soa lenga a l’ha mach ëd cativèrie e ‘d malfàite[1]. 8As buta a l’avàit a l’intrada dle borgià për sassiné ‘d gent nossenta. A serca sèmpe s’a peussa trové ‘d gent da gabé. 9Tanme ‘n leon a së stërma për sauté adòss a soe vìtime al moment giust. Tanme ‘n cassador a catura le bestie deboj e a-j rabasta vìa ant le rèj. 10Ël gram a ciapa soe vitime e lor a tombo sota na fòrsa ch’a peudo nen arzist-je. 11A pensa an sò cheur: “Dé a varda gnanca: a l’ha sarà j’euj, as n’ancòrz pa ëd lòn ch’i faso mi”.
12Nosgnor! Auss-te, àussa la man, mè Dé. Dësmentja nen coj ch’a l’han gnun-a difèisa! 13Përchè la gent grama a meprisa Dé e a pensa an sò cheur: “I l’avroma pa da rende cont a Dé ëd lòn ch’i foma”? 14Ma tut lolì ti ‘t lo vëdde pro! Ti, ch’it varde pen-e e patiment, it në pije bin nòta e cola gent, a sò moment, it la castighe. Coj ch’as peulo nen dësfend-se a buto an ti soa fiusa. Ti ‘t ses col ch’a giuta j’orfanin.
15Nosgnor! Dzarma la gent grama e maléfica! Daje a còl fin-atant ch’a sìo tuti dësblà. 16Nosgnor a l’é rè ant ij sécoj dij sécoj! Da sò pais ij pagan a dëspariran. 17Nosgnor! Ti ‘t conòsse le speranse ‘d coj ch’a l’han gnun-a difèisa. A l’é sicur che ti të scoteras ij sò crij e it jë daras tante consolassion. 18Ti ‘t rendras giustissia a j’orfanin e a coj ch’a son crasà, tant che cola gent-là a tornerà pì a crasé l’òm ch’a l’é a tèra.
Nòte[modifiché]
- ↑ Cfr. Roman 3:14.