La Bibia piemontèisa/Testament Vej/Salm/Salm 9
Ij Salm[modifiché]
9. I veuj ringrassié Nosgnor con tut ël cheur[modifiché]
- Ël poeta, ch'a parla forse an nòm d'Israel o 'd Giuda, a làuda Nosgnor përchè Chiel ha l'ha delivralo da 'd nassion nemise. A sélebra la sovranità e la giustissia 'd Nosgnor e a anvita d'àutri a giontesse a chiel ant le làude dla grandëssa 'd Nosgnor. La version greca dë sto Salm-sì a lo buta ansema al Salm 10.
1Për ël magìster ëd la mùsica; conform a lë stil ëd ''alëmot-labben, meuire për ël fieul''; un Salm ëd David. I veuj ringrassié Nosgnor con tut ël cheur e conté a tuti dle còse maravijose che Chiel a l'ha fàit. 2Ti 't ëm fase sauté 'd gòj; i canterai 'd làude a Tò nòm, òh Dé altissim.
3Cand che ij mè nemis a bato a l'artreta, lor a s'antrapo e ti 't jë bute an derota. 4Ti 't l'has dësfendù mia giusta càusa; da Tò tròno Ti 't l'has giudicà con giustissia. 5Ti 't l'has ëmnassà ij pagan[1] e 't l'has ësterminà coj ch'at rispeto nen; it l'has dëscancelà për sèmper sò nòm. 6Ij tò nemis a son finì; ant ij leugh andoa ch'a stasìo a-i é mach pì 'd ruin-e. Le sità ch'it l'has dësreisà a son dësmentià për sèmper.
7Contut, Nosgnor a regna për sèmper, da Sò tròno Chiel a pòrta a compiment ij sò giudissi. 8Chiel a giudicherà 'l mond con giustissia e për la càusa dij pòpoj a darà 'd sentense con dritura.
9Nosgnor a l'é n'arpar për coj ch'a son crasà, n'arfugi për coj ch'a son sagrinà. 10Coj ch'a conòsso Tò nòm a l'han fiusa 'n Ti, përché Ti, Nosgnor, it chite pa coj ch'at sërco.
11Canté a Nosgnor, Chiel ch'a l'ha sò tròno a Sion; fé conòsse an tut ël mond soe 'mprèise. 12Përché Chiel, ch'as arcòrda dij crimen ëd sangh, as dësmentia mai dij crij 'd coj ch'a l'han gnun ch'a-j dësfend. 13Àbie pietà 'd mi, Nosgnor, varda coma ij mè nemis am dan ëd torment. Ciapme al vòl prima ch'i tombo 'nt la gola dla mòrt. 14Salv-me, parèj i podrai laudete an pùblich a le pòrte 'd Sion e mostré mia gòj përchè Ti 't l'has dësgagiame.
15Ij pagan a son tombà lor midem ant ël trabucèt ch'a l'avìo piassà për d'àutri. Ij sò pé medésim a son stàit ciapà 'nt la tràpola che lor a l'avìo stërmà.
16Nosgnor a l'é bin conossù për Soa giustissia. Coj ch'a lo rispeto nen a son antrapasse 'nt soe assion medésime. [anterludi].
17Coj ch'a rispeto nen Nosgnor a fongran ant l'infern. Sto-sì a l'é 'l destin dij pagan ch'as dësmentio 'd Nosgnor.
18Jë bzognos a saran mai dësmentià; le speranse dij pòver a saran nen crasà për sèmper. 19Auss-te sù, Nosgnor: lassa nen che ij mortaj at dësfido. Che ij pagan a sio giudicà an Toa presensa! 20Faje tërmolé da la pàu, òh Dé; faje vëdde coma ch'a son ëstùpid!
Nòta[modifiché]
- ↑ O "le nassion".