Provèrbi

27

¹Blaga pa për doman, përchè it sas gnanca lòn ch'a të speta ancheuj^[1].

²Ch'a sia n'àutr a laudete e pa toa boca, un forësté e pa ij tò làver midem.

³La pera a l'é greva, la giàira a l'ha sò pèis, ma pì ancor che un-a e l'àutra a l'é l’ameror causà da ‘n fòl.

⁴La flin-a a l'ha pa 'd misericòrdia, ël fot a l'é violensa, ma col ch'a l'é ch’a peul arziste a la gelosìa?

⁵A l'é mej n'arpròcc dovèrt pitòst che n'amor ëstërmà.

⁶Le ferìe 'd n'amis a son sincere, ij basin ëd un nemis a son fàuss.

⁷Na gola arpatà a dëspressia l'amel ma për col ch'a l'ha fam ëdcò l'amer a l'é doss.

⁸L'òm che a va leugn da ca soa, a l'é parèj ëd n'osel ch'a spassia fòra dal ni.

⁹Ël përfum e l'ancens a ten-o alégher ël cheur, ël bon consèj ëd n'amis a dà coragi a l'ànima.

¹⁰Chita pa tò amis, nì l'amis ëd tò pare, intra pa ant la ca 'd tò frel ant ël di ëd toa dësgrassia. A l'é mej avèj n'amis davzin che 'n frel lontan.

¹¹Sërca d'esse savi, car ël me fieul, parèj ch'it arlegreras mè cheur e mi i savrai coma rësponde a col ch'am ofend.

¹²L'òm furb a s-ciàira 'l perìcol e a prend soe precaussion. Ij bonomeri a van anans a la catòrba e peui a pago le conseguense ‘d soa 'mprevidensa.

¹³Pija la vestimenta a col che a l'ha garantì për un forësté e tenla an gagi për col ch'it conòsse pa.

¹⁴Na benedission fàita a vos àuta ‘d matin bonora, a sarà considerà na maledission.

¹⁵Le stisse sensa fin dël temp ëd pieuva e na fomna tacabeghe a së smijo: ¹⁶col che a veul tenla a l'é parèj coma se a vorèissa tnisse 'l vent e a andèissa a cheuje l'euli con le man.

¹⁷Ël fer as mòla con ël fer e l'òm as fin-a lë spìrit con ij sò amis.

¹⁸Coma coj ch’a cudisso piante ‘d fì a l’han ël drit ëd mangene ij frut, parèj ij travajeur ch’a guerno j’anteresse dij sò padron a saran arcompensà.

¹⁹Tanme 'l visagi as arflet ant l’eva, parèj ël cheur ëd na përson-a a ‘rflet sò caràter génit.

²⁰Pròpi coma la Mòrt e la Përdission a n’han mai pro, parèj a son j’anvìe dla gent.

²¹Coma 'l griseul a l'é për l'argent e la fòrgia për l'òr, parèj a l'é l'òm për la boca 'd col ch'a lo làuda.

²²Bele s'it pistèisse 'l fòl ant ël morté con un piston ansema al gran, it socrolerìe pa soa folairà.

²³Soagna tò strop, pijte soen ëd toe féje, ²⁴përchè la richëssa a dura pa për sèmper e na coron-a a podrìa nen duré da na generassion a l'àutra.

²⁵As gava 'l fen, a sponta l'erba neuva e as cheujo j'erbe dle montagne; ²⁶ij bero at dan la lan-a e con ij cravòt vendù it cate 'n camp: ²⁷desse da fé për lolì a l’é la garansìa ch’it l’avras assé ‘d làit ëd crava për ti, toa famija e ij to lavorant.

Nòte

↑ Cfr. Giaco 4:13-16.

[1] Cfr. Giaco 4:13-16.

[1]