La Bibia piemontèisa/Testament Vej/Proverbi/Proverbi 10

←Proverbi 9

La Bibia piemontèisa Provèrbi

Proverbi 11→

Provèrbi

10

La Bìbia piemontèisa - Proverbi 10

Prim’ archeuita dij proverbi ‘d Salomon

¹Ij proverbi ‘d Salomon.

Un fieul giudissios a fà gòj a sò pare; un fieul ësvantà^[1] a l’é na cros për soa mare.

²A dan gnun ver profit ij tesòr catà con la malissia, ma la dritura^[2] at salva da la mòrt.

³Nosgnor a pija pa për la fam l’ànima dij giust, ma a sodisfa nen l’aptit dij malegn.

⁴Ij fagnan a dvento bin tòst pòver, ma as anrichisso coj ch’a travajo con diligensa. ⁵Coj ch’as dan da fé ant ël temp ëd la mësson a son ëd fieuj bin giudissios, ma coj ch’a deurmo cand ch’a dovrìo mèje a son na dësgrassia.

⁶A pieuvo ‘d benedission an sla testa dij giust, ma a l’é l’infamia ch’a quata ij malegn^[3].

⁷La memòria dij giust a sarà benedìa, ma ‘l nòm dij malegn a sarà dësmentià^[4].

⁸Ij savi ‘d cheur as arlegro d’arsèive d’amaestrament^[5] ma ij babiliard a l’é mej perdje che trovèje^[6].

⁹Na condòta onesta a l’é la pì sicura, ma na condòta përversa a sarà bin tòst arconossùa e a ‘rseivrà sò castigh..

¹⁰Coj ch’a sghicio l’euj a lòn ch’a l’é pa giust a van al rëscontr ëd sagrin, e ‘l babiliard a tombrà an ruin-a.

¹¹La boca dël giust a l’é ‘n poss ëd vita, ma la boca dij malegn a stërma d’antension violente.

¹²L’òdio a cissa ‘d discòrdie ma l’amor a quata tute le trasgression^[7].

¹³As treuva ‘d saviëssa an sij làver ëd la përson-a giudissiosa, ma le marche ëd lëgnà as treuvo an sla schin-a dij folitro.

¹⁴Ij savi a fan tesòr ëd conossensa, ma la boca d’un folitro a ‘nvita la rovin-a.

¹⁵La richëssa a l’é piassafòrt dlë sgnor, la povertà la rovin-a dël pòver.

¹⁶L’arcompensa dël travaj dël giust a l’é la vita, ma lòn ch’a vagna ‘l malegn a l’é mach ël castigh ëd sò pëccà.

¹⁷Col ch’a fà tesòr dj’amaestrament a marcia an sla via dla vita, ma col ch’a ‘rfuda la coression a va a ramengh.

¹⁸Stërmé l’òdio at rend n’ipòcrita^[8]; sparlé dj’àutri at rend un fòl.

¹⁹L’òm ch’a ciaciara tròp a dròca ‘n pëccà ma l’òm ëd pòche paròle a l’é pì savi. ²⁰La lenga dël giust a l’é tanme d’argent soasì, ma ij pensé^[9] dël malegn a l’han gnun valor. ²¹Le paròle dël giust a son ëd nuriment për tanti, ma ij folitro a meuiro për mancansa ‘d cognission.

²²A l’é la benedission ëd Nosgnor ch’a rend ësgnor^[10]; a-i é pa pì da gionteje.

²³Al folitro a-j fà piasì ‘d fé ‘l mal; a l’òm giudissios a-j fà piasì la saviëssa.

²⁴Ëd lòn che ‘l malegn a l’ha tëmma a-j rivrà, ma ‘d lòn che ‘l giust a l’ha ‘nvìa a-j sarà acordà.

²⁵La tempesta a l’é passà e a l’ha portasse vìa ‘l malegn, ma ‘l giust a l’ha ij pé bin piantà e a-j fà nen^[11].

²⁶Tanme l’asil a l’é pr’ ij dent e ‘l fum për j’euj, parèj a son ij plandron për coj ch’a-j dan ëd travaj da fé.

²⁷Esse timorà ‘d Nosgnor a slonga la vita, ma j’agn ëd coj ch’a rispeto pa Nosgnor^[12] a saran ëscursà.

²⁸La speransa dël giust as compiss, ma lòn ch’a së speto ij malegn as perd an nen.

²⁹La via ‘d Nosgnor a l’é la fòrsa ‘d coj ch’a vivo con dritura, ma a l’é la rovin-a dij malèfich.

³⁰Ël giust a sarà mai dëspiassà ma ij malegn a staran pa tant an sla tèra.

³¹La boca dël giust a fà chërse la saviëssa^[13], ma la lenga përversa^[14] a mérita d’esse tajà.

³²Ël làver dël giust a san lòn ch’a l’é acetàbil, ma la boca dël malegn a pronunsia ‘d paròle përverse.

Nòte

1. O “fòl”.
2. O “l’onestà”.
3. O “la violensa a quata la boca dij malign”.
4. O “a marsa”.
5. O “dij comand”.
6. O “a tomberan”, “a saran rovinà”.
7. Cfr. Giaco 5:20; 1 Pero 4:8.
8. O “un busiardon”.
9. O “ël cheur”.
10. O “ch’a dà ‘d richëssa”.
11. O “a l’ha ‘d fondassion ëstàbil”.
12. O “dij malign”.
13. O “a dà ‘d bon consèj”.
14. O “dël trasson”.